ލިވަޕޫލް (ޑިސެމްބަރު 28) - އަނިޔާގެ ސަަބަބުން ޖަޕާންގެ ވިންގާ ކައޯރޫ މިޓޯމާ އަށް ކުރިއަށް އޮތް އޭޝިއަން ކަޕްގައި ޖަޕާންގެ ޓީމަށް ކުޅެވޭނަކަމުގެ ޔަގީންކަން ގެއްލިއްޖެ އެވެ.
ބްރައިޓަން އަށް ކުޅެމުންދާ މިޓޯމާ ،26، އަށް އަނިޔާވީ އިނގިރޭސި ޕްރިމިއާ ލީގުގައި މިދިޔަ ހަފުތާގައި ކްރިސްޓަލް ޕެލެސްއާ ދެކޮޅަށް ކުޅެނިކޮށެވެ.
މިޓޯމާގެ ކުޑަ ހުޅަށް ލިބުނު އަނިޔާއަކާ ގުޅިގެން އޭނާ ހަ ހަފުތާގެ މުއްދަތަކަށް ކުޅުމާ ދުރުގައި ހުންނަންޖެހިދާނެ ކަމަށް ވަނީ ބެލެވިފަ އެވެ.
ގަތަރުގައި އޭޝިއަން ކަޕް ފެށުމަށް ހަމަޖެހިފައިވަނީ އަންނަ މަހުގެ 13 ވަނަ ދުވަހު އެވެ.
ބްރައިޓަންގެ ކޯޗު ރޮބާޓޯ ޑި ޒާބީ ބުނީ މިޓޯމާގެ އަނިޔާ ރަނގަޅުވުމަށް ހަ ހަފުތާގެ މުއްދަތެއް ބޭނުންވާނެ ކަމަށެވެ. އަދި ބްރައިޓަންގެ އަނިޔާގެ މައްސަލަތައް އިތުރުވެފައިވާ ކަމަށެވެ.
"ވަރަށް އަނިޔާގެ މައްސަލަ ގިނަ ސީޒަނެއް މިއީ. ބޮޑަށް މި ދިމާވަނީ މަސްގަނޑުގެ އިންޖަރީތައް. މިއީ ގިނަ މެޗުތަކެއް ކުރު މުއްދަތެއްގެ ތެރޭގައި ކުޅެންޖެހުމުގެ ނަތީޖާ،" ޑެޒާބީ ބުންޏެވެ،
މިޓޯމާ އަކީ ޖަޕާންގެ ޓީމަށް މުހިންމު ކުޅުންތެރިއެކެވެ. އަދި އޭޝިއަން ކަޕްގައި އޭނާ ނެތްތަން ފޫބެއްދުމަކީ ޖަޕާނަށް ފަސޭހަ ކަމަކަށް ނުވާނެ އެވެ. އެއީ މި ފަހުން ޖަޕާނުން ހޯދި މޮޅުތަކުގައި މިޓޯމާ އިސް ރޯލެއް އަދާކޮށްފައިވާތީ އެވެ.
