އަދަދު ނޫހުން ގެނެސްދިން "އައިޝާ" ޑޮކިއުމެންޓްރީގެ މައްސަލައިގައި ފުލުހުން ހިންގާ ޖިނާއީ ތަހުގީގަށް ރައީސް މުހައްމަދު މުއިއްޒު ބަޔާން ދިންކަން ސާފުކޮށްދޭން ތަކުރާރުކޮށް ސުވާލުކުރުމުން ވެސް ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) އެ ސުވާލަށް ޖަވާބުދެއްވަން މިއަދު ދެކޮޅު ހައްދަވައިފި އެވެ.
ރައީސް އޮފީހުން ނޫސްވެރިންނަށް މައުލޫމާތު ދޭން ބޭއްވި ބައްދަލުވުމުގައި ފުލުހުންނަށް މުއިއްޒު ބަޔާން ދެއްވިތޯ ތަކުރާރުކޮށް ނޫސްވެރިޔަކު ސުވާލުކުރުމުން ވެސް މުންދު ވިދާޅުވީ މުއިއްޒުގެ މައްޗަށް ކުރެވޭ ތުހުމަތުތައް އެމަނިކުފާނު ދޮގުކުރައްވާފައިވާ ކަމަށެވެ. ނަމަވެސް ބަޔާން ދިނުމާ ގުޅޭގޮތުން މުންދު ޖަވާބެއް ނުދެއްވަ އެވެ.
"ރައީސް މުއިއްޒު ވަނީ އިންކާރުކުރައްވާފައި. ރައީސް މުއިއްޒަކީ މިކަމުގައި ބާޑަން އޮފް ޕްރޫފް އޮތް ބޭފުޅެއް ނޫން. އަޅުގަނޑު ދެންނެވިން. ހަތަރު ފަހަރަށް ހަމަ އެއް ސުވާލެއް ކުރެއްވިޔަސް، ހަތަރު ގޮތަށް ކުރެއްވިޔަސް،" މުންދު ވިދާޅުވި އެވެ.
"ހިނގަމުންދާ ތަހުގީގެއްގައި ދެންނެވޭ ވަރަށް އަޅުގަނޑު މިދެންނެވީ. ސަރުކާރުން ހިނގަމުންދާ ތަހުގީގަކާ ގުޅޭގޮތުން މަނިކުފާނު އަޅުގަނޑު އިތުރު އެއްޗެއް ނުދަންނަވާނަން އެނގޭތޯ."
މުންދު ވިދާޅުވީ ގަޒުފުގެ މައްސަލައެއްގައި އެކަމެއް ސާބިތުކޮށްދޭން ޖެހޭނީ މައްސަލަ ޖައްސާ ފަރާތުން ކަމަށެވެ. އެކަމާ ގުޅިގެން މުއިއްޒު އެއްވެސް ކަމެއް ސާބިތުކޮށްދެއްވަން ނުޖެހޭ ކަމަށް މުންދު ވިދާޅުވި އެވެ.
ފުލުހުން ހިންގާ ތަހުގީގަށް ރައީސުލްޖުމްހޫރިއްޔާގެ ބަޔާން ނެގިތޯ އެހުމުން ފުލުުހުން ޖަވާބެއް ނުދިން
"އައިޝާ" ޑޮކިއުމެންޓްރީގެ މައްސަލައިގައި ރައީސް މުއިއްޒުގެ ބަޔާނެއް ނެގިކަމަށް ވަކީލު ޝަމީމް ވިދާޅުވި ނަމަވެސް، އެކަމާ ގުޅޭގޮތުން ފުލުހުން ޖަވާބެއް ދީފައެއް ނުވެއެވެ. މި މައްސަލައިގެ ތަހުގީގަށް އަދަދު ނޫހުގެ އޮފީސް ރެއިޑްކޮށް، ބައެއް އިސްވެރިންނާއި ރައީސް އޮފީހުގެ ކުރީގެ މުވައްޒަފެއްގެ ޕާސްޕޯޓު ވަނީ ހިފަހައްޓާފައެވެ.
"ގާނޫނީ ވަކީލަކަށް ނުވިޔަސް އަޅުގަނޑަށް އެނގޭ ގަޒްފުގެ މައްސަލައެއްގައި ބާޑަން އޮފް ޕްރޫފް އޮންނާނީ އެފަރާތުގައި. އޭގެ މާނައަކީ އިޓްސް ފޯ ދެމް ޓު ޕްރޫވް ރާދާ ދެން އަދާ ވޭ އެރައުންޑް،" އޭނާ ވިދާޅުވި އެވެ.
އަދަދު ނޫހުން "އައިޝާ" ޑޮކިއުމެންޓްރީ އާންމުކުރިތާ މަސްދުވަސް ފަހުން ފުލުހުން ތަހުގީގެއް ހިންގަން ފެށީ އެ ޑޮކިއުމެންޓްރީއާ ގުޅޭގޮތުން މުއިއްޒުއާ މި ނޫހުން ސުވާލުކުރުމުންނެވެ.
ޑޮކިއުމެންޓަރީގެ މައްސަލަ ބަލަން އަމުރު ކުރީ މުއިއްޒެވެ. އެމަނިކުފާނު އެގޮތަށް އެންގިތާ މަދު ގަޑިއިރުތަކެއްގެ ތެރޭގައި ފުލުހުން ވަނީ އަދަދު ނޫހުގެ އޮފީހަށް ވަދެ ލެޕްޓޮޕްތަކާއި ހާޑްޑިސްކުތަކެއް ގެންގޮސްފަ އެވެ.
އެ މައްސަލައާ ގުޅިގެން އަދަދު ނޫހަށް ރެއިޑު ކުރުމުގެ އިތުރުން މި ނޫހުގެ ސީއީއޯ ހުސެއިން ފިޔާޒް މޫސާ އަދި މެނޭޖިން އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓަން ފުލުހުން އެދިގެން ކްރިމިނަލް ކޯޓުން ވަނީ އަމުރެއް ނެރެފަ އެވެ. އަދި އެ މައްސަލައިގެ ތަހުގީގަށް ފިޔާޒް އާއި ހަސަން ވަނީ މިދިޔަ ހަފުތާގައި ފުލުސް އޮފީހަށް ވެސް ހާޒިރުކޮށްފަ އެވެ.
އޭގެ އިތުރުން ފުލުހުން ވަނީ ކޯޓު އަމުރެއްގެ ދަށުން ރައީސް އޮފީހުގެ ކުރީގެ މުވައްޒަފެއްގެ ޕާސްޕޯޓު ވެސް ހިފަހައްޓައިފަ އެވެ. އޭނާގެ ބަޔާން ނެގީ މިއަދު އެވެ. ނަމަވެސް، އޭނާގެ ފަރާތުން ދިފާއުގައި އެއްވެސް ވާހަކައެއް ދެއްކުމުގެ ފުރުސަތެއް ފުލުހުން ދީފައެއް ނުވެ އެވެ.
