ޑޯޓްމަންޑް (ޖޫން 29) - ޖަރުމަނަކީ މި ފަހަރުގެ ޔޫރޯ ފުޓްބޯޅަ މުބާރާތް ބާއްވާ ގައުމު ކަމަށްވާތީ ވަކިން ހާއްސަކޮށް އެ ޓީމުން ކާމިޔާބު ހޯދަން ޖެހޭ ކަމަށް ގަބޫލުކުރަން ނުޖެހޭ ކަމަށާއި ކޮންމެ މުބާރާތަކަށް ވެސް ޖަރުމަނަކީ ތަށްޓަށް ނުކުންނަ ޓީމެއް ކަމަށް ޖަރުމަނުގެ ކޯޗު ހޫލިއަން ނާގަލްސްމަން ބުނެފި އެވެ.
ޖަރުމަނުން ގްރޫޕް ސްޓޭޖުގައި ކުޅުނު ފުރަތަމަ ދެ މެޗުން ސްކޮޓްލެންޑާއި ހަންގޭރީ އަތުން މޮޅުވި ނަމަވެސް ގްރޫޕްގެ ފަހު މެޗުން ސްވިޒަލެންޑް އަތުން ސަލާމަތްވީ ކިރިޔާ އެވެ. ފަހު ވަގުތު ޖެހި ގޯލުން ސްވިޒަލެންޑާ 1-1 އިން ޖަރުމަނު އެއްވަރުވިއިރު، ޖަރުމަނު ދިޔައީ ގްރޫޕްގެ އެއް ވަަނަ އެވެ.
ގަދަ 16 ބުރުގައި މިރޭ ޖަރުމަނުން ޑެންމާކާ ކުޅޭއިރު، ނާގަލްސްމަން ބުނީ އެ ގައުމުގެ ފުޓްބޯޅަ ސަޕޯޓަރުންގެ އުންމީދުތައް މަތީގައި ހުރުމަކީ އާ ކަމެއް ނޫން ކަމަށެެވެ.
"މުބާރާތް ބާއްވާ ގައުމަށް ވިޔަސް އަދި ނުވިޔަސް. ޖަރުމަނުގެ ޓީމާ މެދު ކުރާ އުންމީދުތައް ހުންނާނީ އަބަދުވެސް އެންމެ މަތީގައި. ސަޕޯޓަރުން ވެސް އަދި ކޮންމެ މީހަކު ވިޔަސް. ސަޕޯޓަރުން އަހަރެމެންނަށް ވަރަށް ސަޕޯޓް އެބަކުރޭ. މަގުތައް މަތިން އެ ފެންނަ މަންޒަރުތަކުން އަހަރެމެންނަށް އިތުރު ހިތްވަރެއް ލިބޭ،" ނާގަލްސްމަން ބުންޏެވެ.
ސްވިޑެންގައި 1992 ވަނަ އަހަރު ބޭއްވި ޔޫރޯގެ ޗެމްޕިއަންކަން، ޑެންމާކުން ހޯދީ ފައިނަލުގައި ޖަރުމަނު އަތުން 2-0 އިން މޮޅުވެގެންނެވެ. ޑެންމާކުން މިރޭ ޖަރުމަނާ ކުޅޭއިރު ވެސް އެ ފަދަ ނަތީޖާއެއް ނެރެން އުންމީދުކުރާނެ ކަމަށް ނާގަލްސްމަން ގަބޫލުކުރެ އެވެ. އަދި ޑެންމާކުގެ ކޯޗު ކެސްޕާ ހިއުލްމަންޑް އަކީ ހުނަރުވެރި މޮޅު ކޯޗެއް ކަމަށް ނާގަލްސްމަން ވަނީ ބުނެފަ އެވެ.
"އަހަރެން ޑަސަލްޑޯފްގައި އޮތް ބައްދަލުވުމެއްގައި އޭނަ (ހިއުލްމަން)އާ ބައްދަލުވި. އޭނަ އަކީ ވަރަށް ފުޓްބޯޅައިގެ މީހެއް. ޑެންމާކްގައި އޭނާ އަށް ކާމިޔާބީ އަށް އެދުނަސް، އަހަރެން މާދަމާ (މިރޭ) ބޭނުމީ މޮޅުވާން،" ނާގަލްސްމަން ބުންޏެވެ.
މިއީ ބައިނަލްއަގުވާމީ މުބާރާތްތަކުގައި ޖަރުމަނާއި ޑެންމާކްގެ ފަސް ވަނަ މެޗެވެ. މީގެ ކުރިން ކުޅުނު މެޗުތަކަށް ބަލާއިރު، ކޮންމެ ޓީމެއް ވަނީ ދެ މެޗުން މޮޅުވެފަ އެވެ. ނޮކައުޓް ބުރެއްގައި މީގެ ކުރިން މި ދެ ޓީމު ބައްދަލުކުރީ 1992 ވަނަ އަހަރުގެ ފައިނަލުގަ އެވެ.
ޑެންމާކާއި ޖަރުމަނު ކުޅޭ މެޗު ފަށާނީ މިރޭ 12 ޖަހާއިރު އެވެ.
