ބްރުސެލްސް، ބެލްޖިއަމް (ޑިސެމްބަރު 14) - ބެލްޖިއަމްގެ ރޯޔަލް އެންޓްވާޕުން އިތުރު ވަގުތުގައި ޖެހި ގޯލުން 3-2 އިން ބާސެލޯނާ ބަލިކޮށް، ޗެމްޕިއަންސް ލީގުގައި ފުރަތަމަ ފަހަރަށް މޮޅެއް ހޯދައިފި އެވެ.
ރޭގެ މެޗުގެ ކުރިން ޗެމްޕިއަންސް ލީގުގައި ރޯޔަލް އެންޓްވާޕުން ކުޅުނު ފަސް މެޗުން ވެސް ވަނީ ބަލިވެފަ އެވެ. މި ފަހަރުގެ ޗެމްޕިއަންސް ލީގަށް ރޯޔަލް އެންޓްވާޕް ކޮލިފައިވީ މިދިޔަ ސީޒަނުގެ ބެލްޖިއަމް ލީގު ކާމިޔާބުކޮށްގެންނެވެ. މިއީ، 1957 ވަނަ އަހަރުގެ ފަހުން އެ ޓީމަށް ބެލްޖިއަމް ލީގު ކާމިޔާބުވި ފުރަތަަމަ ފަހަރެވެ.
އަމިއްލަ ދަނޑުގައި ކުޅުނު ރޭގެ މެޗު ފަށައިގެން، 90 ސިކުންތު ތެރޭގައި ޒުވާން ކުޅުންތެރިޔާ، އާތޫރު ވާމީރެން ވަނީ ގޯލެއް ޖަހައި ރޯޔަލް އެންޓްވާޕް އަށް ލީޑުނަގައިދީފަ އެވެ. އެކަމަކު، ފުރަތަމަ ހާފު ނިމެންދެން އެ ޓީމަށް ލީޑުހިފަަހައްޓައިނުލެވުނެވެ. މެޗުގެ 35 ވަނަ މިނިޓްގައި ފެރާން ޓޮރޭޒް ވަނީ ގޯލެއް ޖަހައި ނަތީޖާ ހަމަހަމަކޮށްދީފަ އެވެ.
ދެ ވަނަ ހާފްގެ ކުޅުން ފަށައިގެން 11 މިނިޓް ތެރޭ އަނެއްކާ ވެސް ރޯޔަލް އެންޓްވާޕުން ލަނޑެއް ޖަހައި ލީޑުނެގި އެވެ. މި ގޯލު ކާމިޔާބުކުރީ ވިންސެންޓް ޖެންސަން އެވެ. ބާސެލޯނާ އިން މެޗުގައި ދެ ވަނަ ފަހަރަށް އެއްވަރުކުރީ އިތުރު ވަގުތުގެ ފުރަތަމަ މިނިޓްގައި މާކް ގުއިއޫ ޖެހި ގޯލުންނެވެ.
ބެލްޖިއަމްގެ ޗެމްޕިއަން، ރޯޔަލް އެންޓްވާޕް މޮޅުކޮށްދިން ގޯލު ޖެހީ އިތުރު ވަގުތުގެ ފަސް ވަނަ މިނިޓްގައި ޒުވާން ކުޅުންތެރިޔާ، ޖޯޖް އިލެނެކީނާ އެވެ.
މި ނަތީޖާއާ އެކު، ބާސެލޯނާ މި ވަނީ ހަތަރު ދުވަސް ތެރޭ ދެ ފަހަރެއް މަތިން ބަލިވެފަ އެވެ. އެ ޓީމުގެ ކޯޗު ޒަވީ ހެނާންޑޭޒް ވަނީ ހާލަތު ބަދަލުކުރަން މެޗުތަކުން ނަތީޖާ ނެރެވޭ ވަރަށް ކުޅެން ޖެހޭ ކަމަށް ބުނެފަ އެވެ.
ގްރޫޕް އެޗްގެ އެއް ވަނަ ބާސެލޯނާ ދިޔައީ ދެ ވަނައިގައި ނިންމި ޕޯޓޯއާ އެއްވަރަށް 12 ޕޮއިންޓް ހޯދައިގެންނެވެ. ޕޯޓޯ އިން ރޭ ވަނީ ޝަހުތަރު ޑޮނެސްކް އަތުން 5-3 އިން މޮޅުވެފަ އެވެ. ގްރޫޕްގެ ތިން ވަނަ ދިޔަ ޝަހުތަރު ޑޮނެސްކަށް ވަނީ ނުވަ ޕޮއިންޓް ލިބިފަ އެވެ. ފުލުގައި ނިންމި ރޯޔަލް އެންޓްވާޕްގެ އޮތީ ތިން ޕޮއިންޓް އެވެ.
ގްރޫޕް އީގެ އެއް ވަނަ ހޯދި އެތުލެޓިކޯ މެޑްރިޑުން ވަނީ ރޭ ކުޅުނު މެޗުން 2-0 އިން ލާޒިއޯ ބަލިކޮށްފަ އެވެ. އެތުލެޓިކޯ ގްރޫޕް އެއް ވަނަ ހޯދީ 14 ޕޮއިންޓާ އެކު އެވެ. ލާޒިއޯ ދެ ވަނަ ހޯދީ 10 ޕޮއިންޓް ހޯދައިގެންނެވެ. ތިން ވަނަ އަށް ދިޔަ ފެޔަނޫޑަށް ހަ ޕޮއިންޓް ލިބުނުއިރު، ރޭ އެ ޓީމު ވަނީ ސެލްޓިކް އަތުން 2-1 އިން ބަލިވެފަ އެވެ. ސެލްޓިކް ގްރޫޕް ނިންމާލީ ހަތަރު ޕޮއިންޓާ އެކު އެވެ.
