މެޑްރިޑް (އޭޕްރީލް 30) - އަތުގެ ކުޑަހުޅަށް ލިބިފައިވާ އަނިޔާ އަކަށް ފަރުވާ ހޯދަމުން އަންނަ ސްޕެއިނުގެ ޓެނިސް ތަރި، ކާލޯސް އަލްކަރާޒަށް މި ފަހަރުގެ ފްރެންޗް އޯޕަންގައި ކުޅުމުގެ ފުރުސަތު ގެއްލިއްޖެ އެވެ.
އަލްކަރާޒް ވަނީ އެންމެ ފަހުން ދެ އަހަރު ވެސް ފްރެންޗް އޯޕަންގެ ތަށި ހޯދައިފަ އެވެ.
ވަރުގަދަ ކުޅުމެއް ދައްކައި، ދުނިޔޭގެ ރޭންކިން އެއް ވަނަ، އިޓަލީގެ ޖަނިކް ސިނާ ބަލިކޮށް، އަލްކަރާޒް، ފްރެންޗް އޯޕަން ޓެނިސް މުބާރާތުގެ ތަށި މިދިޔަ އަހަރު ދިފާއުކުރީ ތާރީހީ ކުރިމަތިލުމަކަށް ފަހު އެވެ. މި މެޗުގައި، ސިނާ އަތުން ކުރި ހޯދަން އަލްކަރާޒް ވަނީ ހިތްވަރުގަދަ ކުޅުމެއް ދައްކައިފަ އެވެ. އެ ގޮތުން، ދެ ސެޓު އަނބުރާލައި، ތިން ފަހަރެއްގެ މަތިން ޗެމްޕިއަންޝިޕް ޕޮއިންޓް ސަލާމަތްކޮށް ކުރިހޯދީ އަލްކަރާޒް އެވެ. މިއީ، 2019 ވަނަ އަހަރުގެ ވިމްބަލްޑަން ފައިނަލުގައި ރޮޖާ ފެޑެރާ އަތުން މޮޅުވިއިރު، ނޮވަކް ޖޮކޮވިޗް މެޗު ޕޮއިންޓު ސަލާމަތްކުރި ފަހުން، ގްރޭންޑް ސްލޭމް ފައިނަލެއްގައި މިކަން ފެނިގެންދިޔަ ފުރަތަމަ ފަހަރެެވެ.
އުމުރުން 22 އަހަރުގެ އަލްކަރާޒް މި ފަހަރުގެ ޓެނިސް ސީޒަން ފެށީ، ފުރަތަމަ ފަހަރަށް، އަހަރުގެ ފުރަތަމަ ގްރޭންޑްސްލޭމް މުބާރާތް، އޮސްޓްރޭލިއަން އޯޕަންގެ ތަށި ހޯދައިގެންނެވެ. އެކަމަކު، އެންމެ ފަހުން ހެދި ޓެސްޓްތަކުން ވެސް އަތުގެ ކުޑަހުޅަށް ލިބުނު އަނިޔާ އިން ފަސޭހަނުވާތީ، އަލްކަރާޒް ނިންމީ ފްރެންްޗް އޯޕަންގަައި ނުކުޅުމަށެވެ.
ފްރެންޗް އޯޕަންގެ ކުރިން އިޓަލީގެ ކުރިއަށްދާ އިޓާލިއަން އޯޕަންގައި ވެސް އަލްކަރާޒް ނުުކުޅެ އެވެ.
"މިއީ އަހަންނަށް ވަރަށް ވެސް އުނދަގޫ ވަގުތުތަކެއް. އެންމެ ކުރަން ބޭނުންވާ ކަމާ ދުރުގައި ހުންނަން ޖެހުން. އެކަމަކު ޔަގީންކަމެއް، އެނބުރި އަންނާނީ ވަރުގަދަކޮށް،" އަލްކަރާޒް ބުންޏެވެ.
އަލްކަރާޒަށް ދުނިޔޭގެ ރޭންކިން އެއް ވަނަ ގެއްލުނީ، މޮންޓެ ކާލޯ އޯޕަން ފައިނަލުގައި ސިނާ އަތުން ބަލިވުމުންނެވެ. އަދި، އަނިޔާގެ ސަަބަބުން، އަލްކަރާޒަށް މި ގެއްލޭ މުބާރާތްތަކުގައި، ސިނާ ދައްކާ ކުޅުމުގެ ސަބަބުން، ރޭންކިން އެއް ވަަނަައިގައި މަގާމު ދަމަހައްޓަން ގިނަ ރޭންކިން ޕޮއިންޓްތަކެއް ހޯދުމުގެ ފުރުސަތު އޭނާ އަށް އެބައޮތެވެ.
ސިނާ އަށް މިހާތަނަށް ކެރިއަރުގައި ނުލިބި އޮތް ގްރޭންޑް ސްލޭމް ތަށްޓަކީ، ފްރެންްޗް އޯޕަން އެވެ. މި ފަހަރުގެ ފްރެންޗް އޯޕަންގެ ފޭވަރިޓެއްގެ ގޮތުގައި މި ވަގުތު އޮތީ ވެސް ސިނާ އެވެ.
ގްރޭންޑް ސްލޭމް މުބާެރާތަކަށް އެންމެ ފުރަތަމަ 2021 ވަނަ އަހަރު ކޮލިފައިވި ފަހުން، އަލްކަރާޒަށް މީގެ ކުރިން، ކުޅުމުގެ ފުރުސަތު ގެއްލިފައިވަނީ، 2023 ވަނަ އަހަރުގެ އޮސްޓްރޭލިއަން އޯޕަންގަ އެވެ. އެ ފަހަރު މުބާރާތުން ވަކިވާން ޖެހުނީ ފަލަމަސްގަނޑަށް ލިބުނު އަނިޔާއެއްގެ ސަބަބުންނެވެ. އޭގެ ފަހުން، މިއީ، އަނިޔާއަކާ ހެދި، ގްރޭންޑް ސްލޭމެއްގައި އަލްކަރާޒް ނުފެންނަ ފުރަތަމަ ފަހަރެވެ.
