ފްލޮރިޑާ (ނޮވެމްބަރު 14) - އެމެރިކާ ލީގުގެ އިންޓަ މިއާމީގެ ސީޒަންގެ މޮޅު ކުޅުންތެރިޔާގެ އެވޯޑު އާޖެންޓީނާގެ ލިއޮނަލް މެސީއަށް ލިބިއްޖެ އެވެ.
އާޖެންޓީނާގެ ކެޕްޓަން ލިއޮނަލް މެސީއަށް އިންޓަ މިއާމީގެ މޮޅު ކުޅުންތެރިޔާގެ އެވޯޑު ދީފައިވަނި މިދިޔަ ހަތަރު މަހު އެ ކުލަބަށް ކުޅުނު މެޗުގައި ދެއްކި ކުޅުމާއި ކުލަބަށް ހޯދައިދީފައިވާ ކަމިޔާބީތަކަށް ބެލުމަށް ފަހުގަ އެވެ. މިގޮތުން އެމެރިކާގައި މުޅިން އަލަށް ކުޅުނު ލީގު ކަޕް އިންޓަ މިއާމީއަށް ކާމިޔާބުކޮށްދިނުމުގައި އޭނާގެ ހިއްސާ ބޮޑެވެ. މެސީ ވަނީ އެ މުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމާއި، އެންމެ މޮޅު ކުޅުންތެރިޔާގެ މަގާމްވެސް ހޯދާފަ އެވެ.
ފްރާންސްގެ ޕީއެސްޖީ ދޫކޮށް އެމެރިކާ ލީގަށް މެސީ ބަދަލުވީ މިދިޔަ ޖޫން މަހުގަ އެވެ. އޭގެ ފަހުން އޭނާ ވަނީ އެކުލަބަށް ޖުމްލަ 14 މެޗު ކުޅެދީފަ އެވެ. މި 14 މެޗުގައި 11 ގޯލު ޖަހައި އަށް ގޯލު ޖެހުމަށް މެސީ އެހީވި އެވެ.
މެސީއަށް މި އެވޯޑު ލިބުމުން ބައެއް ފާޑުކިޔުންތައް ވެސް ކުލަބަށް އަންނަނީ އަމާޒުވަމުންނެވެ. ސަބަބަކީ މުޅި ސީޒަނަށް ބަލާއިރު އިންޓަ މިއާމީ އިން 47 މެޗު ކުޅުނުއިރު، އެންމެ 14 މެޗުގައި ކުޅުނު ކުޅުންތެރިއަކަށް މި އެވޯޑު ދިނުމެވެ. އެމެރިކާ ލީގުގައި 34 މެޗު އިންޓަ މިއާމީ އިން ކުޅުނުއިރު، މެސީއަށް ކުޅެވުނީ އެންމެ ހަ މެޗުގަ އެވެ.
އިންޓަ މިއާމީގެ މިއަހަރުގެ މޮޅު ކުޅުންތެރިޔާގެ މަގާމް މެސީ ހޯދިއިރު، މިދިޔަ އަހަރު އެކުލަބުގެ މޮޅު ކުޅުންތެރިޔާގެ މަގާމް ހޯދީ އާޖެންޓީނާގެ ކުރީގެ ތަރި ގޮންޒާލޯ ހިގުއައިން އެވެ.
