ދެކުނު އޭޝިއާގެ ބޮޑީބިލްޑިން މުބާރާތް މި ފަހަރު ވެސް ރާއްޖޭގައި ބޭއްވުމަށް ނިންމާފައިވާ ކަމަށް ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް) އިން ހާމަކޮށްފި އެވެ.
މި ފަހަރުގެ މުބާރާތް ތާވަލުކޮށްފައިވަނީ، ޖޫން 6-10 އަށެވެ.
ޒުވާނުންގެ މަރުކަޒުގެ އިންޑޯ ހޯލުގައި މިދިޔަ އަހަރު ކުރިއަށްދިޔަ ސައުތު އޭޝިއަން ބޮޑީބިލްޑިން ޗެމްޕިއަންޝިޕުގައި ހަ ގައުމަކުން އެތުލީޓުން ވާދަކުރި އެވެ. އެއީ، އިންޑިއާ، ނެޕާލް، ޕާކިސްތާން، އިންޑިއާ، އަފްގާނިސްތާން އަދި ރާއްޖެ އެވެ.
އެ މުބާރާތުގައި ވާދަކޮށް ރާއްޖޭގެ އެތުލީޓުން ވަނީ ގިނަ މެޑަލްތަކެއް ހޯދައިފަ އެވެ. އެ ގޮތުން، ރާއްޖޭން ހަތަރު ރަން މެޑަލް އާއި ހަތަރު ރިހި މެޑަލް އަދި ބްރޯންޒް މެޑެއްޔެއް ހޯދައިފައިވެ އެވެ. މި މެޑަލްތަކުގެ ތެރެއިން ހާއްސަ އީ މުހައްމަދު މޫސާ (މޯޑް) އާއި އަޒްނީން ރަޝާދު ހޯދި ރަން މެޑަލް އެވެ. މި ދެ އެތުލީޓުން ވަނީ އެންމެ ފޯކަސް ކުރާ ކެޓަގަރީން ރަން މެޑަލް ދިފާއުކޮށްފަ އެވެ.
ރާއްޖޭން ޖެހިޖެހިގެން، ދެ ވަނަ ފަަހަރަށް ދެކުނު އޭޝިއާގެ ބޮޑީބިލްޑިން މުބާރާތް ހޯސްޓްކުރަން ތައްޔާރުވަމުން އަންނައިރު، މީގެ ކުރިން، 2022 ވަަނަ އަހަރު ވަނީ އޭޝިއާގެ ބޮޑީބިލްޑިން މުބާރާތް ރާއްޖޭގައި ބާއްވައިފަ އެވެ. އެ ފަހަރު މުބާރާތް ހޯސްޓްކުރީ، ކ. މާފުށީގަ އެވެ.
ރާއްޖޭން އެންމެ ފުރަތަމަ ބައިނަލްއަގުވާމީ ބޮޑީބިލްޑިން މުބާރާތެއް ހޯސްޓްކުރީ ދެހާހުގެ ކުރީކޮޅުގަ އެވެ. އެންމެ ފުރަތަމަ، ރާއްޖޭގައި އިންޓަނޭޝަނަލް ބޮޑީބިލްޑިން މުބާރާތް ބޭއްވީ 2001 ވަނަ އަހަރު ދެކުނު އޭޝިއާގެ ގައުމުތަކުގެ މެދުގައި ބަނޑޮހުގަ އެވެ. އެހެންކަމުން، މި އަހަރަކީ، ރާއްޖޭގައި މި ސަރަހައްދުގެ ގައުމުތަކުގެ މެދުގައި ބޮޑީބިލްޑިން މުބާރާތެއް ހޯސްޓްކުރާ ތިން ވަނަ ފަހަރެވެ.
ރާއްޖޭގައި ވޯލްޑް ބޮޑީބިލްޑިން ޗެމްޕިއަންޝިޕް ބޭއްވުމުގެ މަސައްކަތް ވެސް އަންނަނީ ކުރަމުންނެވެ.
