ބޮގޯޓާ (ނޮވެމްބަރު 10) - މީގެ 13 ދުވަސްކުރިން ހަތިޔާރު އެޅި ޖަމާއަތަކުން ރަހީނުކުރި ލިވަޕޫލްގެ ކޮލަމްބިއާ ތަރި ލުއިސް ޑިއާޒްގެ ބައްޕަ ދޫކޮށްލައިފި އެވެ.
ކޮލަމްބިއާގެ ސަރުކާރާ ދެކޮޅު ހަނގުރާމަވެރި ޖަމާއަތެއް ކަމަށްވާ "ނެޝަނަލް ލިބަރޭޝަން އާމީ" (އީއެލްއެން)ގެ ގްރޫޕަކުން ލުއިސް ޑިއާޒްގެ ބައްޕަ ކިޑެންޕް ކުރީ، އެ ގައުމުގެ އުތުރު ހިސާބެއް ކަމަށްވާ ލަ ގުއަޖީރާގެ ޕެޓްރޯލް ސްޓޭޝަނެއްގައި ހުއްޓަ އެވެ.
މިދިޔަ އާދިއްތަ ދުވަހު ލިވަޕޫލުން ލީގުގައި ކުޅުނު މެޗުގައި ގޯލު ޖެހުމަށްފަހު ޑިއާޒް ވަނީ އޭނާގެ ބައްޕަ މިނިވަންކޮށްދިނުމަށް ގޮވާލާ މެސެޖެއް ވެސް އުފާފާޅުކުރުންތަކުގައި ދައްކާލާފަ އެވެ.
ލުއިސް ޑިއާޒްގެ ބައްޕަ ހޯދުމަށް އެގައުމުގެ ފުލުހުންނާއި އަސްކަރިއްޔާއިން ގުޅިގެން ބޮޑު މިލިޓަރީ އޮޕަރޭޝަނެއް ކުރިއަށްގެންދިޔަ އެވެ.
އެންމެ ފަހުން ޑިއާޒްގެ ބައްޕަ ދޫކޮށްލާފައިމިވަނީ ދެ ދުވަސްވަންދެން އެކަމާ ގުޅޭ މަޝްވަރާތައް ކުރުމަށް ފަހު އެވެ.
މިއަދު ދޫކޮށްލި ލުއިސް ޑިއާޒްގެ ބައްޕަ މިހާރު ވަނީ މިލިޓަރީ ހެލިކަޕްޓަރެއްގައި ވަލެޑުޕާ ސިޓީއަށް ގެންދެވިފަ އެވެ. އެތަނުގައި އޭނާގެ މެޑިކަލް ޓެސްޓުތަކެއް ހެދުމަށްފަހު އާއިލާއާ ހަވާލުކުރާނެ އެވެ.
ލުއިސް ޑިއާޒްގެ ބައްޕަ ދޫކޮށްލުމުގެ އުފަލުގައި ގިނަ ބަޔަކު އާއިލާގެ މެންބަރުންނާއިއެކު ވަނީ އުފާފާޅުކޮށްފަ އެވެ. މިގޮތުން ޑިއާޒްގެ ލިވަޕޫލް ޖާޒީ ލައިގެން ގިނަ ބަޔަކު ވަނީ މަގުތަކަށް ނުކުމެ ހިތްހަމަޖެހުން ފާޅުކޮށްފަ އެވެ.
ކޮލަމްބިއާގެ ގައުމީ ޓީމްގެ ކުޅުންތެރިޔާގެ އާއިލާއިން ވަނީ ޑިއާޒްގެ ބައްޕަ މިނިވަންކޮށްދިނުމަށް ކޮލަމްބިއާގެ ސަރުކާރާއި، ފުލުހުން އަދި އެގައުމުގެ އަސްކަރިއްޔާއިން ކޮށްދިން މަސައްކަތަށް ޝުކުރު އަދާކޮށްފަ އެވެ.
