ލަންޑަން (އޮކްޓޫބަރު 4) - ޗެލްސީގެ ތަރި، ކޯލް ޕާމާ ލަނޑު ޖެހުމަށް ފަހު އުފާފާޅުކުރާއިރު ހަދާ "ކޯލްޑް" ސެލެބްރޭޝަން، އެންމެ ފުރަތަމަ ހަދާފައިވަނީ، އެސްޓަން ވިލާ އަށް ކުޅެމުން އަންނަ މިޑްފީލްޑަރު، މޯގަން ރޮޖާސް އެވެ. އެކަމަކު، ރޮޖާސް ދެކޭގޮތުގައި މިހާރު، "ކޯލްޑް" ސެލެބްރޭޝަން އަކީ، ޕާމާގެ ހައްގެކެވެ.
ރޮޖާސް އާއި ޕާމާ އަކީ މެންޗެސްޓާ ސިޓީ ޔޫތު ޓީމަށް އެކުގައި ކުޅެފައިވާ ދެ ކުޅުންތެރިންގެ އިތުރުން، ދެ ގާތް ރަހުމަތްތެރިންނެވެ. ޕާމާ، މިދިޔަ އަހަރު ޗެލްސީ އަށް ބަދަލުުވިއިރު، ރޮޖާސް ބަދަލުވީ، މިޑްލްސްބަރާ އަށެވެ.
މިދިޔަ އަހަރުގެ ޑިސެމްބަރު މަހު 23 ވަނަ ދުވަހު، ރޮޖާސް، އެންމެ ފުރަަތަަމަ "ކޯލްޑް" ސެލެބްރޭޝަން ހެދީ، މިޑްލްސްބަރާ އަށް ކުޅެމުން ވެސްޓް ބްރޮމް ކޮޅަށް ލަނޑު ޖަހައިފަ އެވެ. އޭގެ ހަފްތާއެއް ފަހުން، ލޫޓަން ޓައުން ކޮޅަށް ލަނޑު ޖަހައިފައި، ޕާމާ ފުރަތަމަ ފަހަރަށް "ކޯލްޑް" ސެލެބްރޭޝަން ހެދިއިރު، އެކަން ބޮޑަށް ވައިގައި ހިފި އެވެ.
ޗެމްޕިއަންސް ލީގުގައި، ބަޔާން މިއުނިކް އަތުން އެސްޓަން ވިލާ މޮޅުވި މެޗަށް ފަހު، ރޮޖާސް ބުނީ، "ކޯލްޑް" ސެލެބްރޭޝަން އަކީ އޭނާ ފެށި ކަމެއް ކަމަށާއި އެކަން ޓައިމްލައިނަށް ބަލާލުމުން ސާފުވާނެ ކަމަށެވެ.
"ޔަގީންކަމެއް، އޭނަ (ޕާމާ) މި އޮތީ އަހަރެން ކޮޕީކޮށްފައި. އެކަމަކު، މިހާރު އެއީ އޭނަގެ ހައްގެއް، 40 ވަރަކަށް ގޯލު ޖަހާފައި އެ ސެލެބްރޭޝަން ހަދައިފި. އެހެންވީމަ، އަހަރެން އެބަޖެހޭ ގިނަ ގޯލު ޖަަހަން،" ރޮޖާސް ބުންޏެވެ.
"މިހާރު ޔަގީނުން ވެސް ގިނަ ބަޔެއް ގަބޫލުކުރާނީ، އެއީ އޭނަ (ޕާމާ)ގެ ސެލެބްރޭޝަނެއް ކަމަށް، އަހަރެން ވެސް ދެކެނީ އޭނަގެ ހައްގެއްގެ ގޮތުގައި،"
މީގެ ކުރިން، ޕާމާ ވެސް ވަނީ "ކޯލްޑް" ސެލެބްރޭޝަން އެންމެ ފުރަތަމަ ހެދީ ރޮޖާސް ކަމަށް ބުނެފަ އެވެ. އެކަމަކު، ފަހުން ޕާމާ އަށާް ވެސް އެ ސެލްބެރޭޝަން ކަމުގޮސްގެން، އެ ގޮތަށް ކޮންމެ ލަނޑަކަށް ފަހު އުފާފާޅުކުރަން ފެށުނީ ކަމަށާއި ސަޕޯޓަރުންގެ ސަޕޯޓާ އެކު، އެކަން އާދަޔަކަށް ވީ ކަމަށެވެ.
ދުނިޔޭގެ ފުޓްބޯޅައިގެ ގިނަ ކުޅުންތެރިންތަކެއް މިހާރު އަންނަނީ ލަނޑު ޖެހުމަށް ފަހު އުފާފާޅުކުރާއިރު، ކޯލްޑް ސެލެބްރޭޝަން ހަދަމުންނެވެ. އެ ގޮތުން، ލާޒިއޯ އަށް ކުޅެމުން އަންނަ އާސެނަލްގެ ކުރީގެ މިޑްފީލްޑަރު، މަޓެއޯ ގެންޑޫޒީ ވެސް ވަނީ ވަރަށް ފަހު "ކޯލްޑް" ސެލެބްރޭޝަން ހަދައިފަ އެވެ.
