ވެލާނާ އިންޓަނޭޝަނަލް އެއާޕޯޓުގެ ޑިއުޓީ ފްރީން ވަގަށް ސިނގިރޭޓު ބޭރުކުރި މައްސަލައިގެ ބަޔާނުގައި، އެ މައްސަލައިގައި ނުހިމެނޭ ސީނިއާ ދެ ފުލުހެއްގެ ނަން ހިމަނަން އެސިސްޓެންޓް ކޮމިޝަނާ އޮފް ޕޮލިސް، އަހުމަދު ޝިފާން އެންގި މައްސަލައެއް ފުލުހުން ބަލަން ފަށައިފި އެވެ.
އަދަދު ނޫހަށް އެނގިފައިވާ ގޮތުގައި އެ މައްސަލަ ބަލަމުން ދަނީ ފުލުހުންގެ މައްސަލަތައް ބަލާ، ޕްރޮފެޝަނަލް ސްޓޭންޑާޑްސް ކޮމާންޑުންނެވެ. އެކަމާ ބެހޭގޮތުން ފުލުހުންގެ ރަސްމީ ކޮމެންޓެއް ހޯދަން ގުޅުމުން، އެއްވެސް ޖަވާބެއް ދީފައެއް ނުވެ އެވެ. ޝިފާންއަކީ ފުލުހުން ރަސްމީ ތަރުޖަމާނެވެ.
ވީއައިއޭގެ ޑިޕާޗާ ހޯލުން ހުއްދަ ނެތި 140 ކާޓަންގެ ސިނގިރޭޓު ބޭރުކުރަން އުޅުނު މައްސަލައެއް ފެންމަތިވީ މިދިޔަ އަހަރުގެ މާޗު 25، ގަ އެވެ. އެ މައްސަލަ ފުލުހުންނަށް ހުށަހެޅީ މޯލްޑިވްސް ކަސްޓަމްސް ސާވިސަސްއިންނެވެ.
މި ނޫހަށް އެނގިފައިވާ ގޮތުގައި ޑިއުޓީ ފްރީން ވަގަށް ސިނގިރޭޓު ބޭރުކުރަން އުޅުނީ ފުލުހެކެވެ. އޭނާ އެ ސިނގިރޭޓުތައް ބޭރުކުރަން މަސައްކަތް ކުރީ ކަޅު ކޮތަޅަކަށް އަޅައިގެން، ޑިއުޓީ ފްރީގައި އުޅޭ މަސައްކަތު މީހުން ލައްވައި ކަމަށް ވެސް މި ނޫހަށް އެނގިފައިވެ އެވެ.
އެއީ ފުލުހަކު ހިމެނޭ މައްސަލައެއް ކަމަށްވާތީ، ޕީއެސްސީން އެ މައްސަލަ އޭރު ތަހުގީގު ކުރި އެވެ. އެ ތަހުގީގު ކުރިއަށްދިޔައިރު، މައްސަލައިގައި ނުހިމެނޭ ދެ ފުލުހެއްގެ ނަން ހިމަނަން ޝިފާން އެދުނީ ސިނގިރޭޓު ބޭރުކުރަން އުޅުނުކަމަށް ތުހުމަތު ކުރެވޭ ފުލުސް މީހާގެ ބަޔާނުގައި ކަމަށް މި ނޫހަށް އެނގިފައިވެ އެވެ.
ނަމަވެސް، ޝިފާން އެދުނު ގޮތަށް، އެ ފުލުސް މީހާގެ ބަޔާނުގައި ސީނިއާ ދެ ފުލުހުންގެ ނަން ލޯޔަރު ނުހިމެނި ކަމަށްވެ އެވެ. އަދި، މައްސަލައިގައި ނުހިމެނޭ ސީނިއާ ދެ ފުލުހުންގެ ނަން، ބަޔާނުގައި ހިމަނަން ޝިފާން އެދުނު ވާހަކަ ޕީއެސްސީއަށް ކިޔައިދިނީ ވެސް އެ ލޯޔަރުކަމަށް މި ނޫހަށް މައުލޫމާތު ދިން ފަރާތްތަކުން ބުންޏެވެ.
ސީނިއާ ދެ ފުލުހަކު ފްރޭމްކުރަން ޝިފާން މަސައްކަތްކުރި މައްސަލައެއް ޕީއެސްސީން ބަލަމުންދާއިރު، ޝިފާންއާ ގުޅޭ ސީރިއަސް އެތައް ތުހުމަތެއް ހިމަނައި ފުލުހުންގެ ސީނިއާ އޮފިސަރުންތަކެއް، ވިސްލްބްލޯވަރުންގެ ގޮތުގައި މިދިޔަ ނޮވެމްބަރުގައި ވަނީ މަޖިލީހަށް ސިޓީއެއް ފޮނުވައިފަ އެވެ.
ޝިފާންގެ މައްޗަށް ކޮށްފައިވާ ތުހުމަތުތަކުގެ ތެރޭގައި މިސްކޮންޑަކްޓުގެ މައްސަލަތަކަކާއި މަގާމުގެ ނުފޫޒު ބޭނުން ކުރުމުގެ މައްސަލަތަކެއް ހިމެނެ އެވެ. ނަމަވެސް އެ މައްސަލަ މިހައިތަނަށް މަޖިލީހުން ބަލައިފައެއް ނުވެ އެވެ.
މިފަހުން ޕޮލިސް ކޮމިޝަނަރުގެ މަގާމަށް ވެސް ކުރިމަތިލެއްވި ޝިފާން ފުލުހުންގެ ތަރުޖަމާނުގެ މަގާމަށް އައްޔަނުކުރީ ފެބްރުއަރީ 18، 2024 ގަ އެވެ. އޭނާއަކީ މީގެ ކުރިން ކުރީގެ ރައީސް، އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ވެސް ފުލުހުންގެ ތަރުޖަމާނުކަން ކުރައްވި ބޭފުޅެކެވެ.
