ރާއްޖޭގައި ހޯސްޓްކުރަމުން އަންނަ، 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕާ ގުޅިގެން އާންމު ރައްޔިތުންގެ ކަންބޮޑުވުން ހުރުމާ އެކު، ރާއްޖޭގެ ބޮޑީބިލްޑިން އެސޯސިއޭޝަނުން، ދިވެހި ރައްޔިތުންގެ ކިބައިން މާފަށް އެދިއްޖެ އެވެ.
ބޮޑީބިލްޑިން އެސޯސިއޭޝަން، ބީބީއޭއެމް އިން ދާދި ދެންމެ އަކު ނެރުނު ބަޔާނެއްގައި ބުނެފައިވަނީ، އައްޑޫ ސިޓީ ކެނަރީފް ރިސޯޓްގައި މިހާރު ކުރިއަށްދާ ދުނިޔޭގެ ބޮޑީބިލްޑިން މުބާރާތް ރާއްޖޭގައި ހޯސްޓްކުރުމުގެ ފުރުސަތު ހޯދަން ބިޑް ކުރީ ރާއްޖޭގެ ޕްރޮފައިލް ރަނގަޅުކޮށް، ރާއްޖޭގެ އިގްތިސާދާއި ޓޫރިޒަމް އަށް ލިބޭ ފައިދާތަކަށް ވެސް ވިސްނައިގެން ކަމަށެވެ. އަދި މި އަހަރު މި މުބާރާތް ބާއްވަން ފުރުސަތު ލިބިގެންދިޔައީ ވަރަށް ދުރާލާ މަސައްކަތްކޮށްގެން ކަން ވެސް ބީބީއޭއެމް އިން ފާހަގަކޮށްފައިވެ އެވެ.
"ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ފެޑެރޭޝަނާ އެކު މި މުބާރާތް ބޭއްވުމަށް ކޮންޓްރެކްޓް ހެދުމަށް ފަހު، ދިވެހި ރާއްޖޭގައި މި މުބާރާތް ބޭއްވުން ކެންސަލްކޮށްފިނަމަ ދިވެހިރާއްޖޭގެ ކުޅިވަރު އެސޯސިއޭޝަންތަކަށާއި ޖުމްލަ ގޮތެއްގައި ރާއްޖެ އަށް މާލީ ގޮތްގޮތުންނާއި އެހެނިހެން ގޮތްގޮތުން ލިބިދާނެ ގެއްލުންތަކަށް ވިސްނުމަށް ފަހު މި މުބާރާތް ބޭއްވުމަށް މި އެސޯސިއޭޝަނުން ނިންމީ އެވެ." ބޮޑީބިލްޑިން އެސޯސިއޭޝަނުގެ ބަޔާނުގައިވެ އެވެ.
ބީބީއޭއެމް އިން ބުނެފައިވަނީ، މި މުބާރާތް ކެނަރީފް ރިސޯޓްގައި ކުރިއަށްގެންދަން ނިންމީ ބައިނަލްއަގުވާމީ ޓުއަރިސްޓުން އައިސް އެބައިމީހުންގެ ދިރިއުޅުމުގެ ވައްޓަފާޅިއާ އެއްގޮތަށް އުޅެވޭގޮތަށް އާންމު ދިވެހި ރައްޔިތުން ދިރިނޫޅޭ ތަނެއްގައި ކުރިއަށްގެންދިއުމުގެ ގޮތުން ކަމަށެވެ.
އަދި މި މުބާރާތް ކުރިއަށްގެންދަން ރައީސް ޑރ. މުހައްމަދު މުއިއްޒުގެ ތަސައްވުރާ އެއްގޮތަށް ސްޕޯޓްސް މިނިސްޓްރީން އިރުޝާދު ދިން ގޮތަށް މުބާރާތް ކުރިއަށްގެންދެވޭތޯ މަސައްކަތްކުރި ކަމަށް ބީބީއޭއެމް އިން ވަނީ ބުނެފަ އެެވެ.
"ނަމަވެސް މުބާރާތާ ގުޅިގެން ފެތުރެމުންދާ ހަބަރުތަކާ ގުޅިގެން އާންމު ރައްޔިތުންގެ ކަންބޮޑުވުންތައް ހުރުމާ އެކު، ރައީސުލްޖުމްހޫރިއްޔާ ޑރ، މުހައްމަދު މުއިއްޒު އާއި ދިވެހި ލޮބުވެތި ރައްޔިތުންގެ ފަރާތުން ނިހާޔަތަށް މައާފަށް އެދެމެވެ. އަދި މުސްތަގުބަލުގައި މި ފަދަ ކަމެއް ތަކުރާރުނުވާނެ ކަމުގެ ފުރިހަމަ ޔަގީންކަން ރައްޔިތުންނަށް އަރުވަމެވެ." ބޮޑީބިލްޑިން އެސޯސިއޭޝަން، ބީބީއޭއެމްގެ ބަޔާނުގައިވެ އެވެ.
