ނިއުޔޯކް (ޑިސެމްބަރު 15) - މިދިޔަ އަހަރުގެ ފީފާ ވޯލްޑް ކަޕްގައި މެސީ ބޭނުންކުރި ހަ ޖާޒީއެއް 6.1 މިލިއަން ޕައުންޑަށް (7.8 މިލިއަން ޑޮލަރަށް) ވިއްކާލައިފި އެވެ.
މެސީގެ ކެޕްޓަންކަމުގެ ދަށުން އާޖެންޓީނާ އިން 2022ގެ ވޯލްޑް ކަޕް ކާމިޔާބުކުރީ ފައިނަލުގައި ފްރާންސް ބަލިކޮށްގެންނެވެ. މިއީ 1986 ވަނަ އަހަރުގެ ފަހުން އާޖެންޓީނާ އިން ވޯލްޑް ކަޕް ކާމިޔާބުކުރި ފުރަތަމަ ފަހަރެވެ.
ވޯލްޑް ކަޕްގައި މެސީ ބޭނުންކުރި ހަ ޖާޒީއެއް ވިއްކާލުމަށް ކުރިއަށްދިޔަ ނީލަން އޮތީ އެމެރިކާގެ ނިއުޔޯކުގަ އެވެ. މި ނީލަމުގައި ވިއްކާލި ހަ ޖާޒީ އަކީ ވޯލްޑް ކަޕްގެ ގްރޫޕް ސްޓޭޖުގެ ދެ މެޗުގައި އޭނާ ބޭނުންކުރި ދެ ޖާޒީ އާއި ގަދަ 16، ކުއާޓާ ފައިނަލް، ސެމީ ފައިނަލް އަދި ފައިނަލުގެ ފުރަތަމަ ހާފުގައި މެސީ ބޭނުންކުރި ޖާޒީތަކެވެ.
ވޯލްޑް ކަޕްގެ ހުރިހާ މެޗެއްގައި މެސީ ކުޅުނުއިރު، އޭނާ ބޭނުންކުރި ޖާޒީތަކުގެ ތެރެއިން ވިއްކާލާފައިވަނީ ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ސައުދީ އަރަބިއްޔާ އަދި ޕޮލަންޑާ ދެކޮޅަށް ކުޅުނު މެޗުގެ ދެ ޖާޒީ އެވެ. އޮސްޓްރޭލިއާއާ ދެކޮޅަށް ކުޅުނު މެޗުގައި މެސީ ބޭނުންކުރި ޖާޒީ އޭނާ ދިނީ އޮސްޓްރޭލިއާ ޓީމުގެ ކެމެރޮން ޑެލްވިން އަށެވެ.
މެސީގެ ޖާޒީތައް 6.1 މިލިއަން ޕައުންޑަށް (7.8 މިލިއަން ޑޮލަރަށް) ވިއްކާލިއިރު، މިހާތަނަށް ދުނިޔޭގެ ތާރީޚުގައި ވިއްކާލި އެންމެ އަގުބޮޑު ފުޓްބޯޅަ ޖާޒީ އަކީ ޑިއޭގޯ މަރަޑޯނާގެ ޖާޒީއެކެވެ. އެ ގޮތުން، 1986 ވަނަ އަހަރު އާޖެންޓީނާ އާއި އިންގްލެންޑް ވާދަކުރި މެޗުގައި މަރަޑޯނާ "އަތުން" ގޯލު ޖެހި މެޗުގައި އޭނާ ލައިގެން ހުރި ޖާޒީ މިދިޔަ އަހަރު ވިއްކާލީ 7.1 މިލިއަން ޕައުންޑަށެވެ.
މެސީގެ ޖާޒީތައް ވިއްކައިގެން ލިބުނު ފައިސާއިން ބައެއް ހަދިޔާކުރުމަށް ހަމަޖެހިފައިވަނީ މެސީގެ ފައުންޑޭޝަނާއި ގުޅުން އޮންނަ ބާސެލޯނާގެ ކުޑަކުދިންގެ ހޮސްޕިޓަލަކަށެވެ.
