ގޯތި ނުލިބޭ ގޮތަށް އދ. މަހިބަދޫގައި ބިން ހިއްކުމުގެ މަޝްރޫއެއް ކުރިއަށް ގެންދަން އުޅޭތީ ރައްޔިތުން ރުޅިގަދަވެ، ހިތްހަމަނުޖެހުން ފާޅުކުރަން ފަށައިފި އެވެ.
"އަދަދު" އަށް އެނގިފައިވާ ގޮތުގައި މަހިބަދޫ ރައްޔިތުން ހިތްހަމަނުޖެހުނީ އެ ރަށުގައި އެމްޓީސީސީން ހިންގަން ތައްޔާރުވަމުން އަންނަ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއާ ގުޅިގެންނެވެ. ރައްޔިތުން ކަންބޮޑުވުން ފާޅުކުރަމުން އަންނަނީ މަޝްރޫއުގެ ތެރެއިން ބޯހިޔާވެހިކަން ހައްލު ނުވާތީ އެވެ. ހިއްކާ ތަނުން ގޯތި ދިނުމުގެ ބަދަލުގައި މިހާރު އޮތް ޕްލޭނަކީ ޕިކްނިކް އައިލެންޑެއް ހެދުމެވެ.
އެނގިފައިވާ ގޮތުގައި މަހިބަދޫގައި މަޝްރޫއު ހިންގާ އެމްޓީސީސީގެ ޓީމުން ރޭ ރައްޔިތުންނާއެކު ބޭއްވި ބައްދަލުވުމުގައި މަޝްރޫއުގެ ކުރެހުން ހިއްސާ ކުރުމުން އެ ކުރެހުމާމެދު ރައްޔިތުން ވަނީ ވަރަށް ބޮޑަށް ހިތްހަމަ ނުޖެހުން ފާޅުކޮށްފަ އެވެ.
މަޝްރޫއުގެ އީއައިއޭ ހެދުމުގެ ކުރިން ރައްޔިތުންގެ ހިޔާލު ހޯދުމަށް ބޭއްވި އެ ބައްދަލުވުމުގައި ހިޔާލު ބަދަލު ކުރަމަށްފަހު، ކުއްލިއަކަށް މަޝްރޫއު ހިންގަން ފެންނަ ގޮތާމެދު ވޯޓެއް ނެގުމަށް މަސައްކަތް ކުރުމުން އެ ބައްދަލުވުން ހޫނުވެ، ވަނީ ނިންމާލައިފަ އެވެ.
މަހިބަދޫ ކައުންސިލްގެ ނައިބުރައީސް އިބްރާހިމް ޝާތިރު "އަދަދު" އަށް ވިދާޅުވީ ރޭގެ ބައްދަލުވުމުގައި ރައްޔިތުން ވަނީ އެ ރައްޔިތުންގެ ކަންބޮޑުވުން ހިއްސާ ކޮށްފައި ކަމަށާއި ގޮނޑުދޮށް ހިމާޔަތް ކުރުމުގެ މަޝްރޫއުގައި ވެސް ކަންބޮޑުވުންތައް ހުރިކަން ރައްޔިތުން ފާހަގަކުރި ކަމަށެވެ.
"ރަށުގެ ރައްޔިތުންގެ އެންމެ ބޮޑު ކަންބޮޑުވުމަކީ ރަށުގެ ބޯހިޔާވެހިކަމުގެ މައްސަލަ. ޕްރޮޖެކްޓުން އެ މައްސަލަ ހައްލުނުވާތީ އަދި ކުނީގެ މައްސަލަ ވެސް ރަށުގައި ބޮޑުކަމުން އެކަމަށް ވެސް ހައްލު ނާންނާތީ ރައްޔިތުން ކަންބޮޑުވުން ފާޅުކުރި. ގޮނޑުދޮށް ހިމާޔަތްކުރުމުގެ މަޝްރޫއިން ވެސް ގިރާ ހުރިހާ ސަރަހައްދެއް ހިމާޔަތް ނުކުރެވޭތީ ރައްޔިތުން ކަންބޮޑުވުން ފާޅުކުރި،" ޝާތިރު ވިދާޅުވި އެވެ.
ރަށުގައި ފްލެޓު އެޅުމުގެ މަޝްރޫއެއް ކުރިއަށް ގެންދަން ވެސް ސަރުކާރުގެ ފަރާތުން ހުށަހެޅި ކަމަށާއި ނަމަވެސް އެގޮތަށް ފްލެޓުގައި ދިރިއުޅެން ރައްޔިތުން ބޭނުން ނުވާ ކަމަށް ޝާތިރު ވިދާޅުވި އެވެ.
ޝާތިރު ވިދާޅުވީ ކުރީ ސަރުކާރުން މަހިބަދޫގައި ހަތް ހެކްޓަރުގެ ބިން ހިއްކުމާއި ގޮނޑުދޮށް ހިމާޔަތް ކުރަން ނިންމި ކަމަށާއި އެ ހުށަހެޅުމަށް އިތުރު އަށް ހެކްޓަރު އިތުރުކޮށްދޭން ކައުންސިލުން އެދުމުން ޖުމްލަ 15 ހެކްޓަރު ހިއްކަން އޭރު ނިންމި ކަމަށެވެ.
ނަމަވެސް އެ ޕްލޭނާ އެއްގޮތަށް މަޝްރޫއު ކުރިއަށް ގެންދިޔުމުގެ ބަދަލުގައި ގޯތި ނުލިބޭ ގޮތަށް ރަށް ކައިރީ ދަތުރު ދިޔުމަށް ރަށެއް ހިއްކުމަށް މިހާރުގެ ސަރުކާރުން މަސައްކަތް ކުރަމުން އަންނަ ކަމަށާއި އެއީ ގިނަ ރައްޔިތުން ގަބޫލުވާ ގޮތެއް ނޫން ކަމަށް ޝާތިރު ވިދާޅުވި އެވެ.
"މިހާރު ޕްލޭންގައި އޮތީ ގޮނޑުދޮށް ހިމާޔަތް ކުރުމުގެ އިތުރުން ރަށް ކައިރީ ދަތުރު ދިޔުމަށް ޕިކްނިކް އައިލެންޑެއް ހެދުން. 15 ހެކްޓަރުގެ ބިން ހިއްކުން މިހާރު ނެތް ޕްލޭނަކު. އެއީ ރައްޔިތުން ވަރަށް ކަންބޮޑުވާ ކަމެއް. މިގޮތަށް ހެދުމުން ގޯތި ނުލިބޭނެ،" ޝާތިރު ވިދާޅުވި އެވެ.
މަހިބަދޫގައި 2،700 އެއްހާ މީހުންގެ އާބާދީއެއް އޮންނައިރު، އެ ރަށުގައި 2،000 އެއްހާ މީހުން އަަންނަނީ ދިރިއުޅެމުންނެވެ. އަދި އެ ރަށުގައި ބޯހިޔާވެހިކަމުގެ މައްސަލަ ޒަމާނުއްސުރެ އޮންނަނީ ދިމާވެފަ އެވެ.