ބޮޑީބިލްޑިން މުބާރާތާ ގުޅޭ ކަންބޮޑުވުންތަކުގެ މައްސަލަތައް ކުރިމަތިވި ގޮތް
"ވޯލްޑް ބޮޑީބިލްޑިން އެންޑް ފިސީކް ސްޕޯޓްސް ޗެމްޕިއަންޝިޕް" ރަސްމީކޮށް އޮކްޓޯބަރު 8، ގައި އިފުތިތާހުކޮށްދެއްވީ ކުޅިވަރާ ބެހޭ މިނިސްޓަރު އަބްދުﷲ ރާފިއު އެވެ.
އެކަމަކު، އިސްލާމް ދީނާ ނުގުޅޭ ކަމަށް ބުނެ މިސް ޔުނިވާސް މުބާރާތުގައި ރާއްޖޭގެ މޮޑެލަކު ބައިވެރިވުން ޔޫތު މިނިސްޓްރީން ކުށްވެރި ކުރި ފަހުން އުފެދުނު ބަހުސާ އެކު، ރައީސް މުއިއްޒު ވަނީ އަންހެނަކު އަދި ފިރިހެނަކު ވިޔަސް "ހަށިގަނޑު ހާމަކޮށްގެން" ބާއްވާ މުބާރާތްތަކުން ގައުމަށާއި ދީނަށް ލިބޭނެ ރީތި ނަމެއް ކާމިޔާބެއް ނެތް ކަމަށް ވިދާޅުވެފަ އެވެ.
"ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ގައުމަށް ލިބޭނެ ހަގީގީ ރީތި ނަމެއް، އުފަލެއް، ކާމިޔާބީއެއް ނެތް!،" ރައީސް ވިދާޅުވި އެވެ.
އެހެން އެ ބަހުސް ކުރިއަށް ގޮސްފައި އޮއްވައި، ކެނަރީފް މުބާރާތުގައި ދުނިޔޭގެ ބޮޑީބިލްޑިން މުބާރާތް ބާއްވާ ވީޑިއޯތައް ސޯޝަލް މީޑިއާގައި ދައުރުވެ، މީޑިއާގައި އެ ވާހަކަތައް ކުރިއަށްދާން ފެށުމުން، ބީބީއޭއެމް އިން ބަޔާން ނެރުނީ އެވެ.
ބީބީއޭއެމް އިން މީގެ ކުރިން މައުލޫމާތު ދިން ގޮތުގައި، 55 ގައުމަކުން މި ފަހަރުގެ ދުނިޔޭގެ މުބާރާތުގައި ވާދަކުރާއިރު، އެތުލީޓުންނާއި ކޯޗުން އަދި އޮފިޝަލުން ހިމެނޭ ގޮތަށް 500 އަށް ވުރެ ގިނަ ފަރާތްތައް މުބާރާތަށް އަންނާނެ އެވެ.
ދެކުނު އޭޝިއާގެ ބޮޑީބިލްޑިން މުބާރާތް ވެސް މިދިޔަ އަހަރާއި މި އަހަރު ރާއްޖޭގައި ވަނީ ހޯސްޓްކޮށްފަ އެވެ. މީގެ ކުރިން، 2022 ވަނަ އަހަރު ކ. މާފުށީގައި ވަނީ އޭޝިއާގެ ބޮޑީބިލްޑިން މުބާރާތް ވެސް ބާއްވައިފަ އެެވެ. އަދި 2001 ވަނަ އަހަރު ދެކުނު އޭޝިއާގެ ބޮޑީބިލްޑިން މުބާރާތް ބަނޑޮހުގައި ބޭއްވި އެވެ.
ދުނިޔޭގެ ފެޑެރޭޝަން ރައީސް ޕޯލް ޗުއާ ވިދާޅުވީ، ދުނިޔޭގެ މުބާރާތް ބޭއްވުމުގެ ފުރުސަތު ރާއްޖެ އަށް ދިނީ، 2022، 2023 ވަނަ އަހަރު ދެކުނު އޭޝިއާ ބޮޑީބިލްޑިން މުބާރާތާއި 2022 ވަނަ އަހަރު އޭޝިއާގެ ބޮޑީބިލްޑިން މުބާރާތް ރާއްޖޭގައި ހޯސްޓްކޮށްފައިވަނީ ފުރިހަމަކޮށް ކަމަށްވާތީ ކަމަށެވެ.
