ދާދި ފަހުން ނިމިގެންދިޔަ، ޒެމްބިއާ އިންޓަނޭޝަނަލް 2024، ބެޑްމިންޓަން މުބާާރާތުގައި ވާދަކޮށް، ރާއްޖޭގެ ރިވައިވަލް ސްޕޯޓްސް ކްލަބުން ހޯދި ތިން މެޑަލްގައި ވެސް، ގައުމީ ބެޑްމިންޓަން ޓީމުގެ ފާތިމަތު ނަބާހާ (ނަބާ)ގެ ބައިވެރިވުން އޮތްއިރު، އޭނާ ވެފައި މި ވަނީ ރާއްޖޭގެ ތާރީހުގައި ވެސް ދުނިޔޭގެ ބެޑްމިންޓަން ޖަމިއްޔާ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރުހުން ދީފައިވާ އެއް މުބާރާތެއްގައި ތިން މެޑަލް ހޯދި ފުރަތަމަ ދިވެހި އެތުލީޓަށެވެ.
ބެޑްމިންޓަންގައި ވިދަމުން އަންނަ ރާއްޖޭގެ ދެބެން، ނަބާ އާއި އައިމިނަތު ނަބީހާ (ނަބީ) ވަނީ، ޒެމްބިއާ އިންޓަނޭޝަަނަލްގެ އަންހެން ޑަބަލްސް އިން ރަން މެޑަލް ހޯދައިފަ އެވެ. އަދި މިކްސް ޑަބަލްސް އިން ނަބާ ވަނީ ޒަޔާން ޒަކީއާ އެއް ޕެއާއެއްގައި ކުޅެގެން ލޯ މެޑަލް ހޯދައިފަ އެވެ. އަދި އަންހެން ސިންގަލްސްގައި، ނަބާ ވަނީ ލޯ މެޑަލް ހޯދައިފަ އެވެ.
މިއީ، 2019 ވަނަ އަހަރުގެ ފަހުން، ބެޑްމިންޓަން ދުނިޔޭގެ ޖަމިއްޔާ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) ލެވަލްގެ މުބާރާތަކުން ރާއްޖޭން ހޯދި ތިން ވަނަ ރަން މެޑަލް އެެވެ. އެ ފަހަރު ރަން މެޑަލް ހޯދީ މިކްސް ޑަބަލްސް އިން ޒަޔާން ޒަކީ އާއި ނަބާގެ ޕެއާ އާއި އަންހެން ޑަބަލްސް އިން ނަބާ އާއި ނަބީގެ ޕެއާ އެެވެ. އެހެންކަމުން، ނަބާ އާއި ނަބީގެ ޕެއާ މި ވަނީ، ބީޑަބްލިއުއެފް ދެ މުބާރާތުން ރަން މެޑަލް ހޯދައިފަ އެވެ.
ނަބާ އާއި ނަބީ ވަނީ މިދިޔަ އަހަރު ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ އަންހެން ޑަބަލްސް އިން ވެސް ރަން މެޑަލް ހޯދައިފަ އެވެ. ޒެމްބިއާގެ މުބާރާތުގެ މި ކާމިޔާބީއާ އެކު، މިހާތަނަށް، ނަބާ އާއި ނަބީގެ ޕެއާ އިން ވަނީ އިންޓަނޭޝަނަލް މުބާރާތްތަކުގެ ޑަބަލްސް އިވެންޓުން، ތިން ރަން މެޑަލާއި، ތިން ރިހި މެޑަލް އަދި ފަސް ލޯ މެޑަލް ހޯދައިފަ އެވެ.
ގައުމީ ބެޑްމިންޓަން ޓީމުގެ ހަރަކާތްތައް މި ވަގުތު މަޑުޖެހިފައި އޮތްއިރު، ރިވައިވަލް ސްޕޯޓްސްއާ ގުޅިގެން މުބާރާތްތަކުގައި ވާދަކުރަމުން އަންނަ ނަބާ، "އަދަދު ސްޕޯޓްސް" އަށް ދިން އިންޓަވިއުއެއްގައި ބުނެފައިވަނީ، މުބާރާތަށް ދިޔައިރު ވެސް ގައުމަށް ރީތި ނަން ހޯދައިދީ ރަން މެޑަލް ހޯދުމަކީ އަމާޒެއް ކަމަށެވެ.
"އަސްލު ޓާގެޓް ކުރި ރިޒަލްޓެއް ނޫން ލިބުނީ، އުންމީދުކޮށްގެން އައީ ތިން އިވެންޓްގެ ވެސް ފައިނަލުގައި ކުޅެ ރަން މެޑަލް ހޯދަން،" ނަބާ ބުންޏެވެ.
"އެކަމަކު ވެސް، ވަރަށް އުފާވެއްޖެ، އަންހެން ޑަބަލްސް އިން ރަން މެޑަލް ލިބުނީމަ. ބީޑަބްލިއުއެފް ސެންކްޝަން މުބާރާތަކުން ފަސް އަހަރު ފަހުން އަނެއްކާ ވެސް ރަން މެޑަލެއް މި ލިބުނީ، އެންމެ ފުރަތަމަ ޕާކިސްތާންގައި ލިބުނު ފަހުން. ވަރަށް އުފާވޭ ވާދަކުރި ތިން އިވެންޓުން ވެސް މެޑަލް ލިބުނީމަ،"
ނަބާ އާއި ނަބީގެ އިތުރުން ރިވައިވަލް ކުޅުންތެރިންނަށް ދެން ކުރިއަށް އޮތީ، މި މަހު 21-24 އަށް އޮތް ބޮޓްސްވާނާ އިންޓަނޭޝަނަލް އެވެ. މިއީ ވެސް ރިވައިވަލް އިން މެޑަލްތަކަކަށް ޓާގެޓްކުރާ މުބާރާތެކެވެ.
