ލަންޑަން (ނޮވެމްބަރު 7) - ރެއާލް މެޑްރިޑަށް ބަދަލުވުމަށް ފަހު ގިނަ މެޗުތަކުގައި ކީލިއަން އެމްބާޕޭގެ ފަރާތުން މަސައްކަތުގެ ރޭޓް ދަށްކޮށް ފެންނައިރު، ބައެއް ވަގުތުތަކުގައި ފަރުވާކުޑަކޮށް ކަންކަން ކުރާތީ، ފްރާންސްގެ ކުރީގެ ފޯވާޑް ތިއަރީ އޮންރީ ހިތްހަމަނުޖެހުންފާޅުކޮށްފި އެވެ.
ހިލޭ ޓްރާންސްފާއެއްގައި، ބޮޑު މުސާރައެއް ލިބޭގޮތަށް ޕީއެސްޖީ ދޫކޮށް ރެއާލާ ގުޅުނު އެމްބާޕޭގެ ފަރާތުން އެންމެ ރަނގަޅު ކުޅުން ނުފެންނަ ކަމަށް ބުނެ މީޑިއާގައި އަންނަނީ ވާހަކަ ދެކެވެމުންނެވެ. އަދި ސްޕެއިނުގެ ބައެއް މީޑިއާތަކުން ރިޕޯޓްކުރާގޮތުގައި، ރެއާލްގެ ނަތީޖާ ނެރުުމުގެ މައްސަލަ ގުޅިފައި އޮންނަނީ، މެޗުގެ މުހިންމު ވަގުތުތަކުގައި އެމްބާޕޭ އަށް ބަރޯސާވެފައި އޮތުމާއި އޭނާގެ ފަރާތުން އެ ފެންވަރުގެ ކުޅުމެއް ނުފެންނާތީ އެވެ.
"ޔަގީންކަމެއް، އެމްބާޕޭގެ މަސައްކަތުގެ ރޭޓު އެހެރީ ރަނގަޅު ވަރެއްގައެއް ނޫން. އަހަރެން ވެސް އެކަން ގަބޫލުކުރަން. ބައެއް ވަގުތުތަކުގައި ފަރުވާކުޑަވުމުގެ ކަންކަން ވެސް އޭނަ ފަރާތުން އެބަ ފެނޭ. އެކަމަކު، އަހަރެން ގަބޫލުުކުރަނީ، އެމްބާޕޭ އަދި ރަނގަޅުކުރާނެ ކަމަށް. މިއީ، އޭނާ ވަރަށް ބޭނުންވެގެން ނިންމި ޓްރާންސްފާއެއް، އެހެންވީމަ، ރެއާލްގައި ކާމިޔާބުވާން އޭނަ ކަންކަން ރަނގަޅުކުރާނެ. ނޫންނަމަ، ރެއާލަަކީ މާ ފުރުސަތު ލިބޭނެ ތަނެއް ނޫން،" އޮންރީ ބުންޏެވެ.
މި ފަހަރުގެ ޗެމްޕިއަންސް ލީގުގައި ކުޅުނު ހަތަރު މެޗުގެ ތެރެއިން ދެ މެޗުން ރެއާލް ވަނީ ބަލިވެފަ އެވެ. އަދި ސްޕެނިޝް ލީގުގެ ރޭހުގައި ވެސް އެންމެ ބޮޑު ވެއްޓުމަކީ، އަމިއްލަ ދަނޑުގައި ވާދަވެރި ބާސެލޯނާ އަތުން ތަފާތު ބޮޑުކޮށް ބަލިވުމެވެ. އޮންރީ ބުނީ، މީގެއިން ކޮންމެ މެޗެއްގައި ވެސް އެމްބާޕޭ އަށް ގޯލެއް ޖަހާލަން ރަނގަޅު ފުރުސަތުތަކެއް ލިބި ބޭނުންނުކުރެވުނު ކަމަށެވެ.
ރެއާލަށް ކުޅެދިން 15 މެޗުން އެމްބާޕޭ ވަނީ އަށް ގޯލު ޖަހައި، ދެ ލަނޑު ޖަހަން ފުރުސަތު ހޯދައިދީފަ އެވެ.
