މި އަހަރުގެ ދުނިޔޭގެ ބޮޑީބިލްޑިން މުބާރާތް، 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް، އައްޑޫ ސިޓީ ކެނަރީފް ރިސޯޓްގައި ބާއްވަން ނިންމާފައިވާ ކަމަށް އިއުލާނުކޮށްފި އެވެ.
މިދިޔަ އަހަރުގެ އޮކްޓޫބަރު މަހު، ވޯލްޑް ބޮޑީބިލްޑިން ފެޑެރޭޝަންގެ ރައީސް ދާތުކް ޕޯލް ޗުއާ އިއުލާނުުކުރެއްވި މި އަހަރުގެ މުބާރާތް ރާއްޖޭގައި ބާއްވަން އިއުލާނުކޮށްފައިވާ ކަމަށެވެ. އެ ގޮތުން، މި އަހަރުގެ ނޮވެމްބަރު މަހު 5-11 އަށް ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕްގެ އިތުރުން، އިލެކްޓޯރަލް ކޮންގްރެސް ވެސް ކުރިއަށްދާނެ އެވެ.
ދެކުނު އޭޝިއާގެ ބޮޑީބިލްޑިން މުބާރާތް ވެސް މިދިޔަ އަހަރާއި މި އަހަރު ރާއްޖޭގައި ވަނީ ހޯސްޓްކޮށްފަ އެވެ. މީގެ ކުރިން، 2022 ވަނަ އަހަރު ކ. މާފުށީގައި ވަނީ އޭޝިއާގެ ބޮޑީބިލްޑިން މުބާރާތް ވެސް ބާއްވައިފަ އެެވެ. އަދި 2001 ވަނަ އަހަރު ދެކުނު އޭޝިއާގެ ބޮޑީބިލްޑިން މުބާރާތް ބަނޑޮހުގައި ބޭއްވި އެވެ.
ދުނިޔޭގެ ފެޑެރޭޝަން ރައީސް ޕޯލް ޗުއާ ވިދާޅުވީ، ދުނިޔޭގެ މުބާރާތް ބޭއްވުމުގެ ފުރުސަތު ރާއްޖެ އަށް ދިނީ، 2022، 2023 ވަނަ އަހަރު ދެކުނު އޭޝިއާ ބޮޑީބިލްޑިން މުބާރާތާއި 2022 ވަނަ އަހަރު އޭޝިއާގެ ބޮޑީބިލްޑިން މުބާރާތް ރާއްޖޭގައި ހޯސްޓްކޮށްފައިވަނީ ފުރިހަމަކޮށް ކަމަށްވާތީ ކަމަށެވެ.
ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް)ގެ ރައީސް، އިބްރާހިމް ހަމީދު (އިއްބެ) ވިދާޅުވީ، ދުނިޔޭގެ މުބާރާތް ރާއްޖޭގައި ބޭއްވުމުގެ ފުރުސަތު ލިބިގެންދިޔައީ ސަރުކާރުގެ އެއްބާރުލުމާ އެކުގައި ކަމަށެވެ. އަދި މުބާރާތުގައި ބައިރިވެރިވާ ގައުމުތަކުގެ އެތުލީޓުންނާއި އޮފިޝަލުން ބޮޑީބިލްޑިން ފެޑެރޭޝަނުގެ ގަވާއިދާއި ރާއްޖޭގެ ގާނޫނާއި ގަވާއިދަށް އިހުތިރާމް ކުރުމަށް އެދޭ ކަމަށް އިއްބެ ވިދާޅުވި އެވެ.
އިންޑޮނޭޝިއާގެ ބަތަމްގައި މިހާރު ކުރިއަށްދާ އޭޝިއާގެ ބޮޑީބިލްޑިން މުބާރާތުން ރާއްޖޭގެ ގައުމީ އެތުލީޓުން ވަނީ ދެ ރަން މެޑަލާއި ރިހި މެޑަލެއް ހޯދައިފަ އެވެ.
ކޮވިޑް-19 އަށް ބަންދުކުރި ކެނަރީފް ރިސޯޓް މީގެ ދެ އަހަރު ކުރިން ހުޅުވިއިރު، ދުނިޔޭގެ ބޮޑީބިލްޑިން މުބާރާތް ހޯސްޓްކުރުމަކީ އެ ރިސޯޓަށް ވެސް ލިބޭ ފަހުރެކެވެ.
މީގެ ކުރިން، އައްޑޫ ސިޓީގައި ބޮޑެތި ބައިނަލްއަގުވާމީ އިވެންޓްތަކެއް ކުރިއަށްގެންގޮސްފައިވެ އެވެ. އެ ގޮތުން، 2011 ވަނަ އަހަރުގެ ސާކް ސަމިޓާއި 2014 ވަނަ އަހަރުގެ އޭއެފްސީ ޗެލެންޖް ކަޕްގެ ގްރޫޕް ސްޓޭޖުގެ ބައެއް މެޗުތަކާއި 2019 ވަނަ އަހަރު ސާކް ސަރަހައްދުގެ ގައުމުގެ 21 އަހަރުން ދަށުގެ ބެޑްމިންޓަން މުބާރާތް ވަނީ އައްޑޫ ސިޓީގައި ބާއްވައިފަ އެވެ. މިއީ، ދުނިޔޭގެ ލެވަލްގެ މި ފަދަ ކުޅިވަރު މުބާރާތެއް އައްޑޫގައި ހޯސްޓްކުރާނެ ފުރަތަމަ ފަހަރެވެ.
