ލަންޑަން (ޑިސެމްބަރު 10) - އިނގިރޭސި ޕްރިމިއާ ލީގުގައި ރޭ ކުޅުނު މެޗުން އެސްޓަން ވިލާ އަތުން 1-0 އިން އާސެނަލް ބަލިވުމުން، ކްރިސްޓަލް ޕެލަސްގެ މައްޗަށް 2-1 އިން ކުރިހޯދި ލިވަޕޫލަށް ލީގުގެ އެއް ވަނަ މަގާމުގައި އެއް ޕޮއިންޓުގެ ލީޑެއް ލިބިއްޖެ އެވެ.
ލިވަޕޫލް އެއް ވަނަ އަށް އެރީ އިއްޔެ ފުރަތަމަ ކުޅުނު މެޗުން ޕެލަސް ބަލިކޮށް، 16 މެޗުން 37 ޕޮއިންޓް ހޯދައިގެންނެވެ. އާސެނަލް ކުޅުނު މެޗުން މޮޅުވެގެން، އަލުން އެއް ވަނަ އަށް އެރެން އޮތް ނަމަވެސް ބަލިވުމުން އެ ޓީމު އޮތީ 16 މެޗުން 36 ޕޮއިންޓާ އެކު ދެ ވަނައިގަ އެވެ. ތިން ވަނައިގައި އޮތީ އާސެނަލް ބަލިކުރި ވިލާ އެވެ. އެ ޓީމަށް 16 މެޗުން ވަނީ 35 ޕޮއިންޓް ލިބިފަ އެވެ. ހަތަރެއްގައި އޮތް އެންމެ ފަހުގެ ޗެމްޕިއަން، މެންޗެސްޓާ ސިޓީ އަށް ވަނީ 15 މެޗުން 30 ޕޮއިންޓް ލިބިފަ އެވެ.
ޕެލަސް އިން އަމިއްލަ ދަނޑުގައި ކުޅުނު މެޗުގައި ލީޑުނެގީ 57 ވަނަ މިނިޓްގައި ޖިއާން ފިލިޕޭ މަޓޭޓާ ވައްދާލި ޕެނަލްޓީންނެވެ. މިއީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އެކެވެ. ފުރަތަމަ ހާފުގައި ޕެލަސް އަށް ދިން ޕެނަލްޓީ އެއް ވަނީ ވީއޭއާރް އިން ބަލާފައި ނިންމުން ބަދަލުކޮށްފަ އެވެ.
ލިވަޕޫލް މޮޅުވީ ޕެލަސްގެ ކުޅުންތެރިއަކު މަދުވި ފަހުން ދެ ގޯލު ޖަހައިގެންނެވެ. އެ ގޮތުން، ޕެލަސްގެ ޖޯޑަން އަޔޫ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކިތާ ދޮޅު މިނިޓް ތެރޭ މުހައްމަދު ސަލާހު ވަނީ ލިވަޕޫލަށް އެއްވަރުކޮށްދީފަ އެވެ. މިއީ ލިވަޕޫލަށް ސަލާހު ޖަަހައިދިން 200 ވަނަ ގޯލެވެ. އަދި ޕްރިމިއާ ލީގުގައި ޖެހި 150 ވަނަ ގޯލެވެ. ސަލާހަކީ ލިވަޕޫލަށް 200 ގޯލު ހަމަކުރި ފަސް ވަނަ ކުޅުންތެރިޔާ އެވެ. ލިވަޕޫލް މޮޅުކޮށްދިން ގޯލު ޖެހީ އިތުރު ވަގުތުގެ ފުރަތަމަ މިނިޓްގައި ހާވީ އެލިއަޓް އެވެ.
ވިލާ އިން އާސެނަލް ބަލިކުރީ ފުރަތަމަ ހާފުގައި ޖޯން މެކްގިން ޖެހި ގޯލުންނެވެ. އާސެނަލުން ލަނޑެއް ޖެހޭތޯ ގިނަ މަސައްކަތްތަކެއް ކުރި ނަމަވެސް ވިލާ އިން ވަނީ ލީޑުގައި އޮވެ މެޗު ނިންމާލައިފަ އެވެ. މި ނަތީޖާއާ އެކު ވިލާ އިން ވަނީ ލީގުގައި އަމިއަލަ ދަނޑުގައި ޖެހިޖެހިގެން 15 މޮޅު ހަަމަކޮށްފަ އެވެ.
ބޯންމައުތުން ވަނީ ރޭ މެންޗެސްޓާ ޔުނައިޓެޑް ދަނޑުގައި 3-0 އިން މޮޅުވެފަ އެވެ. މިއީ ބޯންމައުތުގެ ތާރީހުގައި ވެސް ޔުނައިޓެޑް ދަނޑުގައި ހޯދި ފުރަތަމަ މޮޅެވެ. ބޯންމައުތަށް މި މެޗުގައި ގޯލު ޖަހައިދިނީ ޑޮމިނިކް ސޮލާންކޭ އާއި ފިލް ބިލިން އަދި މާކޯސް ސެނޭސީ އެވެ.
ޔުނައިޓެޑް ލީގުގެ ހަ ވަނައިގައި އޮތީ 16 މެޗުން 27 ޕޮއިންޓް ހޯދައިގެންނެވެ.
ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ބްރައިޓަން އާއި ބާންލީ 1-1 އިން އެއްވަރުވިއިރު، ވުލްވްސް އާއި ނޮޓިންހަމް ފޮރެސްޓް ވެސް ވަނީ 1-1 އިން އެއްވަރުވެފަ އެވެ. ޝެފީލްޑް ޔުނައިޓެޑްގެ ކޯޗުކަމާ އަލުން ހަވާލުވެ ކްރިސް ވައިލްޑާ ވަނީ ފުރަތަމަ މޮޅު ހޯދައިފަ އެވެ. އެއީ 1-0 އިން ބްރެންޓްފޯޑް ބަލިކޮށްގެންނެވެ.
