ޑޯޓްމަންޑު (ނޮވެމްބަރު 5) - ޖަރުމަން ބުންޑަސް ލީގާގައި ބޮރޫޝިއާ ޑޯޓްމަންޑު އަތުން 4-0 އިން ބަޔާން މިޔުނިކް މޮޅުވި މެޗުގައި ފޯވާޑް ހެރީ ކޭން ހެޓްރިކް ހަދައި ރެކޯޑެއް ހަދައިފި އެވެ.
މި މެޗުގައި ބަޔާނުގެ ހެރީ ކޭން ޖެހި ތިން ގޯލާއިއެކު އޭނާ އެޓީމަށް ލީގުގައި ޖެހި ގޯލުގެ އަދަދު ވަނީ 15 އަށް އަރާފަ އެވެ. މިއާއިއެކު ކޭން ވެފައިވަނީ ބުންޑަސް ލީގުގައި ކުޅުނު ފުރަތަމަ 10 މެޗުގައި މިއަދަދަށް ގޯލު ޖެހި ފުރަތަމަ ކުޅުންތެރިޔާއަށެވެ.
ރޭގެ މެޗުގައި ޑޯޓްމަންޑު ކޮޅަށް އޭނާ ހެޓްރިކް ހެދިއިރު، މިދިޔަ ހަފްތާގައި ޑާމްސްޓަޑް ކޮޅަށްވެސް އޭނާ ހެޓްރިކް ހެދި އެވެ. މިއީ މި ސީޒަންގައި މިހާތަނަށް ކޭން ހެދި ތިންވަނަ ހެޓްރިކެވެ. މިއީވެސް ފުރަތަމަ ދިހަ މެޗަށް ބަލާއިރު، ޖަރުމަން ލީގުގެ ރެކޯޑެކެވެ. އަނެއްކޮޅުން ބުންޑަސް ލީގާގެ އެންމެ ވާދަވެރި ދެ ޓީމު ކަމަށްވާ ޑޯޓްމަންޑާއި ބަޔާންގެ ކުރިމަތިލުމެއްގައި ފުރަތަމަ ފަަހަރަށް ކުޅުނު ކުޅުންތެެރިއަކު މީގެ ކުރިން ހެޓްރިކެއް ހަދާފައެއްވެސް ނުވެ އެވެ.
ޑޯޓްމަންޑު ކޮޅަށް ބަޔާނުން ޖެހި ހަތަރު ގޯލުގެ ތެރެއިން ތިން ގޯލު ކޭން ޖެހިއިރު، އަނެއް ގޯލު ޖަހައިދިނީ ޑަޔޮޓް އުޕަމެކާނޯ އެވެ.
2018ގެ ފަހުން ޑޯޓުމަންޑާއި ދެކޮޅަށް ބަޔާނުން ކުޅުނު އެއްވެސް މެޗަކުން އެޓީމް ބަލިވެފައި ނުވާކަން ވެސް ފާހަގަކޮށްލެވެ އެވެ.
ޑޯޓްމަންޑު އަތުން މޮޅުވިނަމަވެސް ބަޔާން އަދިވެސް އޮތީ ލީގުގެ ދެވަނައިގަ އެވެ. އެއްވަނައިގައި އޮތީ ބަޔާ ލެވަކޫސެން އެވެ. ބަޔާނަށް ލިބިފައިވަނީ 26 ޕޮއިންޓެވެ. ލެވަކޫސެން އެއްވަނައިގައި އޮތީ 28 ޕޮއިންޓާއިއެކުގަ އެވެ.
ލެވަކޫސެން އިން ވަނީ އެންމެ ފަހުން ކުޅުނު މެޗުގައި ހޮފެންހެއިމް އަތުން 3-2 އިން މޮޅުވެފަ އެވެ.
ޖަރުމަން ބުންޑަސް ލީގާގައި މިހާތަނަށް ބަލިނުވެ އޮތް ހަމައެކަނި ދެ ޓީމަކީވެސް ބަޔާން މިޔުނިކާއި ލެވަކޫސެން އެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު، އާރްބީ ލިއެޕްޒީގް ވަނީ 2-0 އިން މެއިންޒް އަތުން ބަލިވެފަ އެވެ. އެއިންޓްރެޗް ފްރެންކެފާޓާއި ޔޫނިއަން ބާލިން ވާދަކުރި މެޗު 3-0 އިން ކާމިޔާބުކުރީ ފްރެންކްފާޓުންނެވެ. ފްރެއިބާގާއި ބޮރޫޝިއާ މޮންޗެންގްލެޑްބަޗް ވާދަކުރި މެޗު ނިމުނީ 3-3 އިން އެއްވަރުވެގެންނެވެ.
