މީގެ އަހަރެއްހާ ދުވަސް ކުރިން، ސަރުކާރުން އިސްވެ، މަސައްކަތް ފެށި، ކުޅިވަރުގެ ދުރުރާސްތާ ޕްލޭނުގެ ތެރެއިން، އެންމެ ބޮޑު އެއް އަމާޒަކީ 2040 ވަނަ އަހަރު ދުނިޔޭގެ އެންމެ ބޮޑު ކުޅިވަރު ހަރަކާތް، އޮލިމްޕިކްސް އިން ރާއްޖެ އަށް ޕޯޑިއަމް ފިނިޝްއެއް ހޯދައި، މެޑަލް ހާސިލްކުރުން ކަމަށް ސްޕޯޓްސް މިނިސްޓަރު އަބްދު ރާފިއު (ރާއްޕެ) ވިދާޅުވެއްޖެ އެވެ.
ސްޓެލްކޯ އޮޑިޓޯރިއަމްގައި އިއްޔެ ފެށި، ރާއްޖޭގެ ކުޅިވަރުގެ 20 އަހަރުގެ ދުރުރާސްތާ ޕްލޭންގެ ޕްރެޒެންޓޭޝަން، "ޕްލޭގްރައުންޑް ޓު ޕޯޑިއަމް"ގައި ވާހަކަ ދައްކަވަމުން މިނިސްޓަރު ރާފިއު ވިދާޅުވީ، މީގެ އަހަރެއްހާ ދުވަސް ކުރިން، މި ޕްލޭނުގެ މަސައްކަތް ފަށައިގެން، ފުރަތަމަ އަހަރުވީއިރު، އެންމެން ގުޅިގެން ރަނގަޅު މަަސައްކަތްތަކެއް ކުރެވިފައިވާ ކަމަށެވެ.
އެ ގޮތުން، މި ޕްލޭނުގެ މަސައްކަތުގެ ބައިވެރިންގެ ގޮތުގައި މޯލްޑިވްސް އޮލިމްޕިކް ކޮމިޓީ، ގައުމީ ކުޅިވަރު ކައުންސިލް، ސަރުކާރުގެ މިނިސްޓްރީތައް އަދި ކުޅިވަރު އެސޯސިއޭޝަންތައް ވެސް ހިމެނޭ ގޮތަށް ކުރި މަސައްކަތުގައި މި ވަގުތު ރާއްޖޭގެ ކުޅިވަރު ސިސްޓަމްގައި ހުރި މައްސަލަތައް ފާހަގަކުރެވުނު ކަމަށް މިނިސްޓަރު ފާހަގަކުރެއްވި އެވެ.
ފާހަގަކުރެވުނު ކަންކަމަށް ބަލައި، އެންމެން އެއް ޓީމެއްގައި، ރަނގަޅު ޓީމްވޯކެއްގައި، ރާއްޖޭގެ ކުޅިވަރުގެ މުސްތަގުބަލަށްޓަކައި މިދިޔަ އަހަރެއްހާ ދުވަހު ވެސް ރަނގަޅު މަސައްކަތެއް ކުރެވުނު ކަމަށް މިނިސްޓަރު ވިދާޅުވި އެވެ.
"ލިބުނު މައުލޫމާތުގެ އަލީގައި، ސްވޮޓް އެނަލައިސިސްއެއް ހެދިގެން ދިޔަ އަހަރެމެންގެ ކޮންސަލްޓަންޓުންނާ ގުޅިގެން. އަހަރެމެން ޕްލޭން މި ހެދީ 2040 ގެ އޮލިމްޕިކް ގައި ޕޯޑިއަމް ފިނިޝް އަކަށް ދާން. އެނގޭ މިއީ، ވަރަށް އުންމީދީ ޕްރޮޖެކްޓެއްކަން، އަހަރެމެން މި ދަތުރު ފަށަން މި ވަނީ ތައްޔާރު، ބޭބީ ސްޓެޕްސް ފުރަތަމަ މި ނެގެނީ، އެކަމަކު އުންމީދަކީ ވަރަށް ހަލުވި ދުވެއްޔެއްގައި، މި ދަތުރުން ކުރިއަށްދާން." ރާފިއު ވިދާޅުވި އެވެ.
