އައްޑޫ ސިޓީ ކެނަރީފް ރިސޯޓުގައި މިހާރު ކުރިއަށްދާ ދުނިޔޭގެ 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕްގައި ވެސް ރަން މެޑަލް ހޯދައި، ރާއްޖޭގެ އަޒްނީން ރަޝާދު، އޭނާގެ ކާމިޔާބީ އެހެން ހަރުފަތަކަށް ގެންގޮސްފި އެވެ.
މޯލްޑިވްސް ސްޕޯޓްސް އެވޯޑްސްގެ އެންމެ މޮޅު އެތުލީޓަކަށް މީގެ ކުރިން ހޮވިފައިވާ އަޒްނީން މި ވަނީ އޭނާގެ ހާއްސަ އިވެންޓް ކަމަށްވާ، ސްޕޯޓްސް ފިޒީކްގެ 170 ސެންޓިމީޓަރު ކެޓަގަރީން، ދެކުނު އޭޝިއާ އާއި އޭޝިއާ އަދި ދުނިޔޭގެ މުބާރާތުގައި ވެސް ޖެހިޖެހިގެން ތިން ފަހަރު ރަން މެޑަލް ހޯދައިފަ އެވެ.
އެ ގޮތުން، ދެކުނު ކޮރެއާގެ ވޮންޖޫ ސިޓީގައި މިދިޔަ އަހަރު ބޭއްވި ދުނިޔޭގެ މުބާރާތުގައި ރަން މެޑަލް ދިފާއުކުރި، އަޒްނީން މި ވަނީ، އަމިއްލަ ގައުމުގައި ހޯސްޓްކުރާ މި ފަހަރުގެ ވޯލްޑް ޗެމްޕިއަންޝިޕްގައި ތިން ވަނަ ފަހަރަށް އެ އިވެންޓް ކާމިޔާބުކޮށްފަ އެވެ.
ނިވައިކަން ކުޑަހެދުމުގައި މީހުން ހަރަކާތްތެރިވާތީ، ކެނަރީފް ރިސޯޓްގައި ކުރިއަށްދާ މި ފަހަރުގެ ވޯލްޑް ބޮޑީބިލްޑިން މުބާރާތަށް ގިނަ ބަޔެއްގެ ފާޑުކިޔުން އަމާޒުވުމާ ގުޅިގެން، ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް) އިން ވަނީ ދިވެހި ރައްޔިތުންގެ ކިބައިން މައާފަށް އެދި، މި ފަހަރުގެ މުބާރާތް ބާއްވަން ދިމާވި ސަބަބު އޮޅުންފިލުވައިދޭން ބަޔާނެއް ނެރެފަ އެވެ.
އަޒްނީން ވަނީ އޭނާގެ ސަޕޯޓަރުންނަށް ސޯޝަލް މީޑިއާގައި މެސެޖެއް ހިއްސާކޮށްފަ އެވެ.
"ލޯބިވާ ސަޕޯޓަރުންނޭ. ގައުމަށް ރަން މެޑަލް ހޯދައިދީފައިވާ މި ދާއިރާ އިން ކުރިއަށްދިއުމަށް އަދި ރާއްޖެ އަށް އަބަދުވެސް ރީތިނަން ހޯދައިދިނުމަށް މަސައްކަތް ކުރަމުންދާ އެތުލީޓެއްގެ ހައިސިއްޔަތުން ބައިނަލްއަގުވާމީ ލެވަލްގައި ވާދަކުރުމަކީ ވަކި ފަރުދަކަށް އެސޯސިއޭޝަނެއް ނުލައި ކުރެވޭނެ ކަމެއް ނޫން ކަމަށް ވުމާ އެކު، އަޅުގަނޑުމެންގެ އެސޯސިއޭޝަން ބޮޑީބިލްޑިން ޓޯނަމެންޓް ބޭއްވި މަގުސަދު ފުށޫއަރާގޮތަށް ސިޔާސީ ބޭނުމެއްގައި މިކަން ނުކުރެއްވުމަށް ނިހާޔަތަށް އެދެމެވެ." އަޒްނީން ފޭސްބުކްގައި ލިޔެފައިވެ އެވެ.
އަޒްނީން މި ފަހަރުގެ ވޯލްޑް ޗެމްޕިއަންޝިޕްގައި ރަން މެޑަލް ހިފައިގެން.--
ބޮޑީބިލްޑިންގެ ހާއްސަ ކެޓަގަރީއެއްގެ ގޮތުގައި ކުރިއަށްދާ 55 ކިލޯގެ އިވެންޓުގައި ވާދަކޮށް، ގައުމީ ބޮޑީބިލްޑިން ޓީމުގެ ޝާހީން އިބްރާހިމް ދީދީ ވަނީ ރަން މެޑަލް ހޯދައި، ތާރީހީ ކާމިޔާބެއް ހާސިލްކޮށްފަ އެވެ. މިއީ، ބޮޑީބިލްޑިންގެ 55 ކިލޯގެ ކެޓަގަރީގައި ރާއްޖޭގެ އެތުލީޓެއް ހޯދި އެންމެ ފުރިހަމަ ކާމިޔާބެވެ.
ބޮޑީބިލްޑިންގެ ސުޕަ ކެޓަގަރީގައި ހިމެނޭ 75 ކިލޯގެ ބައިގައި ވާދަކުރި، ރާއްޖޭގެ ޖޫނިއާ އޯޕަން ޗެމްޕިއަން ކަމަށްވާ ޔޫސުފް އަޔާން ރިޒްވީ ވަނީ، މި ފަަހަރުގެ ވޯލްޑް ޗެމްޕިއަންޝިޕްގައި ރިހި މެޑަލް ހާސިލްކޮށްފަ އެވެ.
