މެންޗެސްޓާ (ޖެނުއަރީ 1) - އެފްރިކަން ކަޕް އޮފް ނޭޝަންސްގައި ވާދަކުރާ ކެމަރޫން ޓީމުގެ ސްކޮޑުގައި ގޯލްކީޕަރު، އަންދްރޭ އޮނާނާ، ހިމަނާފައިވާއިރު، މެންޗެސްޓާ ޔުނައިޓެޑްގެ ބައެއް މެޗުތަކުގައި ކުޅެފައި ގައުމީ ޓީމަށް ދާ ގޮތަށް ހަމަޖައްސައިދޭން އޮނާނާ އެދިއްޖެ އެވެ.
އައިވަރީ ކޯސްޓްގައި މި މަހު 13 ވަނަ ދުވަހު ފަށާ އެފްރިކަން ކަޕަށް ތައްޔާރުވާން ކެމަރޫން ޓީމުން ސައުދީ އަރަބިއްޔާގައި ޓްރެއިނިން ކޭމްޕެއް ފުރިހަމަ ކުރަން ވަނީ ނިންމައިފަ އެވެ. އަދި އެ ކޭމްޕްގައި މެޗުތަކެއް ކުޅޭ ގޮތަށް ވެސް ވަނީ ރާވައިފަ އެވެ.
ރިޕޯޓްތައް ބުނާގޮތުން، އޮނާނާ އެދިފައިވަނީ ސައުދީ އަަރަބިއްޔާ ޓްރެއިނިން ކޭމްޕްގެ ފަހުން، ކެމަރޫން ޓީމާ ގުޅެން ފުރުސަތު ދިނުމަށެވެ. އެއީ ކުރިއަށް ހުރި ޔުނައިޓެޑްގެ މެޗުތަކުގައި ކުޅެފައި، ގައުމީ ޓީމަށް ދިއުމުގެ ގޮތުންނެވެ.
އެ ގޮތުން، އޮނާނާގެ އެދުމަކީ، މި މަހު އަށް ވަނަ ދުވަހު، އެފްއޭ ކަޕްގައި ޔުނައިޓެޑުން ވިގަން އެތުލެޓިކް ދަނޑުގައި ކުޅޭ މެޗަށް ފަހު، ކެމަރޫން ޓީމަށް ދިއުމަށެވެ.
އެފްރިކަން ކަޕްގައި ކެމަރޫން ކުޅޭ ފުރަތަމަ މެޗު އޮތީ މި މަހު 15 ގައި ގިނީއާ ދެކޮޅަށެވެ. އޮނާނާގެ އެދުމާ އެއްގޮތަށް ކުރިއަށްދާނެތޯ، ގޮތެއް ނިންމުމުގެ ފުރުސަތު އޮތީ ކެމަރޫންގެ ކޯޗު ރިގޮބާޓް ސޯންގް އަތުގަ އެވެ.
އޮނާނާ ވަނީ ޓީމާ މެދު މައްސަލަތަކެއް ޖެހިގެން، 2022 ވަނަ އަހަރުގެ ވޯލްޑް ކަޕް ތެރެއިން ގައުމީ ޓީމުން ރިޓަޔާކޮށްފަ އެވެ. އެއީ، އެ ފަހަރު ކެމަރޫން ފުޓްބޯޅަ ފެޑެރޭޝަނުން އޭނާގެ ޑިސިޕްލިނަރީ މައްސަލައެއް ބަލަން އުޅޭތީ، އުފެދުނު ހިތްހަމަނުޖެހުމެއްގެ ތެރެއިން އައި ކަމެކެވެ.
ކުރިން އަޔަކްސް އަށް ކުޅެނިކޮށް މަނާބޭހުގެ މައްސަލައެއްގައި ވެސް ކުޅުމާ ދުރަށް ދާން ޖެހުނު އޮނާނާ އަލުން ގައުމީ ޓީމަށް ކުޅެން ފެށީ މިދިޔަ ސެޕްޓެމްބަރު މަހުން ފެށިގެންނެވެ.
ޔުނައިޓެޑުން އޮނާނާ ނެތް މެޗުތަކުގައި ބޭނުންކުރާނީ އެ ޓީމުގެ ދެ ވަނަ ކީޕަރު، ތުރުކީގެ އަލްޓޭ ބަޔިންދީރް އެވެ. މީގެ އިތުރުން، ތަޖުރިބާކާރު ގޯލްކީޕަރު، ޓޮމް ހީޓަން ވެސް އެބަހުރި ކަމަށް ޔުނައިޓެޑްގެ ކޯޗު އެރިކް ޓެން ހާގް ވަނީ ބުނެފަ އެވެ.
އޮނާނާ އަށް ގެއްލޭނެ ކަމަށް ބެލެވިފައިވާ މެޗުތަކަށް ބަލާއިރު، ޕްރިމިއާ ލީގުގައި ޔުނައިޓެޑުން ކުޅެން ޖެހޭ މުހިންމު ހަތަރު މެޗެއް ހިމެނެ އެވެ. އޭގެ ތެރޭގައި ޓޮޓެންހަމް ހޮޓްސްޕާސްއާ ބައްދަލުކުރަން ޖެހޭ މެޗެއް ވެސް އެބައޮތެވެ.
އިންޓަ މިލާން ދޫކޮށް އޮނާނާ މި ސީޒަނުގައި ޔުނައިޓެޑަށް ބަދަލުވީ، 60 މިލިއަން ޑޮލަރުގެ ޑީލެއްގަ އެެވެ.
