ބާސެލޯނާ (ސެޕްޓެމްބަރު 27) - މިދިޔަ މަހު ފުޓްބޯޅައިން ރިޓަޔާކުރަން ނިންމި ނިންމުން ބަދަލުކޮށް، ޕޮލެންޑްގެ ގޯލްކީޕަރު، ވޮޒްޝިއޭ ޝެޒްނީ، ބާސެލޯނާއާ އެކު ކޮންޓްރެކްޓެއް ހެދުމަށް އެއްބަސްވެއްޖެ އެވެ.
ޝެޒްނީ، 34، މިދިޔަ މަހު ފުޓްބޯޅައިން ރިޓަޔާކުރަން ނިންމީ ގިނަ ކްލަބްތަކެއްގެ ހުށަހެޅުން ވެސް ލިބިފައި އޮއްވަ އެވެ. އެކަމަކު، ބާސެލޯނާގެ އެއް ވަނަ ކީޕަރު، މާކް އަންދްރޭ ޓާ ސްޓެގެންގެ ކަކުލަށް ލިބުނު ސީރިއަސް އަނިޔާއަކާ ހެދި އޭނާ އަށް ގާތްގަނޑަކަށް ސީޒަން ނިމިފައިވާއިރު، ބަދަލުގައި ބާސެލޯނާ އިމަޖެންސީ ޓްރާންސްފާއެއްގެ ގޮތުގައި ކީޕަރެއް ބޭނުންވުމުން، ޝެޒްނީ އެ ޑީލަށް އެއްބަސްވީ އެވެ.
"ބާސެލޯނާގެ ތާރީހަށް އަހަރެންގެ ވަރަށް ބޮޑު އިހުތިރާމެއް އެބައޮތް. އަހަންނަށް އެނގޭ މިއީ ވަރަށް އުނދަގޫ ވަގުތެއްކަން ބާސެލޯނާ އަށް. ސްޓެގެންގެ އިންޖަރީއާ އެކު ބާސެލޯނާ އިން މި ނިންމުން ނިންމަންޖެހޭ،" ސްޕެއިނުގެ ނޫހަކަށް ކުރިން އާސެނަލާއި ޔުވެންޓަސް އަށް ކުޅުނު ޝެޒްނީ ބުންޏެވެ.
ބާސެލޯނާގެ ކޯޗު ހަންސީ ފްލިކް ބުނީ، ޝެޒްނީއާ ބެހޭގޮތުން ވާހަކަ ނުދެއްކޭނެ ކަމަށާއި އަދި އެއީ އެ ކްލަބްގެ ކޮންޓްރެކްޓްގައި ހުރި ކުޅުންތެރިއެއް ނޫން ކަމަށެވެ. އެކަމަކު، ބާސެލޯނާގައި މި ވަގުތު ހުރި ކީޕަރު، އިނާކީ ޕެންޏާ އަކީ 25 އަހަރުގެ ޒުވާން ކީޕަރެއް ކަމަށާއި ދެން ތިބީ އެ އަށް ވުރެ ވެސް ހަގު ކީޕަރުން ކަމަށްވާތީ، ތަޖުރިބާކާރު ކީޕަރެއްގެ ބޭނުން ޓީމަށް ބޮޑު ކަމަށް ފްލިކް ވެސް ވަނީ ބުނެފަ އެވެ.
އާސެނަލުން 2009 ވަނަ އަހަރު ސީނިއާ ކެރިއަރު ފެށި ކީޕަރު ޝެޒްނީ، 2017 އާ ހަމައަށް އެ ޓީމަށް ކުޅުނެވެ. އެ މުއްދަތުގައި އެއް އަހަރު ލޯނަކަށް ބްރެންޓްފޯޑަށް އަދި ދެ އަހަރު ލޯނަކަށް ރޯމާ އަށް ކުޅުނެވެ. ފަހުން، 2017 ގައި ޔުވެންޓަސްއާ ގުޅުނުއިރު، މިދިޔަ ސީޒަނުގެ ނިޔަލަށް ހުރީ އެ ޓީމުގެ ކޮންޓްރެކްޓްގަ އެވެ. އޭނާ ކޮންޓްރެކްޓް ނިންމާލީ ޔުވެންޓަަސްއާ އެކު ވަކިން އެއްބަސްވުމަކަށް އަތުވުމަށް ފަހު އެވެ.
