ގައުމީ ހޭންޑްބޯލް މުބާރާުތުގެ އަންހެން ޑިވިޝަންގެ ޗެމްޕިއަންކަން، ރެޑްހޯކްސް އިން ހޯދިއިރު، ފިިރިހެން ޑިވިޝަންގެ ތަށި ޖީބީ ސްޕޯޓްސް ކްލަބުން އުފުލާލައިފި އެވެ.
އެންމެ ފަހުން ދެ ފަހަރުގެ ޗެމްޕިއަން، އޮރިކްސް އިން އަންހެން ޑިވިޝަނުގެ ތަށި މިލްކުކުރަން ނުކުމެ، ފައިނަލް މެޗުގައި ރެޑްހޯކްސް އަތުން ބަލިވީ 24-29 އިންނެވެ.
ތިން ޓީމު ވާދަކުރި އަންހެން ޑިވިޝަނުގެ ލީގު ބުރުގައި، އޮރިކްސް އާއި ރެޑްހޯކްސް އިން ދެ ފަހަރު ބައްދަލުކުރިއިރު، އެއް މެޗުން މޮޅުވީ އޮރިކްސް އެވެ. އަނެއް މެޗުން ރެޑްހޯކްސް ކާމިޔާބު ހޯދި އެވެ.
ފައިނަލް މެޗުގެ މޮޅު ކުޅުންތެރިއަކީ، ރެޑްހޯކްސްގެ ފާތިމަތު ޖުނާ އެވެ.
އަންހެން ޑިވިޝަންގެ އެންމެ މޮޅު ހަތް ކުޅުންތެރިންނަކީ، އޮރިކްސްގެ މަރިޔަމް ލީން، ރަފާހާ އިބްރާހިމް، ޒުލެއިހާ އިބްރާހިމް، ފާތިމަތު އަރްފާ، ޒުހާ ހުސެއިން، ރެޑްހޯކްސްގެ ޖުނާ އަދި އެސްޖީސީގެ ރިޒްނާ މުހައްމަދު އެވެ.
ޗެމްޕިއަންކަން ހޯދި ޖީބީ ޓީމުގެ ކުޅުންތެރިން ތަށްޓާ އެކު އުފާފާޅުކުރަނީ.--- ފޮޓޯ: ގާފު ސްޕޯޓްސް
ފިރިހެން ޑިވިޝަނުގެ ތަށި، ފިއުޗާ ސްޕޯޓްސް ކްލަބް އަތުން 35-34 އިން މޮޅުވެ، ޖީބީ ސްޕޯޓްސް ކްލަބުން ހޯދިއިރު، މި މެޗުގައި ފޯރިގަދަ ކުޅުމެއް ވަނީ ފެނިގެންގޮސްފަ އެވެ. ޖީބީ ސްޕޯޓްސް ކްލަބްގެ އަބްދުﷲ ނާޖީ އެވެ.
ފިރިހެން ޑިވިޝަނުގެ މޮޅު ހަތް ކުޅުންތެރިންނަކީ ސިފައިންގެ ކްލަބްގެ މުސްތަފާ މުހައްމަދު، ޖީބީގެ އަބްދުﷲ ޒަހުވާން، މުހައްމަދު ފިރުނާޝް، އަހުމަދު އިނާޝް އަދި ނާޖީގެ އިތުރުން، ފިއުޗާ ސްޕޯޓްސް ކްލަބްގެ ރާއިދު ރަޝީދު އާއި މުހައްމަދު ޔަޝްމު އެވެ.
ޖީބީ އާއި ފިއުޗާ އިން ލީގު ބުރުގައި މި ދެ ޓީމުން ދެ ފަހަރު ބައްދަލުކުރި އެެވެ. އެއް މެޗުން ޖީބީ މޮޅުވިއިރު، އަނެއް މެޗުން ކުރިހޯދީ ފިއުޗާ ސްޕޯޓްސް ކްލަބް އެވެ.
މިދިޔަ އަހަރުގެ މުބާރާތުގައި ފިރިހެން ޑިވިޝަނުގެ ޗެމްޕިއަންކަން ހޯދީ ވެލިދޫ ޔުނައިޓެޑް އެވެ. އެއީ ފައިނަލުގައި، ޒެފްރޯލް ބަލިކުރުމަށް ފަހު އެވެ.
