ލަންޑަން (ޖެނުއަރީ 8) - އިނގިރޭސި އެފްއޭ ކަޕްގެ ތިން ވަނަ ބުރުގައި ހަޑްސްފީލްޑް ޓައުން އަތުން 5-0 މޮޅުވެ، މެންޗެސްޓާ ސިޓީން މުބާރާތުގެ ހަތަރު ވަނަ ބުރުން ފުރުސަތު ހޯދިއިރު، ލިވަޕޫލުން ރަށުންބޭރުގައި 2-0 އިން މޮޅުވެ، އާސެނަލް ކަޓުވާލައިފި އެވެ.
ސިޓީން އަމިއްލަ ދަނޑުގައި ކުޅުނު މެޗު އެންމެ ހާއްސަވީ، 149 ދުވަހަށް ފަހު، އަނިޔާއިން ރަނގަޅުވެގެން އައި، އެ ޓީމުގެ ކެޕްޓަން، ކެވިން ޑި ބްރޭނާ އަށެވެ. އޭނާ ވަނީ ދެ ވަނަ ހާފުގައި ބަދަލެއްގެ ގޮތުގައި ކުޅެން އަރައި މޮޅު ކުޅުމެއް ދައްކައިފަ އެވެ.
މެޗަށް ފަހު، ސިޓީގެ ކޯޗު ޕެޕް ގާޑިއޯލާ ވެސް ވަނީ އެކަން ފާހަގަކޮށްފަ އެވެ.
އިއްތިހާދު ސްޓޭޑިއަމްގައި ކުޅުނު މެޗުގައި ސިޓީން ފުރަތަމަ ހާފު ނިންމާލީ ފިލް ފޯޑެން އާއި ޖޫލިއަން އަލްވަރޭޒްގެ ލަނޑުތަކާ އެކު، ދެ ގޯލުން ކުރީގައި އޮވެގެންނެވެ. ދެ ވަނަ ހާފުގައި ކުޅެން ނުކުމެ، ފޯޑެން ވަނީ ސިޓީ އަށް އިތުރު ގޯލެއް ޖަހައިދީފަ އެވެ. ސިޓީން މި މެޗުގައި ޖެހި އެއް ގޯލަކީ، ހަޑްސްފީލްޑްގެ ބެން ޖެކްސަން އަތުން ބައިކޮޅަށް ވަން ގޯލެކެވެ.
ސިޓީން ޖެހި ފަހު ލަނޑަކީ، ޑި ބްރޭނާ ދިން ބޯޅައަކުން ޖެރެމީ ޑޮކޫ ކާމިޔާބުކުރި ގޯލެކެވެ. ޑޮކޫ ވެސް މި މެޗުގައި ކުޅެފައިވަނީ އަނިޔާއަކުން ރިކަވާވެގެން އައިހެވެ.
އަލުން ކުޅެން ނުކުތް، ޑި ބްރޭނާ އަށް މި މެޗުގައި ސިޓީގެ ސަޕޯޓަރުންގެ ފަރާތުން ބޮޑު ތަރުހީބެއް ލިބުނެވެ.
ޑި ބްރޭނާ ކުޅެން ނުކުތުމުން ރުބެން ޑިއާސް (ވ) ކެޕްޓަން ބޭންޑް ހަވާލުކުރަނީ.
އާސެނަލް ދަނޑުގައި މިރޭ ލިވަޕޫލުން ކުޅުނު މެޗުގައި އެ ޓީމުން ކުޅުނީ އެފްރިކަން ކަޕް އޮފް ނޭޝަންސް އަށް ދިޔަ މިސްރުގެ ފޯވާޑް މުހައްމަދު ސަލާހު އާއި އަނިޔާގެ ސަބަބުން މި މެޗުގައި ނުކުޅެވުނު ވާޖިލް ވެން ޑައިކް، އެންޑީ ރޮބަޓްސަން އަދި ޑޮމިނިކް ސޮބޯސްލާއި ނުލަ އެވެ.
އާސެނަލުން މެޗުގައި ލީޑުނަގަން ކުރި އެޓޭކެއްގައި އެ ޓީމުގެ ކެޕްޓަން، މާޓިން އޮޑެގާޑް ޖެހި ބޯޅައެއް ހުރަސްދަނޑިއަށް އަމާޒުވިއިރު، ކައި ހަވާޓްޒް އަށް ގޯލު ކުރިމަތިން ހުސްކޮށް ލިބުނު ފުރުސަތެއްގައި ބޯޅަ ގޯލަށް ފޮނުވާނުލެވުނެވެ.
ފުރަތަމަ ހާފުގައި ލިވަޕޫލްގެ ކެޕްޓަން ބޭންޑް އަޅައިގެން މި މެޗުގައި ކުޅުނު ޓްރެންޓް އަލެކްސަންޑާ-އާނޯލްޑް ޖެހި ޝޮޓެއް ހުރަސްދަނޑިއަށް އަމާޒުވި އެވެ.
ދެ ވަނަ ހާފުގައި ބަދަލުތަކާ އެކު، ލިވަޕޫލްގެ ކުޅުން ރަނގަޅުވިއިރު، ލިވަޕޫލުން ލީޑުނެގީ، 80 ވަނަ މިނިޓްގަ އެވެ. އާނޯލްޑް ހިލޭ ޖެހުމަކުން ނެގި ބޯޅައެއް ގޯލަށް ވަނީ އާސެނަލްގެ ޑިފެންޑަރު، ޔަކޫބް ކީވިއޯ ބޮލުގައި ޖެހިފަ އެވެ.
އިތުރު ވަގުތުގެ ހަތަރު ވަނަ މިނިޓްގައި، ކައުންޓަ އެޓޭކެއްގައި ލިވަޕޫލްގެ ދެ ވަނަ ގޯލު ޖެހީ ލުއިޒް ޑިއާޒް އެވެ. މި މެޗުގައި ޑިއާޒް ފޮނުވާލި ރަނގަޅު އެއް ހަމަލާއެއް، އާސެނަލްގެ ކީޕަރު އާރޮން ރަމްސްޑޭލް ހުއްޓުވި ނަމަވެސް، އިތުރު ވަގުތުގައި ލިބުނު ފުރުސަތުން ޑިއާޒް ޖެހި ޝޮޓް އަމާޒުވީ ގޯލުގެ މަތީ ކަނަށެވެ.
އާސެނަލް އެންމެ ފަހުން ކުޅުނު ހަތް މެޗުގެ ތެރެއިން މޮޅުވީ އެންމެ މެޗަކުންނެވެ.
އެފްއޭ ކަޕްގެ ތިން ވަނަ ބުރުގައި މިރޭ ޕްރިމިއާ ލީގުގެ ތިން ޓީމެއް ކުޅުނު މެޗުތައް އެއްވަރުވެ، ރީޕްލޭ އަކަށް ވަނީ ދާން ޖެހިފަ އެވެ. އެ ގޮތުން، ލޫޓަން ކުޅުނު މެޗުން ވަނީ ބޯލްޓަންއާ 0-0 އިން އެއްވަރުވެފަ އެވެ. ނޮޓިންހަމް ފޮރެސްޓް ވަނީ އަމިއްލަ ދަނޑުގައި ބްލެކްޕޫލާ 2-2 އިން އެއްވަރުވެފަ އެވެ. އަދި ވެސްޓް ހޭމް ޔުނައިޓެޑް، އަމިއްލަ ދަނޑުގައި ބްރިސްޓޯލް ސިޓީއާ ބައްދަލުކުރި މެޗު ނިމުނީ 1-1 އިން އެއްވަރުވެެގެންނެވެ.
