ހުޅުމާލޭ އެންމެ އުތުރުގައި ތަރައްގީކުރާ "އާބަން އައިލް" ގައި ހަތް އިމާރާތެއް އަޅަން ޗައިނާގެ ހުނާން ކޮންސްޓްރަކްޝަން އިންވެސްޓްމަންޓް ގްރޫޕާއެކީ އެމްއޯޔޫއެއްގައި މިއަދު ސޮއިކޮށްފި އެވެ.
މި ފަހުމުނާމާގައި ސޮއިކުރީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން ކުރިއަށްދާ އިންވެސްޓް މޯލްޑިވްސް ފޯރަމްގެ ތެރެއިންނެވެ.
އެގޮތުން ރާއްޖޭގެ ފަރާތުން ސޮއިކުރެއްވީ ރައީސް މުއިއްޒު އަރިހުގައި ޗައިނާއަށް ވަޑައިގެން އުޅުއްވާ އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ. ހުނާން ކޮންސްޓްރަކްޝަންގެ ފަރާތުން ސޮއިކުރެއްވީ މެނޭޖިން ޑިރެކްޓަރު ކައި ޑައާންވޭ އެވެ.
މައުލޫމާތު ލިބިފައިވާ ގޮތުގައި މި އެމްއޯޔޫގެ ދަށުން ހިންގަން ރާވާފައިވާ ޕްރޮޖެކްޓުގެ އަގަކީ 50 މިލިއަން ޑޮލަރު (771 މިލިއަން ރުފިޔާ) އެވެ.
އާބަން އައިލްގެ ކޮމާޝަލް ސްޕައިން
އާބަންކޯއިން އާންމުކޮށްފައިވާ "އާބަން އައިލް"ގެ އިންވެސްޓްމަންޓު ބްރޯޝަރުގައިވާ ގޮތުގައި ކޮމާޝަލް ސްޕައިން ސަރަހައްދު ހާއްސަ ވަނީ ވިޔަފާރިތަކުގެ އިތުރުން މުނިފޫހިފިލުވާ ތަންތަނަށެވެ. އޭގެ އިތުރުން ރެސްޓޯރަންޓުތަކާއި ބްރޭންޑް އައުޓްލެޓުތަކާއި ވެލްނަސް ސެންޓަރެއް ވެސް ހުންނާނެ އެވެ.
އާބަންކޯއިން ބުނި ގޮތުގައި ގާތްގަނޑަކަށް 9500 އަކަމީޓަރުގެ އެ ސަރަހައްދުގެ އެއް ފަޅީގައި އަޅާ ހުރިހާ އިމާރާތްތަކެއް ހުންނާނީ މައިބަދަ (ސްޕައިން) ގޮތަށް ގުޅިފަ އެވެ. އެ ސަރަހައްދަށް ކޮމާޝަލް ސްޕައިންގެ ނަން ދީފައި ވަނީ އެ ކޮންސެޕްޓަށް އިމާރާތްތައް ތަރައްގީކުރަން ރާވާފައިވާތީ އެވެ.
އެ ހަތް އިމާރާތް ވެސް ހުންނާނީ ތިން ފަންގިފިލާއަށެވެ. އަދި އިމާރާތްތަކުގައި ގާތްގަނޑަކަށް 30 ވިޔަފާރި އައުޓްލެޓް ހުންނާނެ ކަމަށް އާބަންކޯއިން ކުރިން ބުނެފައި ވެ އެވެ. މި ސަރަހައްދު ވެގެން ދާނީ މިހާތަނަށް ރާއްޖޭގައި ތަރަައްގީކުރެވޭ އެންމެ ބޮޑު ސިނާއީ ސަރަހައްދަށެވެ.
