ގައުމީ ބެޑްމިންޓަން ޓީމުގެ ކުރީގެ ތަަރި، މައިސާ ފަތުހުﷲ އިސްމާއިލް (މައި)، ރިވައިވަލް ސްޕޯޓްސްގެ ކޯޗިން ޓީމާ ގުޅިއްޖެ އެވެ.
އެ ގޮތުން، މައިސާ، ރިވައިވަލް ސްޕޯޓްސް ބެޑްމިންޓަން އެކަޑަމީއާ ފުލްޓައިމް ކޯޗެއްގެ ގޮތުގައި ގުޅިފައިވަނީ ލީޑިން ކޯޗެއްގެ ގޮތުގަ އެވެ. އުމުރުން 17 އަހަރުގައި ގައުމީ ބެޑްމިންޓަން ޗެމްޕިއަންކަން ހޯދާފައިވާ މައިސާ ވަނީ ގައުމީ ބެޑްމިންޓަން ޓީމަށް 2012 އިން ފެށިގެން 2023 އާ ހަމައަށް ކުޅެފަ އެވެ.
އެންމެ ހަގު އުމުރެއްގައި ރާއްޖޭގެ ގަައުމީ އަންހެން ސިންގަލްސް ބެޑްމިންޓަން ޗެމްޕިއަންކަން ހޯދުމުގެ ރެކޯޑެއް ހާސިލްކުރި މައިސާ ވަނީ ބައިނަލްއަގުވާމީ ގިނަ މުބާާރާތްތަކެއްގައި ރާއްޖެ ތަމްސީލްކޮށް މެޑަލް ވެސް ހޯދައިފަ އެވެ.
ރިވައިވަލް ސްޕޯޓްސް އިން ދެކޭގޮތުގައި، މައިސާ، އެ ކްލަބްގެ އެކަޑަމީގެ ކޯޗިން ޓީމާ ގުޅުމަކީ، ރަނގަޅު ފެންވަރެއްގެ އަންހެން ކުޅުންތެރިން ޑިވެލޮޕްކުރުމަށް ރިވައިވަލް އިން ކުރާ މަސައްކަތުގައި ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ.
ކުޅުމުގެ ކެރިއަރަށް ބަލާއިރު، މައިސާ ވަނީ ގައުމީ ބެޑްމިންޓަން ޓީމުގައި ހިމެނިގެން، ދެ އޭޝިއަން ގޭމްސް އާއި ތިން އިންޑިއަން އޯޝަން އައިލެންޑް ގޭމްސް (އައިއޯއައިޖީ)، ކޮމަންވެލްތު ގޭމްސް، ސައުތު އޭޝިއަން ގޭމްސް، ޔޫތު އޭޝިއަން ގޭމްސް، ބެޑްމިންޓަން އޭޝިއާ ޓީމު ޗެމްޕިއަންޝިޕް އަދި މޮރިޝަސް އިންޓަނޭޝަނަލް ސީރީސްގައި ރާއްޖެ ތަމްސީލްކޮށްފަ އެވެ.
ކާމިޔާބީ އަށް ބަލާއިރު، 2015 ވަނަ އަހަރާއި 2019 ވަނަ އަހަރުގެ އައިއޯއައިޖީގެ ބެޑްމިންޓަން އަންހެން ޓީމު އިވެންޓްގައި ލޯ މެޑަލް އަދި، 2023 ވަނަ އަހަރުގެ އައިއޯއައިޖީގެ އެ އިވެންޓްގައި ރިހި މެޑަލް ހޯދި ޓީމުގައި ހިމެނުނެވެ. އަައިއޯއައިޖީ، 2019 ގައި މިކްސް ޑަބަލްސް އިން ލޯ މެޑަލް ހޯދި މައިސާ ވަނީ ގައުމީ ލެވަލްގެ ބެޑްމިންޓަން އެކި މުބާރާތްތަކުގައި، ސިންގަލްސް އާއި ޑަބަލްސް އިވެންޓްތަކުން ވެސް ގިނަ ކާމިޔާބީތަކެއް ހޯދައިފަ އެވެ.
