މިހާރު ކުރިއަށްދާ ޔޫގާންޑާ އިންޓަނޭޝަނަލް ސީރީސް ބެޑްމިންޓަން މުބާރާތުގެ ފަސް އިވެންޓެއްގެ ކުއާޓާ ފައިނަލުން ރާއްޖޭގެ ރިވައިވަލް ސްޕޯޓްސްގެ ކުޅުންތެރިން ކުއާޓާ ފައިނަލަށް ދަތުރުކޮށްފި އެވެ.
އެ ގޮތުން، ކުއާޓާ ފައިނަލުން ޖާގަ ހޯދާފައިވަނީ، އަންހެން ސިންގަލްސް އިން ފާތިމަތު ނަބާހާ (ނަބާ)، އައިމިނަތު ނަބީހާ (ނަބީ)، އަންހެން ޑަބަލްސް އިން ނަބީ އާއި ނަބާގެ ޕެއާ، ފިރިހެން ޑަބަލްސް އިން ޒަޔާން ޒަކީ އާއި ނިބާލް އަހުމަދުގެ ޕެއާ އަދި މިކްސް ޑަބަލްސް އިން ޒަޔާން އާއި ނަބާގެ ޕެއާ އެވެ.
ފިރިހެން ސިންގަލްސް ކޮލިފިކޭޝަންގައި، ރާއްޖޭގެ ހަސަން ޒަޔާން ފުރަތަމަ މެޗުން، ޔޫގާންޑާގެ ޑޭވިޑް ވައިސްވާ އަތުން 21-04، 21-05 އިން މޮޅުވި ނަމަވެސް، ދެ ވަނަ މެޗުގައި ޔޫގާންޑާގެ ޑެނިސް މުކާސާ އަތުން ތިން ސެޓު ކުޅެގެން ބަލިވީ އެވެ. އެއީ، 21-13، 16-21 އަދި 20-22 އިިންނެވެ. ފިރިހެން ސިންގަލްސް މެއިން ޑްރޯގައި އިޓަލީގެ އަލެސަންދްރޯ ގޮޒީނީ އަތުން ޒަޔާން ޒަކީ ބަލިވީ، 21-09، 21-09 އިންނެވެ. އަދި ނިބާލް ބަލިވީ، އިންޑިއާގެ ނަރެން ޝަންކަރު އައްޔަރު އަތުން 21-19، 21-09 އިންނެވެ.
އަންހެން ސިންގަލްސްގައި ނަބީ ވަނީ ޔޫގާންޑާގެ ހަނީފާ ހަމޫޒާ އަތުން 21-13، 21-06 އިން އަދި ޔޫގާންޑާގެ ވެރޯނާ ސަދާތު އަތުން 21-13، 21-12 އިން މޮޅުވެފަ އެވެ. ކުއާޓާގައި ނަބީ ނުކުންނާނީ އިންޑިއާގެ ފަރްޒާ ނަޒްރީންއާ ދެކޮޅަށެވެ. ނަބާ ވަނީ އަންހެން ސިންގަލްސްގައި ޔޫގާންޑާގެ މެބްލް ނަމަކޯޔޭ އަތުން 21-10، 21-11 އިން މޮޅުވެފަ އެވެ. އަދި ޔޫގާންޑާގެ ތުރިޝާ ރޮޑާ އަތުން 21-11، 21-09 އިން މޮޅުވި ނަބާ ކުއާޓާގައި ކުޅޭނީ، އަޒަރުބައިޖާންގެ އީރާ މަފްތުހާއާ ދެކޮޅަށެވެ.
އަންހެން ޑަބަލްސްގެ ކުއާޓާގައި ނަބީ އާއި ނަބާގެ ޕެއާ ކުޅެން ޖެހޭނީ، ޔޫގާންޑާގެ ކްލެއާ ނަމިރެމްބޭ އާއި ކިމްބެލީ ޖޮއާންގެ ޕެއާއާ ދެކޮޅަށެވެ.
ފިރިހެން ޑަބަލްސްގެ ކުއާޓާ އިން ނިބާލް އާއި ޒަޔާންގެ ޕެއާ ޖާގަ ހޯދީ، ޔޫގާންޑާގެ ދެ ޕެއާ ބަލިކޮށްގެންނެވެ. އެ ގޮތުން، ފުރަތަމަ މެޗުގައި ޔޫގާންޑާގެ ބަތަމް ކަވީޝާ އާއި ޝިލްޓަން ޓަޔެބްވާގެ ޕެއާ އަތުން ޒަޔާން އާއި ނިބާލްގެ ޕެއާ މޮޅުވީ، 21-09، 21-10 އިންނެވެ. ދެ ވަނަ މެޗުގައި ޔޫގާންޑާގެ ޖޯޝުއާ އެކޯޗޫ އާއި ޖޯޑަން ނުވަގަބާ އަތުން މޮޅުވީ، 21-11، 21-05 އިންނެވެ. ކުއާޓާގައި ޒަޔާން އާއި ނިބާލްގެ ޕެއާ ކުޅޭނީ، ނިތިން އާއި ވެންކަޓާގެ ޕެއާއާ ދެކޮޅަށެވެ.
މިކްސް ޑަބަލްސްގައި ޒަޔާން އާއި ނަބާގެ ޕެއާ އިން ވަނީ ޔޫގާންޑާގެ ޑޭވިޑް ވައިސްވާ އާއި ސާރާ ނަމުގާބޯގެ ޕެއާ އަތުން 21-04 އާއި 21-01 އިން މޮޅުވެފަ އެވެ. ކުއާޓާގައި ޒަޔާން އާއި ނަބާގެ ޕެއާ ބައްދަލުުކުރާނީ، މެލޭޝިއާގެ އެންޑީ ޔޫ އާއި ލޯ ޒީ ވެއި ގެ ޕެއާއާ އެވެ.
މިކްސް ޑަބަލްސްގައި ނިބާލް އާއި ނަބީގެ ޕެއާ ބަލިވީ އިންޑިއާގެ މޯހިތު ޖަގްލާން އާއި ލަކްޝިތާ ޖަގްލާންގެ ޕެއާ އަތުން، ތިން ސެޓަށް ކުޅެގެންނެެވެ. މެޗުގެ ސެޓުތައް ދިޔައީ، 19-21، 21-15 އަދި 21-14 އިންނެވެ.
