ރާއްޖޭގެ ކުޅިވަރު ކުރިއެރުވުމަށް ތައްޔާރުކުރާ ދުރުރާސްތާ ޕްލޭނުގެ ތެރެއިން، އޭޝިއަން ގޭމްސް ރާއްޖޭގައި ހޯސްޓް ކުރުމުގެ އުންމީދީ މަސައްކަތާއި، އޮލިމްޕިކްސް އިން މެޑަލް ހޯދުމުގެ ހުވަފެނުގައި ގިނަ ކަންތައްތައްތަކެއް މަގުފަހިކޮށްދިނުމަށް ހިމަނައި، އެ ޕްލޭން ލޯންޗްކޮށްފި އެވެ.
ރާއްޖޭގެ ކުޅިވަރުގެ ދުރު ރާސްތާ ޕްލޭން އެކުލަވާލުމުގައި، އެމެރިކާގެ، އިންޓަނޭޝަނަލް ކޯޗިން އެންރިޗްމަންޓް ސެޓިފިކެޓް ޕްރޮގްރާމް (އައިސީއީސީޕީ)ގެ އެހީތެރިކަން ހޯދުމަށް، ރާއްޖޭގައި ވަނީ ހަފްތާއެއްގެ ދިގު، ހަރަކާތްތަކެއް ކުރިއަށްގެންގޮސްފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ފުރަތަމަ 100 ދުވަސްް (14 ހަފްތާ) ތެރޭގައި ކުރެވޭ ހާއްސަ މަސައްކަތެއްގެ ގޮތުގައި، ތައްޔާރުކުރި މި ޕްލޭން ލޯންޗްކުރުން، އޮތީ އިއްޔެ، ހ. މީރުމާގައި ބޭއްވި ހާއްސަ އިވެންޓެއްގަ އެވެ.
މި ޕްލޭންގެ ތެރެއިން، ސްޓްރެޓީޖިކް ވިސްނުމެއްގައި ކަންކަން ކުރުމަށް ފަހު، ކުރިއަށް އޮތް ދިހަ އަހަރު ދުވަހުގެ ތެރޭގައި، އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި ސައުތު އޭޝިއަން ގޭމްސް ރާއްޖޭގައި ބޭއްވުމާއި، ކުރިއަށް އޮތް 20 އަހަރުގެ ތެރޭގައި، އޭޝިއަން ގޭމްސް ރާއްޖޭގައި ހޯސްޓް ކުރެވޭތޯ މަސައްކަތް ކުރުން ހިމެނެ އެވެ.
މީގެ ތެރެއިން، އައިއޯއަައިޖީ، 2031 ވަނަ އަހަރު ރާއްޖޭގައި ބޭއްވުމުގެ ފުރުސަތު މިހާރު ވެސް އޮތީ ފަހިކޮށެވެ.
މުބާރާތްތައް ރާއްޖޭގައި ހޯސްޓްކުރުމުގެ ބައިވެރިންގެ ގޮތުގައި ހިމަނާފައިވަނީ، ޓޫރިޒަމް މިނިސްޓްރީ، އިކޮނޮމިކް މިނިސްޓްރީ، ހައުސިން މިނިސްޓްރީ، މޯލްޑިވްސް އޮލިމްޕިކް ކޮމިޓީ އަދި ގައުމީ ކުޅިވަރު އެސޯސިއޭޝަންތަކެވެ.
އިއްޔެގެ އިވެންޓްގައި ސްޕޯޓްސް މިނިސްޓަރު ރާފިއު ވާހަކަ ދައްކަވަނީ،--- ފޮޓޯ: ސްޕޯޓްސް މިނިސްޓްރީ.
އެތުލީޓުންނަށް ރަނގަޅު ފެންވަރުގެ ތަމްރީން ދެމެހެއްޓެނިވި ގޮތެއްގައި ދިނުމުގެ ނިޒާމެއް ކަނޑައަޅާ ގޮތަށް ޕްލޭނުގައި ހިމަނާފައިވާއިރު، ވީހާ ވެސް އަވަހަށް އެކި ކުޅިވަރުގެ ހުނަރުވެރި ކުދިން ހޯދައި، ރަނގަޅު ތަމްރީންތައް ދީ އެ ކުދިން ކުރިއެރުވުން ހިމަނާފައިވެ އެވެ. މީގެ ދުރު ވިސްނުމަކީ، ބައިނަލްއަގުވާމީ ބޮޑެތި ގޭމްސްތަކުން ރާއްޖެ އަށް މެޑަލް ހޯދޭނެ ވަރަށް ދުރާލާ އެތުލީޓުން ޑިވެލޮޕްކުރުމެވެ. އެ ގޮތުން، ޕްލޭނުގައި ކާމިޔާބު ހޯދުމުގެ ޓާގެޓެއްގެ ގޮތުން ހިމަނާފައިވަނީ، 2030 އާއި 2034 ގެ އޭޝިއަން ގޭމްސްގައި މެޑަލެއް ހޯދުމާއި 2036 އާއި 2040ގެ އޮލިމްޕިކްސް އިން ރާއްޖެ އަށް މެޑަލެއް ގެނެވޭތޯ އެ އަޒުމުގައި މަސައްކަތް ކުރުމެވެ.
ރާއްޖޭގެ ކުޅިވަރު އެސޯސިއޭޝަންތަކުގެ ހަރަކާތްތައް މިހާރަށް ވުރެ ފުޅާވެ، އަތޮޅުތަކުގައި ވެސް ގަވާއިދުން ކަންކަން ހިންގުމަށް ވެސް މި ޕްލޭނުގައި ބާރު އަޅަ އެވެ. އަދި އެޑިއުކޭޝަން މިނިސްޓްރީއާ ގުޅިގެން، ފިޒިކަލް އެޑިއުކޭޝަން މާއްދާގެ ކަންކަން ބެލެހެއްޓުމަށް ގައުމީ ލެވަލްގެ، ކޯޑިނޭޓަރަކު ކަނޑައެޅުން ހިމެނެ އެވެ.
ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ)، އިއްޔެ ލޯންޗް ކޮށްދެއްވި ޕްލޭން، ސްޕޯޓްސް މިނިސްޓްރީ ވެބްސައިޓުން ޑައުންލޯޑް ކުރެވޭ ގޮތަށް ހުރިއިރު، މިހާރު މި ޕްލޭން މި އޮތީ، އެކި ފަރާތްތަކުގެ ހިޔާލު ހޯދުމަށް ހުޅުވާލެވިފަ އެވެ. ހިޔާލުތައް ލިބޭ މިންވަރަށް ބެލުމަށް ފަހު، ޕްލޭންގެ ކަންކަން އަލުން އިވެލުއޭޓްކުރާނެ ކަމަށް މިނިސްޓަރު ވިދާޅުވި އެވެ.
އިއްޔެ، މީރުމާގައި ބޭއްވި އިވެންޓްގައި ވަނީ ފިޓްމޯލްޑިވްސް އެޕް ވެސް ލޯންޗް ކޮށްފަ އެވެ.
