ގިނަ އަދަދެއްގެ މަސްތުވާތަކެއްޗާއެކު ދެ ސަރަހައްދަކުން ތިން މީހަކު ފުލުހުން ހައްޔަރުކޮށްފި އެވެ.
ގއ. ވިލިނގިއްޔަށް މަސްތުވާތަކެތި އެތެރެކުރަން އުޅުނު ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ސެޕްޓެމްބަރު 4، ގެ ރޭ އެ ރަށުގައި ހިންގި އޮޕަރޭޝަނެއްގައި 126 ގްރާމް މަސްތުވާތަކެއްޗާއެކު ދެ މީހުން ހައްޔަރުކުރި އެވެ.
އެ އޮޕަރޭޝަންގައި ހައްޔަރުކުރީ ލ. ފޮނަދޫ، ކެނެރީގެ، އަލީ މުމްތާޒް, 37, އަދި ބަންގްލަދޭޝް، އިރުޝާދު މިއާ، 29، އެވެ.
އެ ދެމީހުންގެ ބަންދާ މެދު ގޮތެއް ނިންމުމަށް ވިލިނގިލި މެޖިސްޓްރޭޓް ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ.
އދ. މަހިބަދޫގައި މަސްތުވާތަކެތި ގެންގުޅޭ ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ސެޕްޓެމްބަރު 5، ގައި ހިންގި އޮޕަރޭޝަނެއްގައި މަސްތުވާތަކެތި އަޅާފައި ހުރި 12 ފިލްމު ހުސްކުރި ދަޅާއެކު މީހަކު ހައްޔަރުކުރި އެވެ.
އެ 12 ދަޅުގެ ވަގުތީ ބަރުދަނުގައި 378.75 ގްރާމު ހުރި ކަމަށް ފުލުހުން ބުންޏެވެ.
އެ އޮޕަރޭޝަންގައި ފުލުހުން ހައްޔަރުކުރީ ސ. ހިތަދޫ، ލެވީނިއާ، މުހައްމަދު ޒުނާމް ނަޖުމީ، 24، އެވެ. އޭނާ މަހިބަދޫ މެޖިސްޓްރޭޓް ކޯޓަށް ހާޒިރު ކުރުމުން ބަންދަށް ފަސް ދުވަސް ވަނީ ޖަހައިދީފަ އެވެ.
ފުލުހުން އަންނަނީ މި ދެ މައްސަލަ ވެސް ތަހުގީގު ކުރަމުންނެވެ.
