ޔޫގާންޑާގައި މިއަދު ފެށި، ކެމްޕާލާ އިންޓަނޭޝަނަލްގެ ފިރިހެން ސިންގަލްސް ބައިގެ ކޮލިފިކޭޝަނުގައި ކުޅުނު ތިން މެޗުން ޔޫގާންޑާ ކުޅުންތެރިން ބަލިކުރުމަށް ފަހު ރިވައިވަލް ސްޕޯޓްސް ކްލަބްގެ ހަސަން ޒަޔާން މުބާރާތުގެ މެއިން ޑްރޯ އިން ޖާގަ ހޯދައިފި އެވެ.
މޮރިޝަސް އިންޓަނޭޝަނަލް މުބާރާތުގައި މީގެ ތިން މަސް ކުރިން ކުޅެ، ކޮލިފިކޭޝަނުގެ އެއް މެޗުން މޮޅުވި ޒަޔާން މި ފަހަރު މި ވަނީ ކޮލިފިކޭޝަން ތިން މެެޗުން މޮޅުވެ، ގަދަ 32 ކުޅުންތެރިންގެ ތެރެއިން ފުރުސަތު ހޯދައިފަ އެވެ. އެހެންކަމުން، މިހާރު ވެސް އޭނާ މި ވަނީ ރިވައިވަލްއާ ގުޅުނު ފަހުން ކުރިއެރުން ހޯދައިފަ އެވެ.
ކޮލިފިކޭޝަން ބުރުގެ ފުރަތަމަ މެޗުގައި، ޔޫގާންޑާގެ ޕްރީތު ނިކިލްކުމާރާ ކުޅެގެން ޒަޔާން މޮޅުވީ، 21-09، 21-09 އިންނެވެ. ކޮލިފައިން ދެ ވަނަ މެޗުގައި ޔޫގާންޑާގެ އަރަފާތު ކަލޫބޭއާ ދެކޮޅަށް ކުޅެގެން، 21-02، 21-03 އިން ހަސަން ޒަޔާން މޮޅުވިއިރު، ކޮލިފައިން ތިން ވަނަ މެޗުގައި، ޓެންޑޯ ކިޒީޓޯ ބަލިކުރީ ތިން ސެޓު ކުޅެގެންނެވެ. އެ ގޮތުން، 21-09 އިން ޒަޔާން ފުރަތަމަ ސެޓު ގެންދިޔައިރު، ދެ ވަނަ ސެޓުން ޓެންޑޯ 12-21 އިން މޮޅުވި އެެވެ. އެކަމަކު، ފަހު ސެޓު، 21-10 އިން ގެންގޮސް މެޗުން މޮޅުވެ، ޒަޔާންގެ ކެރިއަރުގައި ފުރަތަމަ ފަހަރަށް ކޮލިފިކޭޝަން ބުރެއް ފަހަނައަޅައި ގޮސް މުބާރާތެއްގެ މެއިންޑްރޯ އިން ފުރުސަތު ހޯދީ އެވެ.
އެ ގޮތުން، މެއިންޑްރޯގައި ގަދަ 32 ކުޅުންތެރިން ކުޅޭ ބުރުގައި ޒަޔާން ކުޅޭނީ ފަސް ވަނަ އަށް ސީޑްކޮށްފައިވާ އިންޑިއާގެ އާރްޔާ ބިވްޕަތަކީއާ އެވެ.
ފިރިހެން ސިންގަލްސް މެއިންޑްރޯގައި ރިވައިވަލްގެ ނިބާލް އަހުމަދު އާއި ޒަޔާން ޒަކީ ވެސް ކުޅޭނެ އެވެ. ޒަޔާން ޒަކީ ކުޅޭނީ ކޮލިފިކޭޝަނުން އައި އިންޑިއާގެ އަދިތުޔާ ގުޕްތާއާ އެވެ. ނިބާލް ބައްދަލުކުރާނީ ކޮލިފިކޭޝަނުން އައި އިންޑިއާގެ ކްރިޝް ދޭސާއީއާ އެވެ.
ފިރިހެން ޑަބަލްސްގައި ނިބާލް އާއި ޒަޔާން ޒަކީގެ ޕެއާ ބައްދަލުކުރާނީ، ޔޫގާންޑާގެ އަކްރަމް ކަމޯގާ އާއި އަބްދުލް ސްވަބްރޫގެ ޕެއާއާ އެވެ.
މިއަދުން ފެށިގެން މި މަހު 29 އަށް ޔޫގާންޑާގައި ކެމްޕާލާ އިންޓަނޭޝަނަލް ކުރިއަށްދާއިރު، އަންނަ މަހުގެ 3-6 އަށް ކުރިއަށްދާ ޔޫގާންޑާ އިންޓަނޭޝަނަލް ސީރީސްގައި ވެސް ރިވައިވަލް އިން ވާދަކުރާ ގޮތަށް ވަނީ ހަމަޖެހިފަ އެވެ. މި ދެ މުބާރާތުގައި ވެސް ޓީމަށް އިރުޝާދުދޭނީ ކޯޗު ނަޝްފާން މުހައްމަދު އެވެ.
