މާލެ ސަރަހައްދުގައި ގާއިމްކޮށްފައި ހުރި ފުޓްސަލް ދަނޑުތައް، ސަރުކާރުގެ ބެލުމުގެ ދަށަށް ގެެނެސް، ލިބޭ އާމްދަނީ، ކުޅިވަރު ގާނޫނުގެ ތެރެއިން ވުޖޫދުވާ ސްޕޯޓްސް ފަންޑަށް ނަގާ ގޮތަށް ކަންކަން ރޭވިގެންދާނެ ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ރާފިއު، މި ގޮތަށް ވިދާޅުވީ ރައްޔިތުންގެ މަޖިލީހަށް ހުށަހެޅިފައިވާ ކުޅިވަރު ގާނޫނުގެ އިސްލާހުގައި ހުރި ކަންކަން ދިރާސާ ކުރުމަށް، އިޖުތިމާއީ ކޮމިޓީން ބޭއްވި ބައްދަލުވުމަށް ހާޒިރުވެވަޑައިގެން، މެމްބަރުން ކުރެއްވި ސުވާލަށް ދެއްވި ޖަވާބުގަ އެވެ.
އެ ގޮތުން، ކޮމިޓީ ބައްދަލުވުމުގައި، ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު، މުހައްމަދު މުސްތަފާ ކުރެއްވި ސުވާލުގައި ވިދާޅުވީ، މާލޭގައި ހުރި ފުޓްސަލް ދަނޑުތައް ގްރޫޕްތަކުން ނޫނީ ކްލަބްތަކުން ކޮންޓްރޯލްކޮށް، އެތަންތަނުން މާލީ މަންފާ ހޯދާއިރު، އެ ފަދަ ކަންކަން ފުރަތަަމަ ޑިވިޝަނުގެ ކްލަބްތަކަށް ނެތީ ކީއްވެތޯ އެވެ.
މިނިސްޓަރު ރާފިއު ވިދާޅުވީ، މި ދަނޑުތައް ގްރޫޕްތަކަށް ދެވިފައި ހުރީ، އެއްވެސް އުސޫލެއް ނެތި ކަމަށާއި މި ކަމަކީ، ކުރީ ސަރުކާރުތަކުން މި ސަރުކާރަށް ވާރުވެފައި އޮތް މައްސަލައެއް ކަމަށެވެ.
"އަޅުގަނޑަކަށް ނުފެނޭ ދަނޑުތައް ދިނުމުގައި އެއްވެސް ކަހަލަ ކޮންސިސްޓަންސީއެއް ގެންގުޅެފައި އޮތް ކަމަކަށް. ސިޓީއެއްގެ ޒަރިއްޔާ އިން ނުވަތަ އަންޑަސްޓޭންޑިންއެއްގެ ދަށުން އެބަހުރި ދަނޑުތައް ދޫކޮށްފައި. މިއީ އަޅުގަނޑުމެން ވެސް ކޮންސާންވާ ކަމެއް،" ރާފިއު ވިދާޅުވި އެވެ.
މި ކަންކަން ތަރުތީބު ކުރުމަށް ސަރުކާރުގެ ވިސްނުމަކީ، އެ ދަނޑުތައް މިހާރު ހިންގާ ގްރޫޕްތަކަށް ނޫނީ ކްލަބްތަކަށް ވެސް ބޭނުންކުރެވޭ ގޮތަށް ސިސްޓަމެއްގެ ތެެރެއިން، މި ދަނޑުތައް އާއްމުންނަށް ފަސޭހައިން ލިބޭ ގޮތަށް ހަދައި ހަދައިދިނުމަށެެވެ. އަދި، މި ދަނޑުތަކުން ކުއްޔަށް ލިބޭ ފައިސާ ސަރުކާރުގެ ކުޅިވަރު ފަންޑަށް ލިބޭނެ ނިޒާމެއް އެކުލަވާލުން ކަމަށެވެ.
"މިއީ (ދަނޑުތައް ސަރުކާރަށް ނެގުމަކީ) ހަމަތިބެފައި ކުރެވޭނެ ކަމެއް ނޫން. މިއީ ވަރަށް ގިނަ ދުވަސްވެފައިވާ ކަމެއް،" ރާފިއު ވިދާޅުވި އެވެ.
ކޮމިޓީގައި ހިމެނޭ، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު، އެމްޑީޕީގެ، މުހައްމަދު އިބްރާހިމް (ކުޑޫ) ވިދާޅުވީ، މި ގޮތަށް ސަރުކާރުގެ ބެލުމުގެ ދަށުގައި ހުންނަ ކުޅިވަރުގެ ވަސީލަތްތައް މަރާމާތު ކުރުމާއި ބެލެހެއްޓުމުގެ ކަންކަން ހުންނަނީ އެންމެ ރަނގަޅަށް ނޫން ކަމަށެވެ. އަދި އެ ގޮތުގެ މަތިން ބަލާއިރު، މި ފުޓްސަލް ދަނޑުތައް ބެލެހެއްޓުމުގައި ސަރުކާރުގެ ވިސްނުމަކީ ކޮބައިތޯ، މެމްބަރު، މުހައްމަދު އިބްރާހިމް ސުވާލުކުރެއްވި އެވެ.
މިނިސްޓަރު ރާފިއު ވިދާޅުވީ، ކުޅިވަރު ވަސީލަތްތައް ބެލެހެއްޓުމަށާއި އެ ފަދަ ކަންކަމަށް އަންނަ އަހަރުގެ ބަޖެޓްގައި ވަކިން އެކަމަށް ހާއްސަކޮށް ފައިސާ ހިމަނާފައިވާނެ ކަމަށެވެ. އަދި ފާހަގަކުރެއްވި ފުޓްސަލް ދަނޑުތައް ސަރުކާރުގެ ބެލެހެއްޓުމުގެ ދަށަށް ގެންނަނަމަ، ރޭވުންތެރިކަމާ އެކު، ބަޔަކާ ހަވާލުކޮށްގެން ވިޔަސް އެކަން ކުރެވޭނެ ނިޒާމެއް ގާއިމްކުރާނެ ކަމަށް މިނިސްޓަރު ވިދާޅުވި އެވެ.
