މިއުނިކް (ޑިސެމްބަރު 20) - ބަޔާން މިއުނިކް އަށް ކުޅެމުންދާ ތަޖުރިބާކާރު ފޯވަޑް ތޯމަސް މުލާގެ ކޮންޓުރެކްޓް އެ ކްލަބުން އާކޮށްފި އެވެ.
މުލާ، 34، ބަޔާންއާ އެކު ހަދާފައިވާ ކޮންޓުރެކްޓް ހަމަވާން އޮތީ މި ސީޒަންގެ ނިޔަލަށެވެ. އެހެން ނަަމަވެސް، ބަޔާން އިން މިހާރު ވަނީ 2025 ވަނަ އަހަރާ ހަމައަށް އޭނާގެ ކޮންޓުރެކްޓް އާކޮށްފަ އެވެ.
"ވަރަށް އުފާވެއްޖެ ބަޔާންގެ ކޮންޓުރެކްޓް އާކުރެވުނީމަ. މި ކްލަބާއެކު ކާމިޔާބީތައް ހޯދަން ދެމިހުންނަން ބޭނުން،" މުލާ ބުންޏެވެ.
ބަޔާންގެ ސްޕޯޓިން ޑިރެކްޓާ ކްރިސްޓޯފް ފްރޮއިންޑް ބުނީ މުލާ އަކީ ދަނޑު މަތީގައި އަދި ދަނޑުން ބޭރުގައި ވެސް ލީޑަރެއް ކަމަށާއި އަރަމުން އަންނަ ޒުވާން ކުޅުންތެރިންނަށް ހުރި މިސާލެއް ކަމަށެވެ.
ބަޔާންގެ ކެޕްޓަންގެ ގޮތުގައި މި ސީޒަންގައި މެޗުތަކެއް ކުޅުނު ނަމަވެސް، ކޯޗު ތޯމަސް ޓުޗެލް ހަވާލުވި ފަހުން މުލާ އަށް ފުރަތަމަ 11 އިން ގަވައިދުން ޖާގައެއް ނުލިބެއެވެ.
މުލާ 2000 ވަނަ އަހަރު ބަޔާންގެ އެކެޑަމީ ޓީމާ ގުޅުނުއިރު އޭނާގެ އުމުރަކީ 10 އަހަރެވެ. އެ ހިސާބުން ފެށިގެން އޭނާގެ މުޅި ކެރިއަރު ހޭދަކޮށްފައިވަނީ ބަޔާންގަ އެވެ.
ބަޔާންގައި މުލާ 684 މެޗު ކުޅެ، 237 ލަނޑު ޖަހާފައިވާއިރު، އެ ޓީމާ އެކު އޭނާ ވަނީ 12 ފަހަރު ޖަރުމަން ލީގު ކާމިޔާބުކޮށްފަ އެވެ. އަދި ދެ ފަހަރު ޗެމްޕިއަންސް ލީގުވެސް ކާމިޔާބުކުރިއެވެ.
