ސެވިލް، ސްޕެއިން (ޑިސެމްބަރު 10) - ސްޕެނިޝް ލީގުގައި ރެއާލް ބެޓިސް އާއި ރެއާލް މެޑްރިޑް ވާދަކުރި މެޗު 1-1 އިން އެއްވަރުވެ އެވެ.
ރެއާލް ބެޓިސްގެ ދަނޑުގައި ކުޅުނު މެޗު އެއްވަރުވިއިރު، އެ ޓީމު މިވަގުތު އޮތީ ލީގުގެ އެއް ވަނައިގައި އެންމެ ޕޮއިންޓެއްގެ ތަފާތުންނެވެ. ރެއާލް އަށް 39 ޕޮއިންޓް ލިބިފައިވާއިރު، އެއް މެޗު މަދުން ކުޅެފައިވާ ޖިރޯނާ އަށް ލިބިފައިވަނީ 38 ޕޮއިންޓެވެ. އެ ޓީމު މިރޭ ނުކުންނާނީ ބާސެލޯނާއާ ދެކޮޅަށެވެ. ލީގުގެ ތިންވަނައިގައި ބާސެލޯނާ އޮތީ 34 ޕޮއިންޓާ އެކުގަ އެވެ.
ބެޓިސް އަތުން އެއްވަރުވި މެޗުގައި ރެއާލްގެ ފުރަތަމަ ގޯލު ޖަހައިދިނީ ޖޫޑް ބެލިންހަމް އެވެ. މިއީ ލީގުގައި ބެލިންހަމް ކުޅުނު 14 މެޗުގައި ޖެހި 12 ވަނަ ގޯލެވެ. ބެޓިސް އިން ނަތިޖާ އެއްވަރުކުރީ އޭރިއާ ބޭރުން ފޮނުވާލި ހަމަލާއެއ ގޯލަށް ވައްދާލައިގެން އައިޓޯ ރުއިބާލް އެވެ.
މި މެޗުގެ ފުރަތަމަ އެގާރައިގައި ނުކުޅު ނަމަވެސް އަނިޔާއިން ރަނގަޅުވެ ކީޕަރު ކެޕާ އަރިޒަބަލަގާ ސްކޮޑުގައި ހިމެނި ބެންޗުގައި އިނެވެ. ބެލިންހަމްވެސް މި މެޗަށް ނިކުތީ ކޮނޑަށް ލިބުނު އަނިޔާއަކަށް ފަރުވާ ހޯދުމަށްފަހުގަ އެވެ.
ލަލީގާގައި ރޭ ކުޅުނު އެހެން މެޗުތަކަށް ބަލާއިރު، ރެއާލް ސޮސިއެޑާޑުން ވަނީ ވިޔަރެއާލްގެ މައްޗަށް 3-0 އިން ކުރި ހޯދައިފަ އެވެ. މި މެޗުގައި އެ ޓީމުގެ ގޯލްތައް ޖަހައިދިނީ މިކޭލް މެރީނޯ، މާޓިން ޒުބިމެންޑީ އަދި ޓަކެފޫސާ ކޫބޯ އެވެ.
ލީގުގައި ރޭ ސެވިއްޔާ ވަނީ މަޔޯކާ އަތުން 1-0 އިން ބަލިވެފަ އެވެ. ލީގުގައި ކުޅުނު 15 މެޗުގެ ތެރެއިން ސެވިއްޔާ އަށް މޮޅުވެވުނީ އެންމެ ދެ މެޗުންނެވެ. އެ ޓީމު އޮތީ ލީގުގެ 16 ވަނައިގަ އެވެ.
