މިއުނިކް (ޖެނުއަރީ 13) - ދާދި ފަހުން މަރުވި ޖަރުމަނުގެ ފުޓްބޯޅަ ލެޖެންޑް، ފްރާންޒް ބެކެންބާއުގެ ހަނދާން އާ ކުރަން ހަރަކާތްތަކެއް ކުރިއަށްގެންދިޔަ މެޗުން، ރޭ ޖަރުމަނު ލީގުގައި ބަޔާން މިއުނިކުން ހެރީ ކޭންގެ ލަނޑަކާ އެކު، 3-0 އިން ހޮފެންހައިމް ބަލިކޮށްފި އެވެ.
މީގެ ފަސް ދުވަސް ކުރިން، ބެކެންބާއު މަރުވިއިރު، އުމުރަކީ، 78 އަހަރެވެ. ބަޔާން މިއުނިކަށް 582 މެޗު ކުޅެދިން ބެކެންބާއު ވަނީ އެ ޓީމުގެ ކުޅުންތެރިއެއް އަދި ކޯޗެއްގެ ގޮތުގައި ޖަރުމަނުގެ މުބާރާތްތައް ކާމިޔާބުކޮށްފަ އެވެ. އޭގެ ތެރޭގައި ތިން ލީގު ތަށްޓާއި، ޔޫރަޕްގެ ކްލަބް މުބާރާތް ތިން ފަހަރު ހޯދުން ހިމެނެ އެވެ.
ރޭގެ މެޗުގައި ބަޔާނުން ބޭނުންކުރި ޖޯޒީގައި ވަނީ ބެކެންބާއު އަށް ހާއްސަ މެސެޖެއް ލިޔެފަ އެވެ. ސަޕޯޓަރުން ވެސް ވަނީ ބެކެންބާއުގެ ހަނދާން އާ ކުރުމަށް ދަނޑުގައި އެކި މެސެޖް ލިޔެފައިވާ ބެނާ ބަހައްޓައިފަ އެވެ.
ލެރޯއި ސާނޭ ދިން ބޯޅައަކުން މެޗުގެ 18 ވަނަ މިނިޓްގައި، ބަޔާނަށް ލީޑުނަގައިދިނީ ޖަމާލް މުސިއާލާ އެވެ. މެޗުގެ 70 ވަނަ މިނިޓްގައި ބަޔާންގެ ދެ ވަނަ ގޯލުގައި ވެސް ފެނިގެންދިޔައީ، ފުރަތަމަ ގޯލުގެ ކޮމްބިނޭޝަން އެވެ. މުސިއާލާ ވަނީ ސާނޭ ތަނަވަސްކޮށްދިން ފުރުސަތުގެ ބޭނުންހިފައިފަ އެވެ.
ބަޔާނުން ދެ ގޯލުގެ ލީޑެއް ނެގި ފަހުން، ހޮފެންހައިމްގެ ގްރީޝާ ޕްރޮމެލް އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ.
ބަޔާންގެ ފަހު ގޯލު ޖެހީ މެޗުގެ 90 ވަަނަ މިނިޓްގައި ކޭން އެވެ. މިއީ ލީގުގައި ކޭން ޖެހި 22 ވަނަ ގޯލެވެ. ސީޒަންގެ އެއް ބައިގައި، މީގެ ކުރިން މި އަދަދަށް ގޯލު ޖެހީ ބަޔާންގެ ކުރީގެ ފޯވާޑް، ރޮބަޓް ލެވަންޑޯސްކީ އެވެ.
ލީގުގެ އެއް ވަނައިގައި އޮތް ބަޔާ ލެވަކޫސަން އަށް ވަނީ 16 މެޗުން 42 ޕޮއިންޓް ލިބިފަ އެވެ. ދެ ވަނައިގައި އޮތް ބަޔާން އަށް ވަނީ 16 މެޗުން 41 ޕޮއިންޓް ލިބިފަ އެވެ.
