ބްރިސްބޭން، އޮސްޓްރޭލިއާ (ޖެނުއަރީ 1) - އިންޑިއާގައި މިދިޔަ އަހަރު ބޭއްވި ވަންޑޭއިންޓަނޭޝަނަލް (އޯޑީއައި/ޓެސްޓް ކްރިކެޓް) ކްރިކެޓް ވޯލްޑް ކަޕްގެ ޗެމްޕިއަންކަން އޮސްޓްރޭލިއާ އަށް ހޯދައިދޭން އެހީތެރިވި ކުޅަދާނަ ބެޓްސްމަން، ޑޭވިޑް ވާނާ، އޯޑީއައި ފޯމެޓްގެ ގައުމީ ޓީމުން ރިޓަޔާކޮށްފި އެވެ.
ބާރަ އަހަރުގެ އޯޑީއައި ކެރިއަރު ނިމުމަކަށް ގެންނަން، ވާނާ، 37، ނިންމީ މިހާރު އޮސްޓްރޭލިއާ އިން ޕާކިސްތާނާ ދެކޮޅަށް ކުޅޭ ސީރީސްގެ ކުރިންނެވެ.
އެ ގޮތުން، ވާނާ، ކުޅޭނެ ފަހު ޓެސްޓް މެޗު އޮންނާނީ އަންނަ ބުދަ ދުވަހު އެވެ.
ނޮވެމްބަރު މަހު އިންޑިއާގައި ބޭއްވި އޯޑީއައި ވޯލްޑް ކަޕްގެ ޗެމްޕިއަންކަން އޮސްޓްރޭލިއާ އިން ހޯދިއިރު، އެ ޓީމަށް އެންމެ ގިނަ ލަނޑު އެއްކޮށްދިނީ ވާނާ އެެވެ. ޕްރެޝަރު ވަގުތުތަކުގައި ވާނާގެ ތަޖުރިބާގެ ފައިދާ އޮސްޓްރޭލިއާ ޓީމަށް ވަރަށް ބޮޑު ތަފާތަކަށްވި އެވެ.
ވާނާ ބުނީ، ވޯލްޑް ކަޕެއް ކާމިޔާބު ކުރުމަށް ފަހު ރިޓަޔާކުރުމަކީ އެންމެ ރަނގަޅު ނިންމުމަށް ވާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
އެ ގޮތުން، މި ނިންމުމާ އެކު، ގިނަ އާ ކުޅުންތެރިންނަށް ޓީމުން އިތުރު ފުރުސަތު ފަހިވެގެންދާނެ ކަމަށް ވާނާ ގަބޫލުކުރެ އެވެ.
ކްރިކެޓް ދުނިޔޭގައި ބައިނަލްއަގުވާމީ ގިނަ ފުރުސަތުތަކެއް ލިބޭ ވާނާ އަކީ ދުނިޔޭގެ އެންމެ މަގުބޫލު ކްރިކެޓް ލީގު، އިންޑިއަން ޕްރިމިއާ ލީގުގައި، 14 ސީޒަން ކުޅެފައިވާ ކުޅުންތެރިއެކެވެ. ވާނާ ދެކޭގޮތުގައި، އޭނާ އަށް ލިބެމުން އައި މި ފަދަ ފުރުސަތުތައް ދެން ދޫކޮށްލަން ޖެހޭނީ އަރަމުން އަންނަ ކުޅުންތެރިންނަށެވެ.
ޓެސްޓް ކްރިކެޓުން ރިޓަޔާކުރަން ވާނާ ނިންމިިއިރު، 2011 ވަނަ އަހަރު އޭނާ ފެށި މި ދަތުރުގައި މިހާތަނަށް ވަނީ 111 ޓެސްޓް ކްރިކެޓް މެޗު ކުޅެފަ އެވެ. އެ މެޗުތަކުގައި، 8695 ލަނޑު އެއްކޮށްފައިވާއިރު، 26 ސެންޗަރީ އަދި 36 ހާފް ސެންޗަރީ ހަދާފައިވެ އެވެ. ފީލްޑިން އަށް ބަލާއިރު، ވާނާ ވަނީ 89 ވިކެޓް ނަގައިފަ އެވެ.
