ރާއްޖޭގެ ފުޓްބޯޅައިގެ އަލިމަސް ޔޫބީލް (75 އަހަރު ފުރުން) ކުލަގަދަކޮށް ފާހަގަ ކުރުމަށް އެކުލަވާލި، "ޑައިމަންޑް ޖޫބިލީ ކޮމިޓީ"ގެ ފަރާތުން ޓާގެޓްކޮށްފައި އޮތީ ރާއްޖޭގެ ގައުމީ ފުޓްބޯޅަ ޓީމަށް ކުޅެފައިވާ ކޮންމެ ކުޅުންތެރިއަކުގެ އަގުވަޒަންކުރުމަށް ކަމަށް ކޮމިޓީގެ ޗެއާމަން، އަލީ ސުޒޭން ވިދާޅުވެއްޖެ އެވެ.
ޑައިމަންޑް ޖޫބިލީ ކޮމިޓީގެ ޗެއާމަނަކަށް ސުޒޭން ހުންނެވިއިރު، ދެން، އެ ކޮމިޓީގައި ހިމެނެނީ، ވައިސް ޗެއާމަަނަކަށް، ނިއު ރޭޑިއަންޓްގެ ޗެއާމަން، އަހުމަދު މުބީން އަދި، މެމްބަރުން ގޮތުގައި ތިބީ، ކްލަބް ވެލެންސިއާގެ ޗެއާމަން، އަބްދުﷲ އަޒްމީންގެ އިތުރުން، ދިއްދޫ ދާއިރާގެ މެމްބަރު އަބްދުލް ލަތީފް މުހައްމަދު އެވެ.
ރޭ އެ ކޮމިޓީން ބޭއްވި ނޫސްވެރިންގެ ބައްދަލުވުމުގައި ސުޒޭން ވިދާޅުވީ، 1979 ވަނަ އަހަރުން ފެށިގެން 2025 ވަނަ އަހަރާ ހަަމައަށް ވޭތުވެދިޔަ، 46 އަހަރުތެރޭ ގައުމީ ޓީމަށް ކުޅުނު ކޮންމެ ކުޅުންތެރިއެއްގެ އަގުވަޒަންކުރުމަކީ ކުރަން ޖެހޭ ކަމެއް ކަމަށެވެ. އަދި، ގައުމީ ޓީމަށް ކުޅުނު ކުޅުންތެރިންގެ ތެރޭގައި އާންމުކޮށް މީހުންނަށް ނޭނގޭ ކުޅުންތެރިޔަކު ވެސް ހުރެދާނެ ކަމަށާއި ނަމަވެސް އެ ހުރިހާ ކުޅުންތެރިން ދެނެގަނެ އެކަން ފާހަގަ ކުރާނެ ކަމަށް ސުޒޭން ވަނީ ވިދާޅުވެފަ އެވެ.
"ގައުމީ ޓީމަށް ކުޅެފަ ހުރި ކުޅުންތެރިޔަކު ނުހުންނާނެ ބާކީ ކުރެވިފަކައެއް މިކަން (ރާއްޖޭގެ ފުޓްބޯޅަ އަށް 75 އަހަރު ފުރުން) ފާހަގަކޮށް ނިމޭއިރަކު އެއް." ސުޒޭން ބުންޏެވެ.
އޭގެ އިތުރުން، މި ހަރަކާތުގެ ތެރެއިން، ގައުމީ ފުޓްބޯޅަ ޓީމުގައި މިހާތަނަށް ކެޕްޓަންކަން ކުރި ހުރިހާ ކެޕްޓަނުންގެ ހިދުމަތް ވެސް އެފްއޭއެމުން އަގުވަޒަން ކުރާނެ ކަމަށް ސުޒޭން ފާހަގަކުރެއްވި އެވެ.
އެފްއޭއެމްގެ އާ ރައީސް އަހުމަދު ތޯރިގު (ޓޮމް)ގެ ލީޑަޝިޕުން، ޑައިމަންޑް ޖުބިލީ ކޮމިޓީ އަށް ދިން ދައުރުގެ މުއްދަތަކީ އެއް އަހަރެވެ.
