މިހާރު ކުރިއަށްދާ 50 ވަނަ ގައުމީ ބެޑްމިންޓަން މުބާރާތުގެ އަންހެން ސިންގަލްސް ފައިނަލުން މޮޅުވެ، މި އިވެންޓްގެ ޗެމްޕިއަންކަން ފާތިމަތު ނަބާހާ އަބްދުއްރައްޒާގު (ނަބާ) ފަސް ވަނަ ފަަހަރަށް ހޯދައިފި އެވެ.
އެންމެ ފަހުން، ގައުމީ ބެޑްމިންޓަން މުބާރާތް ބޭއްވީ މީގެ ތިން އަހަރު ކުރިން، 2023 ވަަނަ އަހަރު އެވެ. އެ ފަހަރު ފައިނަލުގައި ނަބާ ވަނީ ކޮއްކޮ، އައިމިނަތު ނަބީހާ އަބްދުއްރައްޒާގު (ނަބީ) އަތުން ބަލިވެފަ އެވެ. އޭގެ ކުރިން، ނަބާ ވަނީ ޖެހިޖެހިގެން ތިން ފަހަރު ގައުމީ ތަށި ހޯދައިފަ އެވެ. އެއީ، 2019، 2021 އަދި 2022 ވަނަ އަހަރު އެވެ.
މި ފަހަރުގެ ފައިނަލުގައި މިއަދު ހަވީރު ކުޅިވަރު އެކުވެނި ބެޑްމިންޓަން ކޯޓުގަައި ކުޅުނު މެޗުގައި، ނަބާ ވަނީ ސީދާ ދެ ސެޓުން ނަބީގެ މައްޗަށް ކުރިހޯދައިފަ އެވެ. އެ ގޮތުން، ފުރަތަމަ ސެޓުގައި ނަބާ، ބޮޑު ލީޑެއްގައި އޮވެ، މެޗުގެ ކޮންޓްރޯލް ނަަގައިގެން މޮޅު ކުޅުމެއް ދެއްކި އެވެ. އެ ގޮތުން، ފުރަތަމަ ސެޓު، ނަބާ އަށް ލިބުނީ، 15-6 އިންނެވެ.
ދެ ވަނަ ސެޓުގައި، ނަބީ ވަނީ ކޮންމެ ވެސް ވަރެއްގެ ފައިޓެއް ނަބާ އަށް ދީފަ އެވެ. އެ ގޮތުން، ސެޓުގެ މެދެއްހާ ހިސާބުން އެއްވަރުވެސް ކުރި އެވެ. އަދި، ޕޮއިންޓުގެ ފަރަގު ކުޑަކުރަމުންދިޔަ ނަމަވެސް، ސެޓުގެ ފަހުކޮޅުގައި، ނަބާ ވަނީ ތަފާތު ދައްކައި ކާމިޔާބު ހޯދައިފަ އެވެ. އެ ގޮތުން، ނަބާ އެ ސެޓު ގެންދިޔައީ، 15-12 އިންނެވެ.
ނަބާ ވަނީ މި އަހަރު ބެޑްމިންޓަން އެސޯސިއޭޝަނުން ބޭއްވި އެސޯސިއޭޝަން ޗެމްޕިއަންޝިޕްގެ ސިންގަލްސް ޗެމްޕިއަންކަން ވެސް ހޯދައިފަ އެވެ. ނަބާ ސެޓުތައް ގެންދިޔައީ، 15-07، 18-16 އިންނެވެ.
އެސޯސިއޭޝަން ޗެމްޕިއަންޝިޕެކޭ އެއްގޮތަށް ނަބާ އާއި ނަބީގެ ޕެއާ އިން ވަނީ ގައުމީ އަންހެން ޑަބަލްސް ޗެމްޕިއަންކަން ހޯދައިފަ އެވެ. އެއީ، ފައިނަލުގައި އައިޝަތު އަފްނާން ރަޝީދު އާއި މައިސާ ފަތުހުﷲ އިސްމާއިލްގެ ޕެއާ ބަލިކޮށްފަ އެވެ. ނަބާ އާއި ނަބީ ސެޓުތައް ގެންދިޔައީ، 15-04، 15-08 އިންނެވެ. މިއީ، ގައުމީ އަންހެން ޑަބަލްސް ޗެމްޕިއަންކަން ނަބާ އާއި ނަބީގެ ޕެއާ އިން ހޯދި ހަ ވަނަ ފަހަރެވެ.
މިކްސް ޑަބަލްސް އިވެންޓްގައި، އެސޯސިއޭޝަން ޗެމްޕިއަންޝިޕް ފައިނަލުގައި ނަބާ އާއި ޒަޔާން ޒަކީގެ ޕެއާ ވަނީ ބަލިވެފަ އެވެ. އެކަމަކު، މިއަދު ޒަޔާން އާއި ނަބާގެ ޕެއާ އިން ވަނީ ގައުމީ ތަށި ހޯދައިފަ އެވެ. މި ފަހަރުގެ ފައިނަލުގަައި ނަބީ އާއި ނިބާލް އަހުމަދުގެ ޕެއާ އަތުން ނަބާ އާއި ޒަޔާންގެ ޕެއާ މޮޅުވީ، 11-15، 15-13 އަދި 17-15 އިންނެވެ.
ގައުމީ މުބާރާތުގެ އެއް ވަނަ އާއި ދެ ވަނަ ޑިވިޝަނުގެ ފައިނަލް މެޗުތައް ކުޅުނުއިރު، އެއް ވަނަ ޑިވިޝަނުގެ ފަސް ފައިނަލުގަައި މުޅިން ވެސް ކުޅުނީ ރިވައިވަލް ސްޕޯޓްސްގެ ކުޅުންތެރިންނެވެ.
