ލަންޑަން (މެއި 16) - ވީޑިއޯ އެސިސްޓަންޓް ރެފްރީ (ވީއޭއާރް)، އިނގިރޭސި ޕްރިމިއާ ލީގުގައި ބޭނުންކުރުން ހުއްޓާލުމަށް، އެ ލީގުގެ ކްލަބްތަކުން އަންނަ މަހު ވޯޓެއް ނަގަން ތައްޔާރުވެއްޖެ އެވެ.
ވުލްވްސް އިން އިސްނަގައި، ހުށަހެޅި މި ޕްރޮޕޯސަލްގެ ވޯޓަށް އަހާނީ އަންނަ މަހުގެ ހަ ވަނަ ދުވަހު ނަގާ ވޯޓުންނެެވެ. އެ ގޮތުން، އެ ވޯޓުގައި، 20 ކްލަބްގެ ތެރެއިން 14 ޓީމުގެ ތާއީދު ލިބިއްޖެނަމަ، އަންނަ ސީޒަނުން ފެށިގެން ޕްރިމިއާ ލީގުގައި ވީއޭއާރް ބޭނުމެއް ނުކުރާނެ އެވެ.
ޕްރިމިއާ ލީގުގައި ވީއޭއާރް ބޭނުންކުރަން ފެށީ، 2019/2020 ސީޒަނުން ފެށިގެންނެވެ.
ވީއޭއާރް ބޭނުންކުރުން ހުއްޓާލަން ތާއިދުކުރާ ކްލަބްތަކުން ބުނެފައިވަނީ، ވީއޭއާރް ގެނައީ ވަރަށް ގިނަ ކަންކަން ރަނގަޅުވާނެ ކަމުގެ އުންމީދުގައި ކަމަށާއި އެކަމަކު، ބޭނުންވި ވަރުގެ ރަނގަޅު ނިންމުން ތަކެއް އައުމުގެ ބަދަލުގައި، އެ ގަވާއިދާ އެކު، ކުރިމަތިވި މައްސަލަތައް ވީ އިތުރު ކަމަށެވެ.
ވުލްވްސް އިން ބުނީ މައްސަލަ ހުށަހެޅުމުގައި އިސްނަގަން ނިންމި އެންމެ ބޮޑު ސަބަބަކީ، ވީއޭއާރްގެ ސަބަބުން މެޗުތަކަށް ވަރަށް ބޮޑު ނޭދެވޭ އަސަރުތަކެއް ކޮށް، ލީގުގެ ކަންކަން ރަނގަޅު ކުރުމުގެ ބޭނުމުގައި ކަމަށެވެ.
ޕްރިމިއާ ލީގުން ނެރުނު ބަޔާނެއްގައި ބުނީ، ކްލަބްތަކުން ޕްރޮޕޯސަލެއް ހުށަހެޅި ނަމަވެސް، ލީގުގެ ވިސްނުމަކީ، އަދިވެސް ވީއޭއާރްއާ އެކު ކުރިއަށްދިން ކަމަށެވެ. އެކަމަކު، މީގެ ކްލަބްތަކުން ބޭނުންވެއްޖެ ހިނދެއްގައި ކަންކަން ބަދަލުކުރުމުގެ އިހުތިޔާރު އޮންނާނެ ކަަމަށް ވެސް ބުނެފައިވެ އެވެ.
ވީއޭއާރް އުވާލުމުގެ ޕްރޮޕޯސަލް އެޖެންޑާ ކޮށްފައިވާއިރު، އެންމެ ފަހުން ޕްރިިމިއާ ލީގުގެ ކްލަބްތަކުން ވަނީ އަންނަ ސީޒަނުން ފެށިގެން، ސެމީ އޮޓޮމެޓިކް އޮފްސައިޑް ސިސްޓަމް އަށް އަމަލުކުރަން ފަށަން ވޯޓުން ފާސްކޮށްފަ އެވެ.
