ލަންޑަން (އޮގަސްޓް 24) - ޗެލްސީ އަށް ކުޅެމުން އަންނަ ބެލްޖިއަމް ފޯވާޑް، ރޮމެލޫ ލުކާކޫ، އިޓަލީގެ ނަޕޯލީ އަށް ވިއްކާލުމަށް ޗެލްސީން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޗެލްސީން 2021 ވަނަ އަހަރު ލުކާކޫގެ ސޮއިހޯދީ 98 މިލިއަން ޕައުންޑް (135 މިލިއަން ޑޮލަރު)ގެ ފީ އަކަށެވެ. މިއީ އެހާތަނަށް އެ ކްލަބްގެ ތާރީހުގައި އެންމެ އަގުބޮޑު ޓްރާންސްފާ އެވެ. ޗެލްސީގެ ޖޯޒީގައި ކުޅުނު ފުރަތަމަ މެޗުތަކުގައި ލުކާކޫގެ ފަރާތުން ރަނގަޅު ކުޅުމެއް ފެނުނު ނަމަވެސް، ސީޒަންގެ މެދުތެރެއިން އޭނާ ސްކައި ސްޕޯޓްސް އަށް ދިން އިންޓަވިއުއެއްގެ މައްސަލަ ހޫނުވެ، ޗެލްސީ ސަޕޯޓަރުންގެ ނުރުހުން އަމާޒުވި އެވެ. އެހެންވެ، އަލުން އޭނާ އިންޓަ އަށް ލޯން އެއްބަސްވުމެއްގެ ދަށުން ބަދަލުވި އެވެ.
އިންޓަ އިން ލުކާކޫގެ ޑީލް ދާއިމީ ކުރަން ކުރި މަސައްކަތުގައި ޗެލްސީއާ އެކު، އެއްބަސްވުމަކަށް ނާދެވުނެވެ. އެހެންވެ، މިދިޔަ ސީޒަނުގައި، ލުކާކޫ ވަނީ ލޯނަކަށް ރޯމާ އަށް ކުޅެފަ އެވެ. ރޯމާ އިން ވަނީ ލުކާކޫގެ އެއްބަސްވުން ދާއިމީ ކުރަން ޗެލްސީން ކީ އަގުބޮޑުވުމުން އެ ފުރުސަތު ދޫކޮށްލައިފަ އެވެ.
ލުކާކޫ އަށް ޗެލްސީގައި މުސްތަގުބަލެއް ނެތް ކަމަށް އެ ކްލަބްގެ މެނޭޖްމަންޓުން އަންގާފައިވީ ނަމަވެސް، މިހާތަނަށް އޭނާ ގަންނަން އެއްވެސް ކްލަބަކަށް ޗެލްސީން ރުހޭ އޮފާއެއް ހުށަހެޅުންވެފައި އޮތީ އުނދަގޫ ކަމަކަށެވެ. އެކަމަކު، ޗެލްސީގެ ކުރީގެ ކޯޗު އެންޓޯނިއޯ ކޮންޓޭ ހަވާލުވި ނަޕޯލީން މިހާރު ވަނީ ލުކާކޫ ގަންނަން ޗެލްސީ އަށް ފަރުޖައްސާލެވޭނެ ބިޑެއް ހުށަހަޅައިފަ އެވެ. އެއީ، ޖުމްލަ އެކު، 45 މިލިއަން ޑޮލަރު ދޭ ގޮތަށް ކަމަށް ރިޕޯޓްތައް ބުނެ އެވެ.
މި ފަހަރުގެ ޓްރާންސްފާގައި ޗެލްސީން ގަތް 11 ކުޅުންތެރިންނަށް ފަހު، އެ ކްލަބްގެ ސްކޮޑުގެ ކުޅުންތެރިންގެ އަދަދު ވަނީ 40 އަށް ވުރެ މަތިވެފަ އެވެ. ޗެލްސީން އަންނަނީ ކުޅުންތެރިން ވިއްކައިގެން ސްކޮޑު ކުޑަކުރަން މަސައްކަތް ކުރަމުންނެވެ.
