މެޑްރިޑް (އޭޕްރީލް 29) - ޔުއެފާ ޗެމްޕިއަންސް ލީގުގެ ސެމީ ފައިނަލުގައި ޖެހިޖެހިގެން ދެ އަހަރު ވާދަކުރުމަކީ ވެސް ހާއްސަ ކަމެއް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
އާސެނަލުން މިދިޔަ އަހަރުގެ ސެމީ ފައިނަލުގައި ޕީއެސްޖީ އަތުން ކެޓިއިރު، މި ފަހަރުގެ ސެމީ ފައިނަލުގައި ކުޅެނީ އެތުލެޓިކޯ މެޑްރިޑާ ދެކޮޅަށެވެ. ފުރަތަމަ ލެގުގައި މިރޭ އެތުލެޓިކޯ ދަނޑުގައި އާސެނަލުން ކުޅޭނެ އެވެ.
މިއީ، ޗެމްޕިއަންސް ލީގުގެ ސެމީ ފައިނަލުގައި އާސެނަލުން ވާދަކުރާ ހަތަރު ވަނަ ފަހަރެވެ. އާސެނަލުން މިދިޔަ އަހަރުގެ ސެމީ ފައިނަލުގައި ކުޅުނީ 2009 ވަނަ އަހަރުގެ ފަހުން ފުރަތަމަ ފަހަރަށެެވެ. ސޯޅަ އަހަރުގެ މެދުކެނޑުމަކަށް ފަހު އެވެ. އޭގެ ކުރިން، އާސެނަލުން 2006 ވަނަ އަހަރުގެ ޗެމްޕިއަންސް ލީގުގެ ފައިނަލަށް ވެސް ދަތުރުކޮށް، ފައިނަލުގައި ބާސެލޯނާ އަތުން ބަލިވީ އެވެ.
މިއީ، އާސެނަލްގެ ތާރީހުގައި ވެސް އެ ޓީމުން ޗެމްޕިއަންސް ލީގު ސެމީ ފައިނަލުގައި ޖެހިޖެހިގެން ދެ އަހަރުގައި ކުޅޭ ފުރަތަމަ ފަަހަރެވެ.
"މިއީ ހާއްސަ ކަމެއް. މިއީ ބޮޑު ކަމެއް، އަހަރެމެންނަށް ޓީމެއްގެ ގޮތުގައި މަސައްކަތް ކުރެވޭތީ މި ކަހަލަ ކަންކަން ހާސިލްކުރެވެނީ. މިއީ ނިންމާލަން ޖެހޭ ހިސާބެއް ނޫން، ކާމިޔާބު ހޯދަން ވެސް އަހަރެމެން ބޭނުން،" އާޓެޓާ ބުންޏެވެ.
އާސެނަލުން މިދިޔަ އަހަރުގެ ޗެމްޕިއަންސް ލީގުގެ ލީގު ބުރުގައި ޕީއެސްޖީ އަތުން މޮޅުވި ނަމަވެސް ސެމީ ފައިނަލުގައި އެ ޓިމު އަތުން ބަލިވެ މުބާރާތުން ކެޓީ އެވެ. މި ފަހަރުގެ ޗެމްޕިއަންސް ލީގުގެ ލީގު ބުރުގައި އާސެނަލުން ވަނީ 4-0 އިން އެތުލެޓިކޯ މެޑްރިޑް ބަލިކޮށްފަ އެވެ. އެތުލެޓިކޯ އިން ކުއާޓާ ފައިނަލުގައި މި ފަހަރު ބާސެލޯނާ ކަޓުވާލާފައިވާތީވެ، އެ ޓީމަށް އާސެނަލް ވެސް ބަލިކުރެވޭނެ ކަމަށް ގިނަ ބަޔަކު އަންނަނީ ބުނަމުންނެވެ.
އާޓެޓާ ބުނީ މިދިޔަ ސީޒަނުގައި، ޕީއެސްޖީއާ ދެކޮޅަށް ލީގު ބުރުގައި ވީ ގޮތާއި ސެމީ ފައިނަލުގައި ދިމާވި ކަންކަމުގެ ވާހަކަ ދެއްކުމަކީ މި ވަގުތު ޓީމަށް ޕޮޒިޓިވް ކަމެއްގެ ގޮތުގައި ނުފެންނަ ކަމެއް ކަމަށެވެ.
"އަހަރެން މި ވަގުތު ހުރިހާ ސަމާލުކަމެއް ދެނީ ޕޮޒިޓިވް ވާހަކަތައް ދައްކައިގެން ކުޅުންތެރިން މޮޓިވޭޓްކުރަން،" އާޓެޓާ ބުންޏެވެ.
ސީޒަނުގައި އާސެނަލަށް ބާކީ އޮތް ދެ މުބާރާތް، ޗެމްޕިއަންސް ލީގާއި ޕްރިމިއާ ލީގުގައި ކާމިޔާބު ހޯދުމަކީ މި ވަގުތު އޮތް އެންމެ ބޮޑު އަމާޒުކަމަށް އާޓެޓާ ވަނީ ބުނެފަ އެވެ.
