މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) ގެ މެނޭޖިން ޑިރެކްޓަރު ކަމުގެ މަގާމަށާއި، އެ ކުންފުނީގެ ޑިރެކްޓަރުންގެ ބޯޑުގެ މެންބަރުކަމަށް ހާރިސް މުހައްމަދު އިއްޔެ އައްޔަންކުރައްވައިފި އެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އިން ހާރިސް، އެމްޓީޑީސީ އަށް އައްޔަންކުރައްވާފައި މިވަނީ، ސަރުކާރުން އެ ކުންފުންޏަށް ކުއްޔަށް ދޫކޮށްފައިވާ ގދ. މަގުއްދުވާގެ ހެޑްލީސް، އެ ރަށުގައި "އަޔާޑާ މޯލްޑިވްސް" ގެ ނަމުގައި ރިސޯޓު ހިންގަމުން އަންނަ ތުރުކީގެ އަހްމެޓް އައިޑެނިޒް ކުންފުންޏަށް ނުއަގުގައި ވިއްކާލަން ސަރުކާރުން ބޭނުންވެގެން އުޅޭ ކަމުގެ އަޑުތައް ފެތުރިފައި ވަނިކޮށެވެ.
އިތުބާރު ހުރި މަސްދަރުތަކުން "އަދަދު" އަށް މައުލޫމާތު ލިބިފައިވާ ގޮތުގައި، އެމްޓީޑީސީގެ ކުރީގެ މެނޭޖިން ޑިރެކްޓަރު އަހުމަދު ނިޔާޒު މަގާމުން ވަކިކުރީ، މަގުއްދުވާގެ ހެޑްލީސް އައިޑެނިޒް ކުންފުންޏަށް ދޫކޮށްލުމުގެ މުއާމަލާތް ހިންގަން ދެކޮޅު ހެދުމުންނެވެ.
އަޔާޑާ ރިސޯޓު ހިންގާ މަގުއްދުވާގެ ހެޑްލީސް ނުައަގުގައި ވިއްކާލަން މަސައްކަތް ކުރަނީ
އެމްޓީޑީސީން ކުއްޔަށް ހިފާފައިވާ މަގުއްދުވާގެ ހެޑްލީސް، އެ ރަށުގައި ރިސޯޓު ހިންގާ ތުރުކީގެ އައިޑެނިޒް ކުންފުންޏަށް ނުއަގުގައި ވިއްކާލަން މަސައްކަތް ކުރަމުންދާ ކަމުގެ މައުލޫމާތު ވަނީ ފެންމަތިވެފަ. ނަމަވެސް، އެމްޓީޑީސީގެ މެނޭޖުމަންޓުން ވަނީ އެކަމާ ދެކޮޅު ހަދައި، ކުންފުންޏަށް އާމްދަނީ ލިބޭ މުހިންމު ރަށެއްގެ ހެޑްލީސް ދޫކޮށްނުލާނެ ކަމަށް ބުނެފަ.
މަގުއްދުވާއަކީ 2006 އިން ފެށިގެން 25 އަހަރުގެ މުއްދަތަކަށް އެމްޓީޑީސީއަށް ކުއްޔަށްދޫކޮށްފައިވާ ރަށެކެވެ. އެމްޓީޑީސީން އެ ރަށް އައިޑެނިޒް ކުންފުންޏަށް ސަބްލީސްކުރީ 2007 ގައެވެ. އަދި އެ ކުންފުނިން އެ ރަށް ފަސް ތަރީގެ ފެންވަރަށް ތަރައްގީކޮށް އޮޕަރޭޓުކުރަން ފެށީ 2011 ގައެވެ.
އެމްޓީޑީސީ އާއި އައިޑެނިޒް ކުންފުންޏާ ދެމެދު ވެވިފައިވާ ސަބްލީސް އެއްބަސްވުމުގެ ދަށުން، ކޮންމެ ކުއާޓަރަކު 1.2 މިލިއަން ޑޮލަރު އެމްޓީޑީސީއަށް ލިބެއެވެ. ނަމަވެސް، 2031 ގެ ނިޔަލަށް އޮތް މި އެއްބަސްވުމުގެ މުއްދަތު ހަމަވުމުގެ ކުރިން، މަގުއްދުވާގެ ހެޑްލީސް އެ ކުންފުނީގެ ނަން މައްޗަށް ބަދަލުކުރަން އައިޑެނިޒްއިން އަންނަނީ މަސައްކަތް ކުރަމުންނެވެ.
އެމްޓީޑީސީގެ މެނޭޖުމަންޓުން ކުރިން އެކަމާ ދެކޮޅު ހެދީ، ހުޅުމާލޭގައި އޮފީސް އިމާރާތެއް އިމާރާތްކުރުމާއި ހދ. ނާގޮށި ތަރައްގީކުރުން ފަދަ ބޮޑެތި ކެޕިޓަލް އިންވެސްޓުމަންޓުތަކެއް ކުރަމުންދާ ދަނޑިވަޅެއްގައި، ކުންފުންޏަށް އާމްދަނީ ވަންނަ މުހިންމު އިންވެސްޓްމަންޓެއް ދޫކޮށްލުމަކީ މާލީ ގޮތުން ގެއްލުން ބޮޑު ކަމަކަށް ވާތީ އެވެ.
ސޯޝަލް މީޑިއާގައި ދެކެވޭ ވާހަކަތަކަށް ބަލާއިރު، އެ ރަށުގެ ހެޑްލީސް ވިއްކާލަން އުޅެނީ އެންމެ 1.5 މިލިއަން ޑޮލަރަށެވެ. މިއީ އެމްޓީޑީސީއަށް ކުއާޓަރަކު ލިބޭ އާމްދަނީއާ އަޅާބަލާއިރު ބޮޑު ގެއްލުމެކެވެ.
އެމްޓީޑީސީގެ އެމްޑީގެ މަގާމަށް އައްޔަންކުރެއްވި ހާރިސަކީ ވައިގެ ދަތުރުފަތުރާއި، ފަތުރުވެރިކަމާއި، މާކެޓިން، ޕަބްލިކް ރިލޭޝަންސް އަދި ބިޒްނަސް އެޑްމިނިސްޓްރޭޝަންގެ ދާއިރާއިން 30 އަހަރަށްވުރެ ދިގު މުއްދަތެއްގެ ތަޖުރިބާ ހޯއްދަވާފައިވާ މެނޭޖްމަންޓް ކޮންސަލްޓަންޓެކެވެ.
އޭނާ ކުރިން އަދާކުރެއްވި އިސް މަގާމުތަކުގެ ތެރޭގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ އެކްޓިން މެނޭޖިންގ ޑައިރެކްޓަރުކަމާއި، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޖެނެރަލް މެނޭޖަރުކަން ހިމެނެއެވެ.
ހާރިސް ވަނީ އޮސްޓްރޭލިއަން އިންސްޓިޓިއުޓް އޮފް ބިޒްނަސްއިން މާސްޓަ އޮފް ބިޒްނަސް އެޑްމިނިސްޓްރޭޝަން (އެމްބީއޭ) ހާސިލުކުރައްވާފަ އެވެ. އަދި އޭނާއަކީ ޗާޓަޑް އިންސްޓިޓިއުޓް އޮފް މާކެޓިން އާއި ޗާޓަޑް މެނޭޖްމަންޓް އިންސްޓިޓިއުޓްގެ ފެލޯޝިޕް ވެސް ހާސިލުކުރައްވާފައިވާ ބޭފުޅެކެވެ.