އެމެރިކާގެ، އިންޓަނޭޝަނަލް ކޯޗިން އެންރިޗްމަންޓް ސެޓިފިކެޓް ޕްރޮގްރާމް (އައިސީއީސީޕީ)ގެ އެހީތެރިކަމާ އެކު، މި ހެދި ދުރުރާސްތާ ޕްލޭނުގައިވާ ގޮތުން، އެތުލީޓުންނަށް ރަނގަޅު ފެންވަރުގެ ތަމްރީން ދެމެހެއްޓެނިވި ގޮތެއްގައި ދިނުމުގެ ނިޒާމެއް ކަނޑައަޅާ ގޮތަށް ހިމަނާފައިވެ އެެވެ. އަދި ވީހާ ވެސް އަވަހަށް އެކި ކުޅިވަރުގެ ހުނަރުވެރި ކުދިން ހޯދައި، ރަނގަޅު ތަމްރީންތައް ދީ އެ ކުދިން ކުރިއެރުވުން ހިމަނާފައިވެ އެވެ. މީގެ ދުރު ވިސްނުމަކީ، ބައިނަލްއަގުވާމީ ބޮޑެތި ގޭމްސްތަކުން ރާއްޖެ އަށް މެޑަލް ހޯދޭނެ ވަރަށް ދުރާލާ އެތުލީޓުން ޑިވެލޮޕްކުރުމެވެ. އެ ގޮތުން، ޕްލޭނުގައި ކާމިޔާބު ހޯދުމުގެ ޓާގެޓެއްގެ ގޮތުން ހިމަނާފައިވަނީ، 2030 އާއި 2034 ގެ އޭޝިއަން ގޭމްސްގައި މެޑަލެއް ހޯދުމާއި 2036 އާއި 2040ގެ އޮލިމްޕިކްސް އިން ރާއްޖެ އަށް މެޑަލެއް ގެނެވޭތޯ އެ އަޒުމުގައި މަސައްކަތް ކުރުމެވެ.
ރާފިއު ވިދާޅުވީ، މި ދުރުރާސްތާ ޕްލޭނަށް ބާރު ލިބޭނެ އެކިއެކި މަސައްކަތް މިހާރު ވެސް ފެށި އަނެއް ބައި މަސައްކަތް ކުރިއަށްދަމުން އަންނަ ކަމަށެވެ. އެ ގޮތުން، ގައުމީ ކުޅިވަރު ފަންޑެއް ވުޖޫދުކުރުމުގެ މަސައްކަތާއި ހަށިހެޔޮ ޕްރޮގްރާމެއް ފެށިފައިވާ ކަމަށް ރާފިއު ވިދާޅުވި އެވެ.
ކުޅިވަރުގެ ދުރު ރާސްތާ ޕްލޭނަކީ، ރައީސް ޑރ، މުހައްމަދު މުއިއްޒުގެ ސަރުކާރުގެ "ހަފްތާ 14" ތެރޭގައި ކުރަން ފަށަން ރިޔާސީ ވައުދެއްގެ ގޮތުގައި ހިމެނި ކަމެއްގެ ގޮތުގައި ފާހަގަކުރައްވައި، ރާފިއު ވިދާޅުވީ، މި ޕްލޭނަށް ބޭނުންވާ މުހިންމު ކަންކަން މި ވަގުތު ރައްޔިތުންގެ މަޖިލީހުގައި އޮތް ކުޅިވަރު ގާނޫނުގެ އިސްލާހުގެ ތެރެއިން ވެސް ފުރިހަަމަ ވެގެންދާނެ ކަމަށެވެ.
