މެޑްރިޑް (ޑިސެމްބަރު 29) - މި ސީޒަނަށް ރެއާލް ބެޓިސް އަށް ސޮއިކުރުމަށް ފަހު، ތަފާތު މޮޅު ކުޅުމެއް ދައްކަމުން އަންނަ ފްރާންސިސްކޯ އަލަހޯން (އިސްކޯ) އަށް އެ ޓީމުން އާ ޑީލެއް ދީފި އެވެ.
އެއްވެސް ކްލަބަކާ ނުގުޅި ހުރި އިސްކޯ، 31، މި އަހަރުގެ ޖުލައި މަހު، ބެޓިސް އަށް ބަދަލުވީ މި ސީޒަނުގެ ނިޔަލަށެވެ.
ވެލެންސިއާ އާއި މަލާގާ އަށް ކުރިން ކުޅުނު އިސްކޯ، ނުވަ އަހަރު ރެއާލް މެޑްރިޑަށް ކުޅުމަށް ފަހު، އެ ޓީމު ދޫކޮށް، މިދިޔަ އަހަރު އޮގަސްޓް މަހު ބަދަލުވީ ސެވިއްޔާ އަށެވެ. އެ ޓީމާ އެކު ދެ އަހަރުގެ ކޮންޓްރެކްޓެއްގައި ސޮއިކުރި ނަމަވެސް، މިދިޔަ އަހަރު ޑިސެމްބަރު މަހު، ސެވިއްޔާ އާއި އިސްކޯ ވަނީ މަޝްވަރާތަކެއް ބާއްވައި، ކޮންޓްރެކްޓް އުވާލައިފަ އެވެ.
އޭގެ ފަހުން، މި އަހަރު ޖެނުއަރީ މަހު، އިސްކޯ ވަނީ ޖަރުމަނުގެ ޔޫނިއަން ބާލިން އަށް ސޮއިކުރުމާ ގާތަށް ޖެހިލައިފަ އެވެ. އެކަމަކު، ފަހު ވަގުތު ޔޫނިއަން ބާލިން އިން ކޮންޓްރެކްޓް ބަދަލުކުރަން އެދުމުން އިސްކޯ އެ ޑީލަށް ފުރަގަސްދިނެވެ.
ޓީމަކާ ނުގުޅި ފަސް މަހަށް ވުރެ ގިނަ ދުވަހު ހުރުމަށް ފަހު، އިސްކޯ، މި ސީޒަނަށް ބެޓިސް އަށް ބަދަލުވީ ކުރު ކޮންޓްރެކްޓެއްގަ އެވެ. އެ ކޮންޓްރެކްޓްގައިވާ ގޮތުން، އިސްކޯ އެ ޓީމަށް 25 މެޗު ކުޅެދީފިނަމަ، އެއް އަހަރަށް ކޮންޓްރެކްޓް އިތުރުވާ މާއްދާއެއް އެބައޮތެވެ.
އެކަމަކު، ބެޓިސް އަށް އިސްކޯގެ ކުޅުން ކަމުދިއުމާ އެކު އޭނާ މިހާރު ވަނީ، 2027 ވަނަ އަހަރުގެ ޖޫންގެ ނިޔަަލަށް އެ ޓީމާ އެކު ކޮންޓްރެކްޓް އާ ކޮށްފަ އެވެ.
މި ސީޒަނުގެ މިހާތަނަށް އިސްކޯ ވަނީ ބެޓިސް އަށް 23 މެޗުން ތިން ގޯލު ޖަހައި، ހަތަރު މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ.
