ހެމްބާގް (ޖުލައި 5) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލްގައި މިރޭ ފްރާންސްއާ އާއި ޕޯޗުގަލް ބައްދަލުކުރާއިރު، މި މެޗުން ޕޯޗުގަލް އަށް މޮޅުވެވޭނީ ޓީމެއްގެ ގޮތުގައި ކުޅެގެން ކަމަށް ޕޯޗުގަލްގެ ކޯޗު ރޮބާޓޯ މާޓިނޭޒް ބުނެފި އެވެ.
ޕޯޗުގަލް އާއި ފްރާންސް ކުރިމަތިލާއިރު، މި މެޗަކީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި ފްރާންސްގެ ކެޕްޓަން ކިލިއަން އެމްބާޕޭގެ ކުރިމަތިލުމެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
އެކަމަކު މެޗުގެ ކުރިން މީޑިއާއާ ވާހަަކަދައްކަމުން މާޓިނޭޒް ބުނީ މިރޭގެ މެޗުން މޮޅުވާނީ ޓީމެއްގެ ގޮތުގައި ކުޅެގެން ކަމަށެވެ.
"ފުޓްބޯޅައަކީ ޓީމު ކުޅިވަރެއް. ދެ ކުޅުންތެރިންގެ މެޗުގައި ކުޅޭ ކުޅިވަރެއް ނޫން. މި މެޗަކީ މުޅި ޓީމުވެސް މޮޅަށް ކުޅެންޖެހޭ މެޗެއް،" މާޓިނޭޒް ބުންޏެވެ.
"ޕޯޗުގަލް އޮތީ ތައްޔާރަށް. ޓީމަށްކުރެވެން އޮތް ހުރިހާ ކަމެއް ކުރާނަން."
ޕޯޗުގަލް އާއި ފްރާންސް އެންމެ ފަހުން ކުޅުނު 14 މެޗުގެ ތެރެއިން ފްރާންސް ބަލިވީ އެންމެ މެޗަކުންނެވެ. އެއީ 2016 ވަނަ އަހަރުގެ ޔޫރޯގެ ފައިނަލެވެ. މި ދެ ޓީމު އެންމެ ފަހުން ބޭއްވި ޔޫރޯގެ ގްރޫޕް ސްޓޭޖުގައި ކުޅެގެން ވަނީ 1-1 އިން އެއްވަރުވެފަ އެވެ.
މި ފަަހަރުގެ ޔޫރޯގެ ގަދަ 16 ގައި ސްލޮވީނިއާއާ ދެކޮޅަށް ކުޅުނު މެޗުގައި ޕޯޗުގަލް އަށް ލިބުނު ހަތަރު ހިލޭޖެހުމަކުން ކެޕްޓަން، ރޮނާލްޑޯ ގޯލާ ދިމާލަށް ޝޮޓް ހެދިޔަސް ގޯލެއް ނުޖެހުނެވެ. އެހެންކަމުން، ރޮނާލްޑޯ އަށް ވަނީ ފާޑުކިއުން އަމާޒުވެފަ އެވެ.
ވޯލްޑް ކަޕާއި ޔޫރޯގައި ރޮނާލްޑޯ ޖުމްލަ 60 ހިލޭ ޖެހުން ޖަހައިގެން ކާމިޔާބުކުރެވުނީ އެންމެ ގޯލެކެެވެ. އެއީ 2018 ވަނަ އަހަރުގެ ވޯލްޑް ކަޕްގައި ސްޕެއިން ކޮޅަށް ޖެހި ގޯލެވެ.
މިރޭގެ މެޗުަގައި ރޮނާލްޑޯއަށް ހިލޭޖެހުންތައް ނުދޭން ނިންމާފަައިވޭތޯ ސުވާލުކުރުމުން މާޓިނޭޒް ބުނީ އެއީ އޭނާގެ ނިންމުމެއް ނޫން ކަމަށެވެ.
"ޓްރެއިނިންގައި ހިލޭޖެހުންތައް ފަރިތަކުރަން. އެކަން (ޖަހާނެ ކުޅުންތެރިއެއް) ނިންމާނީ ރޮނާޕްޑޯ އާއި (ބްރޫނޯ) ފެނާންޑޭޒް ވާހަކަދައްކައިގެން. ރަނގަޅަށް ހިލޭޖެހުން ޖަހާ ދެ ކުޅުންތެރިން ތިބީމަ ވަރަށް އުފާވޭ،" މާޓިނޭޒް ބުންޏެވެ.
ޕޯޗުގަލް އާއި ފްރާންސް ކުޅޭ މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ.
