ރިވައިވަލް ސްޕޯޓްސް ކްލަބުން ރާއްޖޭގެ ގައުމީ ބެޑްމިންޓަން ޓީމުގެ ކުޅުންތެރިން ހިމެނޭ ގޮތަށް، ގައުމު ތަމްސީލްކޮށް، ދުނިޔޭގެ ޖަމިއްޔާ އަކުން ބަލައިގެންފައިވާ ދެ މުބާރާތަކުން ހޯދައިިދިން ރަން ކާމިޔާބަށް، ރައީސުލްޖުމްހޫރިއްޔާ، ޑރ. މުހައްމަދު މުއިއްޒު އާއި ނައިބު ރައީސް، ހުސެއިން މުހައްމަދު ލަތީފް (ސެމްބެ) ވަނީ ސޯޝަލް މީޑިއާގައި، މުހިންމު އަދި ބޮޑު ކަމެއްގެ ގޮތުގައި ފާހަގަކުރައްވައި، މަރުހަބާ ދަންނަވައިފަ އެވެ.
ޒެމްބިއާ މުބާރާތާއި ބޮޓްސްވާނާ މުބާރާތުން ޖުމްލަ އެކު، ރިވައިވަލް އިން ވަނީ ރާއްޖެ އަށް އަށް މެޑަލް ހޯދައިފަ އެވެ. ޒެމްބިއާ މުބާރާތުން އަންހެން ޑަބަލްސް އިން ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ)ގެ ޕެއާ އިން ރަން މެޑަލް ހޯދިއިރު، މިކްސް ޑަބަލްސް އިން ޒަޔާން ޒަކީ އާއި ނަބާގެ ޕެއާ އިން ލޯ މެޑަލް އަދި އަންހެން ސިންގަލްސް އިން ނަބާ ވަނީ ލޯ މެޑަލް ހޯދައިފަ އެވެ.
ބޮޓްސްވާނާ މުބާރާތުގެ އަންހެން ސިންގަލްސް އިން ނަބާގެ ރަން މެޑަލާއި ނަބީގެ ރިހި މެޑަލްގެ އިތުރުން، މިކްސް ޑަބަލްސް އިން ޒަޔާން އާއި ނަބާގެ ރިހި މެޑަލާއި ފިރިހެން ޑަބަލްސް އިން ޒަޔާން ޒަކީ އާއި ނިބާލް އަހުމަދުގެ ޕެއާގެ ލޯ މެޑަލްގެ އިތުރުުން އަންހެން ޑަބަލްސްގައި ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ)ގެ ޕެއާ އިން ހޯދި ލޯ މެޑަލް އެވެ.
މީގެ ތެރެއިން، ބޮޓްސްވާނާ މުބާރާތުގައި ހޯދި ސިންގަލްސް ރަން މެޑަލާއި ސިންގަލްސް ރިހި މެޑަލަކީ، ދުނިޔޭގެ ބެޑްމިންޓަން ފެޑެރޭޝަން، ބީޑަބްލިއުއެފް ރުހުން ދީފައިވާ މި ލެވަލްގެ މުބާރާތަކުން ރާއްޖެ އަށް ލިބުނު ސިންގަލްސް އިވެންޓްގެ ފުރަތަމަ މެޑަލްތަކެވެ.
ގައުމަށް ހޯދައިދިން ތާރީހީ ކާމިޔާބީ، ދައުލަތުގެ އެންމެ އިސް ވެރިން (ރައީސް އާއި ނައިބު ރައީސް) އަމިއްލަފުޅު ސޯޝަލް މީޑިއާގައި އެ ގޮތަށް ފާހަަގަކުރުމަކީ، މި ކާމިޔާބީ ލިބުނު ގައުމީ ތަރިންނަށް ލިބުނު ބޮޑު ފަހުރެކެވެ. ކުޅުންތެރިން އަމިއްލަ ސޯޝަލް މީޑިއާގައި، އަދި ރައީސް އާއި ނައިބު ރައީސްގެ އެ ޕޯސްޓަށް ކޮމެންޓްކޮށް، ޝުކުރު ވެސް އަދާކޮށްފައިވެ އެވެ.
