ކުޑަކުދިންގެ އަމިއްލަ މައުލޫމާތާއި ސިއްރުތައް ހިފެހެއްޓުމާ ބެހޭ ގާނޫނުތަކާ ޓިކްޓޮކުން ހިލާފުވެފައިވާ ކަމަށް ބުނެ އެމެރިކާ ސަރުކާރުން އުފުލާފައިވާ ދައުވާތައް ނިންމުމަށްޓަކައި، 400 މިލިއަން ޑޮލަރު ދެއްކުމަށް އެ ކުންފުނިން އެއްބަސްވެއްޖެ އެވެ.
މި އެއްބަސްވުމަކީ ކުރީގެ ރައީސް ޖޯ ބައިޑަންގެ ސަރުކާރުގެ ދަށުން އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ) އިން 2024 ވަނަ އަހަރު ހުށަހެޅި ދައުވާއަކާ ގުޅިގެން ވެވުނު އެއްބަސްވުމެކެވެ. އެ ދައުވާގައި ބުނެފައިވަނީ ޓިކްޓޮކާއި އެ ކުންފުނީގެ މައި ކުންފުނި ބައިޓްޑާންސް އިން، އުމުރުން 13 އަހަރުން ދަށުގެ މިލިއަނަކަށް ވުރެ ގިނަ ކުދިންގެ މައުލޫމާތު އެއްކޮށްފައިވާ ކަމަށެވެ.
މި އަމަލަކީ 2000 ވަނަ އަހަރު އެމެރިކާގައި އަމަލުކުރަން ފެށި ފެޑަރަލް ގާނޫނެއް ކަމަށްވާ "ޗިލްޑްރަންސް އޮންލައިން ޕްރައިވެސީ ޕްރޮޓެކްޝަން އެކްޓް" އާ ހިލާފު ކަމެކެވެ. މިއީ މިހާރު އެމެރިކާގެ ގިނަ ސްޓޭޓްތަކަކުން މެޓާ ކުންފުންޏާ ދެކޮޅަށް ދައުވާ ކުރަމުންދާ ގާނޫނު ވެސް މެއެވެ.
އެސިސްޓަންޓް އެޓާނީ ޖެނެރަލް ބްރެޓް ޝޫމޭޓް ވިދާޅުވީ، މި މައްސަލަ ފެށުނުއިރު އޮތް ހާލަތަށް ވުރެ މިއަދު ކުޑަކުދިންނާއި ބެލެނިވެރިންގެ ރައްކާތެރިކަން ބޮޑުވެފައިވާ ކަމަށެވެ.
އެ ގާނޫނާ ހިލާފުވެގެން މީގެ ކުރިން އެމެރިކާ ސަރުކާރަށް ޖޫރިމަނާ ދެއްކި ކުންފުނިތަކުގެ ތެރޭގައި ގޫގުލްގެ ޔޫޓިއުބް ހިމެނެ އެވެ. އެ ކުންފުނިން 2019 ވަނަ އަހަރު 170 މިލިއަން ޑޮލަރު ދެއްކިއިރު، އެޕިކް ގޭމްސް އިން 2022 ވަނަ އަހަރު ވަނީ 275 މިލިއަން ޑޮލަރު ދައްކާފަ އެވެ.
މީގެ އިތުރުން، އެމެރިކާގެ 29 ސްޓޭޓެއްގެ އެޓާނީ ޖެނެރަލުން ކުރާ ދައުވާތަކާ ގުޅިގެން، މެޓާ ކުންފުނިން ސަތޭކަ ބިލިއަން ޑޮލަރަށް ވުރެ ގިނަ އަދަދެއްގެ ޖޫރިމަނާ ދައްކަން ޖެހިދާނެ ކަމުގެ ބިރު ވަނީ ހީވެފަ އެވެ. އިންސްޓަގްރާމާއި ފޭސްބުކްގެ ވެރިފަރާތުން ކުޑަކުދިންނަށް އަމާޒުކޮށްގެން ނާޖާއިޒު ފައިދާ ހޯދާ ކަމަށް ބުނެ ހުށަހަޅާފައިވާ މި މައްސަލައިގެ ޝަރީއަތް މި ހަފުތާގައި ވަނީ ފަށާފަ އެވެ.
