އުޒްބެކިސްތާންގައި މިހާރު ކުރިއަށްދާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެމްޕިއަންޝިޕްގައި ތުރުކުމެނިސްތާން އަތުން ފަސް ސެޓު ކުޅެގެން ރާއްޖެ ބަލިވެއްޖެ އެވެ.
މި ނަތީޖާއާ އެކު، މުބާރާތުގެ ފައިނަލަށް ދިއުމުގެ އަމިއްލަ ބާރު ރާއްޖެ އަށް ގެއްލުނީ އެވެ.
މި މުބާރާތުގެ ފުރަތަމަ މެޗުގައި ކިރްގިސްތާންއާ ދެކޮޅަށް ރާއްޖެއިން ކުޅުނުއިރު، އެ މެޗުން ރާއްޖެ ބަލިވީ, ސީދާ ތިން ސެޓުންނެވެ. އެކަމަކު، މިއަދު މެންދުރު ތުރުކުމެނިސްތާންއާ ދެކޮޅަށް ރާއްޖެއިން ކުޅުނު މެޗުގައި ގިނަ ކަންތައްތައް ވަނީ ރަނގަޅު ކޮށްފަ އެވެ. މި މެޗުން ރާއްޖެ ބަލިވީ 3-2 ސެޓުންނެވެ.
މި މެޗުގެ ސެޓުތައް ދިޔައީ 18-25، 25-23، 25-21، 15-25، 8-15 އިންނެވެ.
މި މެޗުގެ ފުރަތަމަ ސެޓުގައި ރާއްޖެއިން ފެނިގެންދިޔައީ ދަށް ކުޅުމެކެވެ. އެ ގޮތުން، ސެޓު ފަށައިގެން ތުރުކުމެނިސްތާން އިން ވަނީ ބޮޑު ލީޑެއް ނަގާ ހަމަޖެހިލާފަ އެވެ. އެއާއެކު މި ސެޓު އެ ޓީމުން ކާމިޔާބުކުރީ 25-18 އިންނެވެ.
އެކަމަކު، ދެ ވަނަ ސެޓުގައި ރާއްޖެއިން ކުޅުން ރަނގަޅުކުރިއިރު، މި ސެޓުގައި ރާއްޖޭގެ އިސްމާއިލް ސާޖިދު (ކުޑަ ކާއްޓޭ) ގެ މޮޅު ކުޅުން ފެނިގެންދިޔަ އެވެ. އެއާއެކު މި ސެޓު ރާއްޖެއިން ކާމިޔާބުކުރީ 25-23 އިންނެވެ. އަދި ޖެހިގެން އައި ތިން ވަނަ ސެޓުގައި ވެސް ރާއްޖެއިން ވަނީ ދެ ވަނަ ސެޓުގައި ދެއްކި ކުޅުން ތަކުރާރުކޮށްފަ އެވެ. ތިން ވަނަ ސެޓު ރާއްޖެއިން ގެންދިޔައީ, 25-21 އިންނެވެ.
އެކަމަކު، މެޗުގެ ފަހު ދެ ސެޓުގައި ތުރުކުމެނިސްތާން އިން ވަނީ ކުޅުން ރަނގަޅުކޮށް އެ ޓީމުގެ އެޓޭކުތައް ވަރުގަދަ ކޮށްފަ އެވެ. މި ދެ ސެޓުގައި ރާއްޖޭގެ ރިސީވްތައް ދަށްވުމުގެ ފައިދާ ތުރުކުމެނިސްތާން އިން ނެގިއިރު, މި ދެ ސެޓު އެ ޓީމުން ގެންދިޔައީ 25-15 އަދި 15-08 އިންނެވެ.
ރާއްޖޭން ކުޅޭ ތިން ވަނަ މެޗުގައި މާދަމާ އަފްގާނިސްތާނާ ބައްދަލުކުރާނެ އެވެ. އަދި ހަތަރު ވަނަ މެޗުގައި އަންގާރަ ދުވަހު އުޒްބެކިސްތާނާ ކުޅުމަށް ފަހު، ލީގު ބުރުގެ ފަހު މެޗުގައި، ބުދަ ދުވަހު ތަޖިކިސްތާނާ ބައްދަލުކުރާނެ އެވެ.