އެކަމަކު، އެތައް ހާސް މޭލެއް ދުރުގައި އޮތް ދެ ގައުމެއްގައި، ކުރިއަށްދިޔަ ދުނިޔޭގެ ބެޑްމިންޓަން ފެޑެރޭޝަން، ބީޑަބްލިއުއެފް އިން ރުހުން ދީފައިވާ ދެ މުބާރާތުން ރާއްޖެ އަށް ހޯދައިދިން އަށް މެޑަލާ އެކު، ރިވައިވަލް ކުޅުންތެރިން، މީގެ އެއް ދުވަސް ކުރިން، އެނބުރި ގައުމަށް، އުފަން ފަސްގަނޑަށް އައުމުން، ލިބުނީ "ފިނި ތަރުހީބެ" ކެވެ. ހާސިލްކުރި ބޮޑު ކާމިޔާބާ ގާތަށް ވެސް ގައުމުން އަގުވަޒަންކުރިކަމުގެ އަމަލެއް ނުފެނެ އެވެ.
ކުޅުންތެރިންނަށް މަރުހަބާ ކިޔުމަށް ދިޔައީ، ރިވައިވަލްގެ މެނޭޖްމަންޓާއި ކުޅުންތެރިންގެ އާއިލާ އިންނެވެ.
މި ސަރުކާރު އައި ފަހުން، ގައުމީ ޓީމުތަކުންނާއި ރާއްޖެ ތަމްސީލް ކުރާ ކުޅުންތެރިންނާއި ފަރާތްތަކުގެ ކާމިޔާބީ ފާހަގަކޮށް، ވެލާނާ އިންޓަނޭޝަނަލް އެއާޕޯޓްގެ ވީއައިޕީން މަރުހަބާ ކިޔުމުގެ ކަންކަން، ސްޕޯޓްސް މިނިސްޓްރީން އައީ ކުރިއަށް ގެންދަމުންނެވެ. ނުހަނު ފޯރީގަ އެވެ. ގައުމީ ޓީމުތަކުގެ އިތުރުން ވެޓަރަންސް ޓީމުތަކަށް ވެސް ހަމަ "ވީއައިޕީ" މަރުހަބާ ކިޔާފައިވެ އެވެ. މީޑިއާތަކަށް ވެސް މަންޒަރުތައް ކަވަރުކުރަން ވަރަށް ފަހި ފުރުސަތެއް އޮންނަ ގޮތަށެވެ.
އެކަމަކު، ގައުމު ތަމްސީލްކޮށް، ޝަރަފްވެރި އަދި ތާރީހީ މެޑަލްތައް ހިފައިގެން އައި، ބެޑްމިންޓަން އެތުލީޓުންނަށް "ރަސްމީ މަރުހަބާ" އެއް ކިޔުމަށް ސަލާމްކޮށްލަން އަންނާނެ އިސް ފަރާތެއް ވެސް އެ ދުވަަހު ނުވި އެވެ.
ރިވައިވަލް ސްޕޯޓްސް އިން ކުޅުންތެރިންގެ ޒިންމާ ނަގައިގެން، ބައިނަލްއަގުވާމީ މުބާރާތްތަކުގައި ވާދަކުރަނީ، ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އެހީގައި އެންޓްރީ ހަދައި، ރާއްޖޭގެ ކުޅުންތެރިންގެ ގޮތުގަ އެވެ. ތަމްސީލްކުރަނީ، 100 ޕަސެންޓް ގައުމުގެ ނަމެވެ. އެހެންކަމުން، މިއީ، ކްލަބެއް ތަމްސީލްކުރުމެކޭ ބުނެ، ފަރުޖައްސާލެވޭނެ ކަމެއްގެ ގޮތުގައި ދެކެވޭކަށް ނެތެވެ.
