މެޑްރިޑް (ނޮވެމްބަރު 6) - ސްޕެނިޝް ލަލީގާގައި ރަޔޯ ވަޔެކާނޯ އަތުން މޮޅުނުވެވި ރެއާލް މެޑްރިޑަށް ތާވަލްގެ އެއްވަނަ ގެއްލިއްޖެ އެވެ.
ރަޔޯ ވަޔެކާނޯއާ ދެކޮޅަށް އަމިއްލަ ދަނޑުގައި ކުޅެ ގޯލެއް ނުޖެހި އެއްވަރުވި މެޗާއިއެކު ލީގުގެ އެއްވަނައިގައި އޮތް ޖިރޯނާ ފަހަތަށް ޖައްސާލަން ލިބުނު ފުރުސަތު ރެއާލްއިން ވަނީ ނަގާލައިފަ އެވެ. ލަލީގާގެ އެއްވަނައިގައި ޖިރޯނާ 31 ޕޮއިންޓާއިއެކު އޮތްއިރު، ރެއާލް އަށް ލިބިފައިވަނީ 29 ޕޮއިންޓެވެ. އެންމެ ފަހުގެ ލީގު ޗެމްޕިއަން ބާސެލޯނާ ތިން ވަނައިގައި އޮތީ 27 ޕޮއިންޓާއިއެކުގަ އެވެ.
ރޭގެ މެޗުގައި ރެއާލް މެޑްރިޑަށް ގޯލު ޖަހާނެ ރަނގަޅު ފުރުސަތުތަކެއް ލިބުނެވެ. މިގޮތުން އެޓީމްގެ ފޯވާޑް ހޯސެލޫއަށް ލިބުނު ގިނަ ފުރުސަތުތަކުގެ ބޭނުން ނުކުރެވުނުއިރު، ޖޫޑް ބެލިހަމް، ވިނީޝިއަސް ޖޫނިއާ، ރޮޑްރިގޯ އަދި ފެޑެރިކޯ ވަލްވާޑޭއަށް ލިބުނު ހުސް ފުރުސަތުތަކުގައިވެސް ގޯލެއް ނުޖެހުނެވެ.
ރެއާލް އިން މި މެޗުގައި 22 ހަމަލާއެއް ފޮނުވާލިއިރު، ގޯލާ އަމާޒުވި ހަ ބޯޅަ ވަޔެކާނޯގެ ކީޕަރު ސްޓޯލް ޑިމިޓްރީވްސްކީ ވަނީ ދިފާއުކޮށްފަ އެވެ. މެޗުގެ 66 ވަނަ މިނެޓުގައި ރެއާލްއިން ގޯލެއްވެސް ޖެހި އެވެ. ވިނީޝިއަސް ޖޫނިއާ ޖެހި ގޯލު ރެފްރީ ނިންމީ އޮފްސައިޑު ކަމަށެވެ.
ރެއާލް މެޑްރިޑަށް ކުރިއަށް އޮތީ ބުދަ ދުވަހުގެ ރޭ ސްޕޯޓިން ބްރާގާއާ ދެކޮޅަށް ކުޅޭ މެޗެވެ.
ލަލީގާގައި ރޭ ކުޅުނު އެހެން މެޗުތަކަށް ބަލާއިރު، ވެލެންސިއާ އިން ވަނީ އަމިއްލަ ދަނޑުގައި 1-0 އިން ގްރަނާޑާ ބަލިކޮށްފަ އެވެ. ވިޔަރެއާލް އާއި އެތުލެޓިކް ބިލްބާއޯ ވާދަކުރި މެޗު 3-2 އިން ބިލްބާއޯ އިން ކާމިޔާބުކުރިއިރު، އަލްވޭސް އިން ވަނީ އަލްމީރިއާ އަތުން 1-0 އިން މޮޅުވެފަ އެވެ.
