މުރްސިއާ، ސްޕެއިން (އޮގަސްޓް 21) - ސްޕެއިނުގެ ތަރި، ކާލޯސް އަލްކަރާޒް، އަނިޔާގެ ސަބަބުން ހަތަރު މަސް ދުވަހު ކުޅުމާ ދުރުގައި ހުރުމަށް ފަހު ކުޅެން ޓެނިސް ކޯޓަށް ނުކުންނަން ތައްޔާރުވެއްޖެ އެވެ.
އުމުރުން 23 އަހަރުގެ އަލްކަރާޒް މި ފަހަރުގެ ޓެނިސް ސީޒަން ފެށީ ރަނގަޅު ފޯމެއްގަ އެވެ.
އެ ގޮތުން، އަހަރުގެ ފުރަތަމަ ގްރޭންޑް ސްލޭމް ޓެނިސް މުބާރާތް ކަމަށްވާ އޮސްޓްރޭލިއަން އޯޕަން ޗެމްޕިއަންކަން ހޯދި އެވެ. އެއާއެކު، އޭނާ ވެފައިވަނީ، ހަތަރު ގްރޭންޑް ސްލޭމް ތަށި ހަމަކުރި އެންމެ އުމުރުން ހަގު ކުޅުންތެރިޔާ އަށެވެ. އޭގެ ފަހުން، އޭނާ ވަނީ ގަަތަރު އޯޕަން މުބާރާތް ވެސް ކާމިޔާބުކޮށްފަ އެވެ. އެކަމަކު، އިންޑިއަން ވެލްސްގެ ސެމީ ފައިނަލުން ބަލިވުމަށް ފަހު، މަޔާމީ އޯޕަންގެ ތިން ވަނަ ބުރުން ކެޓީ އެވެ.
އޭޕްރީލް 14 ވަނަ ދުވަހުގެ ފަަހުން، ޓެނިސް މެޗެއްގައި އަލްކަރާޒް ނުކުޅެ އެވެ. އެއީ، ބާސެލޯނާ އޯޕަންގައި އަތުގެ ކުޑަހުޅަށް ލިބުނު އަނިޔާއެއްގެ ސަބަބުންނެވެ. އޭގެ ކުރިން މޮންޓެ ކާލޯ މާސްޓާސްގެ ފައިނަލުން، އިޓަލީގެ ޖަނިކް ސިނާ އަތުން ބަލިވެ، ދުނިޔޭގެ ރޭންކިން އެއް ވަނަ އަލްކަރާޒަށް ގެއްލުނެވެ.
ފްރެންޗް އޯޕަން އާއި ވިމްބަލްޑަން ޓެނިސް މުބާރާތް އަނިޔާގެ ސަބަބުން ގެއްލުނު އަލްކަރާޒް، އެނބުރި އަންނަ މުބާރާތަކީ، ޔޫއެސް އޯޕަން އެވެ. އަލްކަރާޒަށް މި ވަގުތު ދުނިޔޭގެ ރޭންކިން ދެ ވަަނަައިގައި އޮތްއިރު، އޭނާގެ އޮތީ 8160 ޕޮއިންޓެވެ. އެއް ވަނައިގައި އޮތް ސިނާ އަށް ވަނީ 13450 ޕޮއިންޓް ލިބިފަ އެވެ.
ޔޫއެސް އޯޕަންގެ ސިންގަލްސް އިވެންޓްތައް ފަށަނީ މި މަހު 30 ވަނަ ދުވަހު އެވެ. އޭގެ ކުރިން، ޑަބަލްސް އިވެންޓްތައް ފަށާއިރު، އަލްކަރާޒް އަންނަނީ ޑަބަލްސް އިވެންޓްގައި ކުޅުމަށް ވެސް މަސައްކަތްކުރަމުންނެވެ. މިދިޔަ އަހަރުގެ ޔޫއެސް އޯޕަންގެ މިކްސް ޑަބަލްސްގައި އަލްކަރާޒް ވަނީ އިންގްލެންޑްގެ އެމާ ރަޑުކާނޫއާ އެއް ޕެއާއެއްގައި އެ އިވެންޓްގައި ކުޅެފަ އެވެ.
ހަތް ގްރޭންޑް ސްލޭމް ތަށި ހޯދާފައިވާ އަލްކަރާޒް، މިދިޔަ އަހަރުގެ ޔޫއެސް ފައިނަލް ކާމިޔާބުކުރީ ސިނާ ބަލިކޮށްފަ އެވެ. އަލްކަރާޒް ރަނގަޅު މޮޅެއް ހޯދި މި މެޗުގެ ސެޓުތައް ދިޔައީ، 6-2 3-6 6-1 6-4 އިންނެވެ. މިއީ، އަލްކަރާޒް، ޔޫއެސް އޯޕަން ކާމިޔާބުކުރި ދެ ވަނަ ފަހަރެވެ. އެންމެ ފުރަތަމަ ފަަހަރަށް އަލްކަރާޒަށް ޔޫއެސް އޯޕަން ތަށި ލިބުނީ، 2022 ވަނަ އަހަރު އެވެ.
އެންމެ ފަހުން ޔޫއެސް އޯޕަން ތަށި ދިފާއުކުރެވުނީ، 2004 އިން 2008 އަށް މި މުބާރާތް ކާމިޔާބުކުރި، ސްވިޒަލެންޑްގެ ލެޖެންޑް، ރޮޖާ ފެޑެރާ އަށެވެ. އަލްކަރާޒް، މި ފަހަރުގެ ޔޫއެސް އޯޕަންގައި އެ ކާމިޔާބީ އަށް އަމާޒުހިފާއިރު، އެންމެ ބޮޑު ގޮންޖެހުމަކަށް ކުރިމަތިވާނީ މެޗު ފިޓްނަސް ހިފެހެއްޓުމުގަ އެވެ.
