މެންޗެސްޓާ (ޑިސެމްބަރު 31) - އިނގިރޭސި ޕްރިމިއާ ލީގުގެ މިހާތަނަށް ކުޅެވުނު މެޗުތަކަށް ބަލާއިރު، ތާވަލުގެ އެއް ވަނައިގައި އޮންނަން އެންމެ ހައްގީ ލިވަޕޫލް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ލީގުގެ އެއް ވަނައިގައި މި ވަގުތު ލިވަޕޫލް އޮތްއިރު، އެ ޓީމާ އެއްވަރަށް ދެ ވަނައިގައި އޮތް އެސްޓަން ވިލާ އިން ޕޮއިންޓް ހޯދާފައިވަނީ އެއް މެޗު އިތުރަށް ކުޅެގެންނެވެ. ލިވަޕޫލަށް 19 މެޗުން 42 ޕޮއިންޓް ލިބިފައިވާއިރު، ވިލާ އަށް 20 މެޗުން ވަނީ 42 ޕޮއިންޓް ލިބިފަ އެވެ. ތިނެއްގައި މެންޗެސްޓާ ސިޓީ އޮތީ 19 މެޗުން 40 ޕޮއިންޓާ އެކު އެވެ. ހަތަރެއްގައި އޮތް އާސެނަލަށް 19 މެޗުން 40 ޕޮއިންޓް ލިބިފައިވާއިރު، މިރޭ ފުލަމް ދަނޑުގައި އާސެނަލް މޮޅުވެއްޖެނަމަ އެ ޓީމަށް އެއް ވަނަ އަށް އެރޭނެ އެވެ.
މި އަހަރު ފަސް މުބާރާތުގެ ތަށި ސިޓީން ހޯދިއިރު، މި ސީޒަނުގައި ލީގުގައި އެ ޓީމަށް އަދި އެންމެ ރަނގަޅު ފޯމުގައި ނުކުޅެވޭ ކަމަށް ގިނަ ބަޔަކު އަންނަނީ ބުނަމުންނެވެ. ރޭ ޝެފީލްޑް ޔުނައިޓެޑް އަތުން ސިޓީ މޮޅުވި މެޗަށް ފަހު ގާޑިއޯލާ ވަނީ އެ ކަމަށް އެއްބަސްވެފަ އެވެ.
"(ތަށްޓަށް އޮތް ވާދަވެރިކަން) ވަރަށް ވާންކޮށް މި ފެންނަނީ، ތެދެއް، އަހަރެމެން އަދި އެންމެ ރަނގަޅެއް ނޫން. އެއް ވަނައިގައި އެއް ވެސް ނޫން މި އޮތީ، ލިވަޕޫލް އެ މަގާމުގައި އޮތީ އެ މީހުންނަށް ހައްގުވާތީ،" މިދިޔަ ތިން އަހަރު ސިޓީ އަށް ލީގު ހޯދައިދިން ގާޑިއޯލާ ބުންޏެވެ.
"ދެން އަހަރެމެންނަށް މި އޮތީ، މަސައްކަތުން ކުރީގެ ތަފާތު ދެއްކުމުގެ ޗެެލެންޖް، ފަސޭހައެއް ނުވާނެ،"
ގާޑިއޯލާ ބުނީ އެންމެ ބޮޑު މައްސަލަ އަކަށް ދިމާވީ އަނިޔާގެ މައްސަލަތައް ކަމަށެވެ. އަދި އެފަދަ ހާލަތެއްގައި ނޮވެމްބަރާއި ޑިސެމްބަރު ތެރޭގައި ގިނަ މެޗުތަކެއް ކުޅެން ޖެހުނު ކަމަށާއި މިހާރު ޖެނުއަރީގައި މަޑުމަޑުން މެޗު މަދުވާއިރު، ޓީމު ހަމަޔަކަށް އަޅުވަން ފުރުސަތު ލިބޭނެ ކަމަށް ގާޑިއޯލާ ވަނީ ބުނެފަ އެވެ.