އަމުދުން، ރާއްޖޭގެ ބެޑްމިންޓަން އެސޯސިއޭޝަންގެ ކޮންޓްރޯލް މި ވަގުތު ނަގައިގެން ތިބި، ހިންގާ ކޮމީޓީ އަކީ ސަރުކާރުގެ އެންގުންތަކަށް ބޯނުލަނބާ ފަރާތްތަކެއްގެ ގޮތުގައި ސާފުކޮށް ފެންނަން އޮތްއިރު، އެ އެސޯސިއޭޝަނުން ޖަވާބެއް ލިބެންދެން، ކުޅުންތެރިންނާ ގުޅޭ މި ފަދަ މުހިންމު ހާއްސަ ކަމެއް ނުކޮށް، ސްޕޯޓްސް މިނިސްޓްރީން ހުންނަން ޖެހޭ ސަބަބެއް ނެތެވެ.
ކުޅުންތެރިންގެ އާއިލާ އާއި އެ ތަނަށް ދިޔަ ގާތް މީހުންގެ އުދާސްތައް ބަންޑުންކޮށްލީ، މިއީ ރަސްމީ އިދާރާތަކުން ކުޅިވަރުގެ ތަފާތުކުރުން ގެންގުޅެނީތޯ އެވެ. ނޫނީ ބައެއްގެ އިހުމާލަކުންވެފައި އޮތް ކަމެއްތޯ އެވެ.
ބެޑްމިންޓަން ކުޅުންތެރިންނަށް މަރުހަަބާ ކިޔުމުގައި ސްޕޯޓްސް މިނިސްޓްރީގެ އެއްވެސް ހަރަކާތެއް ނެތުމާ ގުޅިގެން، ސްޕޯޓްސް މިނިސްޓްރީގެ ޖަވާބަކަށް މިނިސްޓްރީގެ ވަޓްސްއެޕް ގްރޫޕްގައި، "އަދަދު" އިން ހިމެނޭ ގޮތަށް ނޫސްވެރިން ތަކުރާރުކޮށް ސުވާލުކުރުމުން އޭގެއިން އެއްވެސް މެސެޖަކަށް މިނިސްޓްރީގެ ޖަވާބެއް ނެތެވެ. ފަހަރުގައި މި ހަބަރާ ގުޅިގެން ޖަވާބެއް ލިބުމަކީ ވެސް މި ކާމިޔާބީ ހޯދި އެތުލީޓުންނަށް ލިބޭނެ ހިތްހަަމަޖެހުމަކަށްވާނެ އެވެ.
ބޮޓްސްވާނާ އާއި ޒެމްބިއާ މުބާރާތުގައި ވާދަކުރި ހަތަރު ކުޅުންތެރިން ކަމަށްވާ، ޒަޔާން، ނިބާލް، ނަބާ އަދި ނަބީ އަކީ، ސަރުކާރުން ކުރިއަށްގެންދާ "އަރުތަ" ސްކޮލަޝިޕް ވެސް ލިބިފައިވާ އެތުލީޓުންނެވެ. މި އެތުލީޓުންގެ ކެރިއަަރު ބިނާކުރަން ނޫނީ ކާމިޔާބީ ހޯދުމުގެ މަގުގައި ކުރިއަށްދާން ދައުލަތުން ހަރަދުކުރެ އެވެ. އެކަމަކު، ކާމިޔާބީ ހޯދައިގެން އައުމުން، "ތަފާތުކުރުން ގެންގުޅޭ" ކަމަށް ބެލެވޭ އުސޫލުން ކަންކަން ހަމަޖެހިފައި ހުރުމަކީ މީގެ ސަބަބުން ކުޅުންތެރިންނަށް ވެސް އޭގެ އަސަރުކުރާނެ ކަމެކެވެ.
ޔަގީނުން ވެސް، މެޑަލްތައް ހިފައިގެން އައި އެތުލީޓުންނަށް ފެނުނީ ކުޅިވަރުގައި ރާއްޖެ އަށް ޝަރަފްވެރި ކާމިޔާބީ ހޯދައިގެން އަންނަ އެތުލީޓުންގެ އަގުވަޒަންކުރަންޖެހޭ މިންވަރާ މުޅިންހެން ނުބައްދަލު ދެރަ މަންޒަރެކެވެ.
