ޕެރިސް (އޭޕްރީލް 29) - ޔުއެފާ ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި ރޭ އެންމެ ފަހުގެ ޗެމްޕިއަން، ޕީއެސްޖީން އަމިއްލަ ދަނޑުގައި ކުޅެ، 5-4 އިން ބަޔާން މިއުނިކްގެ މައްޗަށް ކުރިހޯދައިފި އެވެ.
މިއީ، 1959-1960 ވަނަ އަހަރުގެ ޔޫރަޕިއަން ކަޕް (އޭރުގެ ޗެމްޕިއަންސް ލީގު)ގެ ސެމީ ފައިނަލުގައި ފްރޭންކްފާޓުން 6-3 އިން ރޭންޖާސް ބަލިކުރި ފަހުން އެންމެ ގިނަ ގޯލު ފެނުނު ސެމީ ފައިނަލް މެޗެވެ. މިއީ، ޗެމްޕިއަންސް ލީގުގެ ނަމުގައި ކުޅެން ފެށި ފަހުން، އެންމެ ގިނަ ގޯލު ފެނިގެންދިޔަ، އެންމެ ފޯރިގަދަ ސެމީ ފައިނަލް މެެޗެވެ.
ރޭގެ މެޗުގެ 17 ވަނަ މިނިޓްގައި ބަޔާނުން ލީޑުނެގީ ލުއިސް ޑިއާޒަށް ކުރި ފައުލަކަށް ލިބުނު ޕެނަލްޓީ އަކުން ހެރީ ކޭން ޖެހި ގޯލުންނެވެ. ފަސް މިނިޓް ފަހުން، ޕީއެސްޖީ އަށް އެއްވަރުކޮށްދޭން އޮސްމާން ޑެމްބެލޭ އަށް ލިބުނު ފުރުސަތުގައި ގޯލަށް ބޯޅަ ފޮނުވާނުލެވުނެވެ.
މެޗުގެ 23 ވަނަ މިނިޓްގައި ޕީއެސްޖީ އަށް އެއްވަރުކޮށްދިން ލަނޑު ޖެހީ ކްވިޗާ ކްވަރަޝްކޭލިއާ އެވެ. އޭގެ 10 މިނިޓް ފަހުން، މެޗުގެ 33 ވަނަ މިނިޓްގައި ޑެމްބެލޭ ނެގި ކޯނަރަކުން ޖޮއާއޯ ނެވޭސް ބޮލުން ޖެހި ގޯލުން ޕީއެސްޖީން ލީޑުނެގި އެވެ. އޭގެ ހަތް މިނިޓް ފަހުން، މައިކަލް އޮލީސޭ ވަނީ ލަނޑެއް ޖަހައި ބަޔާނަށް އެއްވަރުކޮށްދީފަ އެވެ. ފުރަަތަމަ ހާފު ނިމުމުގެ ކުރިން، ބަޔާންގެ އަލްފަންސޯ ޑޭވިސް އަތުގައި ބޯޅަ ޖެހުމުން ދިން ޕެނަލްޓީއަކުން ޑެމްބެލޭ ވަނީ ލަނޑު ޖަހައި ބަޔާނަށް އަލުން ލީޑުނަގައިދީފަ އެވެ.
ދެ ވަނަ ހާފުގެ ކުޅުން ފަށައިގެން 13 މިނިޓް ތެރޭ ޕީއެސްޖީން ދެ ގޯލު ޖަހައި، ތިން ގޯލުގެ ލީޑެއް ނެގި އެވެ. އެ ގޮތުން، 55 ވަނަ މިނިޓްގައި ކްވަރަޝްކޭލިއާ ވަނީ ޕީއެސްޖީގެ ހަތަރު ވަނަ ލަނޑު ޖަހައިފަ އެވެ. އަދި، އޭގެ ދެ މިނިޓް ފަހުން، ޑެމްބެލޭ ވަނީ ޕީއެސްޖީގެ ފަސް ވަނަ ލަނޑު ޖަހައިފަ އެވެ.
މެޗުގެ 64 ވަނަ މިނިޓްގައި ޖޯޝުއާ ކިމިކް ހިލޭ ޖެހުމަކުން ނެގި ހުރަހަކުން، ބަޔާންގެ ޑަޔޫ އުޕަމެކާނޯ ވަނީ ލަނޑެއް ޖަހައިފަ އެވެ. އަދި، ތިން މިނިޓް ފަހުން ޑިއާޒް ވަނީ ބަޔާންގެ ހަތަރު ވަނަ ގޯލު ޖަހައި، ފަރަގުކުޑަކޮށްފަ އެވެ. މި ގޯލު ފުރަތަމަ އޮފްސައިޑް ކަމަށް ނިންމި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމީ ރަނގަޅު ގޯލެއް ކަމަށެެވެ.
ޕީއެސްޖީން ވަނީ މެޗުގެ 87 ވަނަ މިނިޓްގައި އިތުރު ގޯލެއް ޖެހުމާ ގާތަށް ޖެހިލައިފަ އެވެ. އެ ގޮތުން، ބަޔާންގެ ޑިފެންސް ފަހަތުން ލިބުނު ބޯޅައެއް ސެނީ މަޔޫލޫ ރަނގަޅަށް ފޮނުވާލިއިރު، އަމާޒުވީ ހުރަސްދަނޑިއަށެވެ.
